Read Lezgi New Testament – ЦӀийи Икьрар ФилипӀвийриз 3 Bible Online

ФилипӀвийриз 3 - Lezgi New Testament – ЦӀийи Икьрар bible

ФилипӀвийриз 3

¹Гьа икӀ, стхаяр-вахар, Реббидик кваз шадвал ая! Идакай мад ва мад кхьин тавун заз четин я, вучиз лагьайтӀа куьн патал икӀ хъсан жеда.

²А кицӀерикай — писвал ийизвай ксарикай — мукъаят хьухь, зиянкарвал ийизвайбурукай[2] мукъаят хьухь.

³Гьакъикъатда суьннет авунвайбур — Аллагьдин Руьгьдин регьбервилик кваз икрамзавай, Иса Месигьдалди дамахарзавай ва жуван агалкьунрихъ далу акал тийизвай чунни куьн я.

⁴Завай, лагьайтӀа, а агалкьунрихъ далу акализ жедай! Абурухъ далу акалдай бинеяр захъ маса нелай хьайитӀани гзаф авай жеди.

⁵Зун хана муьжуьд лагьай югъ алукьайла суьннет авунай, зи ери-бине исраил халкьдикай, Бунъяминан тайифадай я. Зун халисан михьи чувуд я, Къанундихъ галаз авай зи алакъадикай лагьайтӀа, зун фарисей я.

⁶Лап рикӀе цӀай аваз, алахъна зун иманийрин геле къекъвена. Къанундив кьур хьтин гьахъ-михьивиликай рахайтӀа, зак са рехнени квач.

⁷Амма за а чӀавуз жуваз жагъанвайди яз гьисабзавай кьван вири затӀар гила Месигьдин хатурдай квахьнавайбур яз гьисабзава.

⁸Неинки са гьам, гьакӀ амай крарни, зи Ребби Иса Месигь кьатӀунин къимет авачирвилив гекъигайла, за жувавай квахьнавай затӀар яз гьисабзава. Месигь патал за дуьньяда авай кьван амай вири затӀар зибилрай кьуна, Ам жуваз хьун патал ва Адахъ галаз хьун патал за вири квадарна,

⁹За гила жуван алахъунралди ва Къанун кьилиз акъудуналди къачудай гьахъ-михьивилиз акъудунихъ ялзавач. Ваъ, Аллагьди зун авиляй кьабулна хьи, захъ Иса Месигьдихъ ийизвай иман ава.

¹⁰Заз Месигь ва Адал чан хкай къуват кьатӀуз кӀанзава. Заз Адахъ галаз Адан азабар пайиз ва Адан кьиникьа Гьам хьтинди жез кӀанзава.

¹¹Гьа чӀавуз, за кӀевелай умудзава, кьейидалай кьулухъ чан хтунивни зун агакьда.

¹²Им зун ихьтин дережадив агакьнава ва я закай тамамди хьанва лагьай чӀал туш, амма зун а дережадив агакьиз алахъзава, вучиз лагьайтӀа зун Иса Месигьди Вичив агакьарнава.

¹³Стхаяр-вахар, за жува и кар авунваз гьисабзавач, амма алатна фейи кьванди рикӀелай алудиз, анжах вилик квайдахъди физва.

¹⁴Зун жуван мураддихъ — савкьват къачун патал йигиндиз вилик физва. А савкьват, лагьайтӀа, вичихъди Иса Месигь арада аваз Аллагьди эвер ганвай цӀийи уьмуьр я.

¹⁵Чун, руьгьдин рекьяй чранвай ксар, вири затӀариз гьа икӀ килигна кӀанда. Куьне са куьнин патахъай ятӀани масакӀа фикирзаватӀа, квез Аллагьди гьамни ачухарда.

¹⁶Амма ша чна чун агакьнавай дережадиз кутугайвал уьмуьрдин рехъ кьан.

¹⁷Куьне за ийизвайвал ая, стхаяр-вахар. Чакай хьанвай чешнедал амал ийизвайбур квез чешне яз яхъ.

¹⁸Гзафбуру Месигьдин хашунин душманар яз кьил хуьзва. Виликдай за абурукай квез лагьанай ва гилани вилерал накъвар алаз лугьузва.

¹⁹Абур чеб телеф хьунихъ физва. Абурун аллагь чпин руфун я, абуру гьи кардал дамахзаватӀа, гьада абур беябурзава. Абурун фикирар и дуьньядиз хас крарихъ элкъвенва.

²⁰Чи ватан лагьайтӀа, цаварал ала, гьанай чна Хиласкар Ребби Иса Месигь хтун вилив хуьзва.

²¹Адаз вири Вичиз муьтӀуьгъдай къуват ава, и къуватдин гьерекатдалди Ада виляй аватнавай чи беденар акӀ дегишарда хьи, абур Адан баркалла алай бедендиз ухшар жеда.