Read Lezgi New Testament – ЦӀийи Икьрар ФилипӀвийриз 2 Bible Online

ФилипӀвийриз 2 - Lezgi New Testament – ЦӀийи Икьрар bible

ФилипӀвийриз 2

¹Гьа икӀ, Месигьдихъ галаз сад хьуни куьн кӀубан ийизва. Адан муьгьуьббатди квез теселли гузва. Куьн Руьгьдин куьмекдалди садвиле ава ва квехъ регьим ва чарадан рикӀикай хабар кьадай гьисс ава.

²Зи шадвал генани ацӀайди хъия: куь фикиррин садвал хуьх, квехъ гьа сад хьтин муьгьуьббат хьурай, куьне руьгьдин жигьетдай садвал къалура, куьн сад хьтин фикиррал алайбур хьухь.

³Са жуван менфят кӀан хьунин ва я кьуру дамахар авунин ниятар аваз са карни ийимир. Абу́р хуьх ва масадбур жувалай вине яхъ.

⁴Са жуваз авай хийирдал ваъ, гьакӀни муькуьбуруз авай хийирдални амал ая.

⁵Куь фикирар Иса Месигьдин фикирар хьтинбур хьана кӀанда.

⁶Аллагьдихъ хьтин тӀебиат аваз, гьикӀ хьайитӀани алахънач Ам барабарвал хуьз Аллагьдихъ галаз,

⁷аксина, Вичин агъуззавай тӀул, лукӀран тӀебиат авуна кьабул; адакай инсанриз ухшарди хьана, акунрай инсан хьтинди хьана.

⁸Ада умун авуна Вич, рекьидалди муьтӀуьгъ хьана, амма яз Ам муьтӀуьгъ хьана ажалдиз хашунал!

⁹Гьавиляй Ам Аллагьди хкажна, Адаз вири тӀварарилай вине авай ТӀвар гана,

¹⁰цаварални, чилерални, чилин кӀаникни Иса Месигьдин ТӀварцӀин вилик метӀерал вири акъвазун патал,

¹¹Аллагь Бубадин гьуьрметдай гьар са чӀала кьабулун патал Иса Месигь Ребби тирди!

¹²Гьа икӀ, зи кӀанибур, куьн датӀана чӀалаз килигдайбур тир, неинки зун куь патав гвай чӀавуз, гьакӀ исятдани, зун авачирлани, куьн гьадалайни гзаф чӀалаз килигзава. КичӀевиливди ва рикӀик зурзун кваз куьн хилас хьун куьне куьн тухузвай къайдадалди къалуриз хьухь,

¹³гьар гьикӀ ятӀани Аллагьди Вичи куь къене кӀвалах тухузва, квек Вичин къастунив кьурвал гьевесни, гьерекатни кутазва.

¹⁴ЧӀуру ва рекьяй акъатнавай несилдин арада квекай рехне квачирбур ва леке алачирбур, Аллагьдин михьи аялар хьун патал, вири крар шикаятар ва гьуьжетар галачиз ая. Куьне абурун арада, цавара гъетери хьиз, нур гузва.

¹⁶Куьн уьмуьрдин гаф кьуна хьухь. За и кардал Месигь хкведай юкъуз, за жуван ката-галтуг чӀагьнакьа[1] авунач лугьуз ва чӀагьнакьа зегьмет чӀугунач лугьуз, дамах ийидайвал ая.

¹⁷Куьне Аллагьдиз гьакъикъидаказ ийизвай къуллугъдиз — къурбанддиз тамамвал гуз алахьдай чехир хьиз зун хьайитӀани, зун шад я, зани квехъ галаз санал шадвал ийизва.

¹⁸Куьнни шад хьухь ва захъ галаз шадвал ва хвешивал ая.

¹⁹ТӀиматӀея квекай хкидай хабарри зун кӀубан авун патал, Ребби Исади заз куь патав мукьвара ам ракъуриз хьунин умуд ганва.

²⁰Захъ галаз са фикиррал алай ТӀиматӀей хьтин, куь паталай ихьтин жавабдарвал гьиссдай маса кас захъ авач.

²¹Амайбур гьар сад Иса Месигьдиз кӀанзавайдан ваъ, жуван хийирдин къайгъуда ава.

²²Амма ТӀиматӀея вичин алакьунар карда къалурайди, ада захъ галаз санал, хци бубадихъ галаз хьиз, Шад Хабардикай муштулух гайиди квез чизва.

²³Гьавиляй, инлай кьулухъ захъ вуч жедатӀа чир хьунни кумаз, за ам куь патав ракъурда лагьана умуд ийизва.

²⁴Реббиди зун жувни мукьвара куь патав акъатунин чӀалахъарзава.

²⁵Мадни лагьайтӀа, зи стха, захъ галаз са кар ийизвайди ва амадаг, куьне ракъурнавайди ва зи къайгъуйра заз къуллугъайди тир ЭпафрадитӀ куь патав элкъвена рахкур хъувун за лазим яз гьисабзава.

²⁶Адан вил квехъ гзаф хьанва. Квев адан азардикай ванер агакьуни ам гъарикӀ ийизва.

²⁷Эхь, ам лап рикӀивай азарди кьунвай, саки рекьидай чкадал атанвай, амма Аллагьди адаз регьим авуна, неинки са гьадаз, зи пашманвилел пашманвал алава тахъвун патал, зазни регьим авуна.

²⁸Гьавиляй, куьн ам акуна шад хьун патал ва зи пашманвални тӀимил хьун патал, за ам куь патав мадни чӀехи хушуналди ракъурзава.

²⁹Ам Реббиди ганвай стха яз чӀехи шадвилелди кьабула ва ам хьтин инсанриз гьуьрмет ая.

³⁰ГьикӀ лагьайтӀа Месигь патал кӀвалахдайла, ам саки кьена. Заз квевай гуз тахьай куьмек гун патал, ада вичин уьмуьр кьиникьин хатадик кутуна эхир.