Read Lezgi New Testament – ЦӀийи Икьрар ФилипӀвийриз 4 Bible Online

ФилипӀвийриз 4 - Lezgi New Testament – ЦӀийи Икьрар bible

ФилипӀвийриз 4

¹Гьа икӀ, зи шадвални зи таж тир кӀани ва играми зи стхаяр-вахар, Реббидин куьмекдалди кӀевиз акъваз, кӀанибур.

²За Эвгьуда вахазни СуьнтӀуьх вахаз Реббидалди са фикиррал алаз хьухь лугьуз тагькимзава.

³За вазни минетзава, заз вафа тир амадаг, и вахариз куьмек це, гьикӀ лагьайтӀа абуру Шад Хабар патал захъ галаз, КӀелмесахъ галаз ва уьмуьрдин ктабда чпин тӀварар авай маса чи амадагрихъ галаз зегьмет чӀугуна.

⁴Реббидик кваз датӀана шад хьухь ва за мад гъилера лугьузва: шад хьухь!

⁵Къуй инсанрихъ галаз авай куь хъсан алакъаяр виридаз акурай. Ребби мукьув гва.

⁶Са куьнин къайгъуни чӀугвамир, амма вири крара, дуьадин ва минетдин куьмек галаз шукур авуналди, куь тӀалабунар Аллагьдиз чира.

⁷Гьа чӀавуз гьихьтин хьайитӀани кьатӀунрилай вине авай Аллагьдилай къвезвай саламатвили куь рикӀер ва акьулар Иса Месигьдалди садвиле аваз хуьда.

⁸Эхирки, стхаяр-вахар, гьи кар гьакъикъат, намус, адалат, михьивал, хушвал ва гьейранвал галайди ятӀа, гьи кар сувабди ва тарифдиз лайихди ятӀа, гьадакай фикирар ая.

⁹Квез завай чир хьайи кьван, завай квев агакьай кьван, ван хьайи кьван ва завай акур кьван вири крар кьилиз акъуд. Гьа чӀавуз саламатвилин чешме тир Аллагь квехъ галаз жеда.

¹⁰Куьне цӀийи кьилелай зи къайгъу чӀугунал за Реббидихъ ийизвай иманда рикӀин сидкьидай шадвалзава. Гьелбетда, куьне зи къайгъу датӀана чӀугвазвай, амма квез а кар къалурдай мумкинвал авачир.

¹¹За икӀ жув са куьхъ ятӀани муьгьтежвиляй лугьузвайди туш, гьикӀ лагьайтӀа зун гьихьтин хьайитӀани гьаларал рази жез вердиш хьанва.

¹²Заз кьитвални булвал вуч ятӀа чизва. Зи кьилел татайди амач, заз тух хьун ва каш эхун вуч ятӀа, агьвал хьунухь ва дарвиле хьун вуч ятӀа чизва.

¹³Заз къуват Гузвайдан куьмекдалди залай вири алакьда.

¹⁴Гьа икӀ, захъ галаз зи бедбахтвилер паюналди куьне хъсан кар авуна.

¹⁵ФилипӀвияр, за Шад Хабардикай муштулухар гуз эгечӀай, зун МакӀедандай экъечӀай чӀавуз, тек са квелай гъейри, иманийрин са кӀватӀалдини заз пулунин куьмек тагайвал куь рикӀел алама.

¹⁶Зун герек чӀавуз куьне заз куьмек гьатта Саланикдизни кваз шумудни са гъилера ракъурнай.

¹⁷За им квелай са вуч ятӀани жувал агакьун патал лугьузвайди туш, амма заз куьне куь суваб гзафарна кӀанзава.

¹⁸ЭпафрадитӀан куьмекдалди куьне заз ракъурай вири пул зав агакьна. Ам гьатта герекзавайдалайни гзаф я. Захъ исятда вири бес кьадарда ава. Им атир галай ни хьиз я, вич Аллагьдиз кӀани ва хуш къурбанд хьиз я.

¹⁹Зи Аллагьди Иса Месигьдин куьмекдалди Вичин баркалла алай девлетрикай гана, куь виридан игьтияжар таъмин ийида!

²⁰Къуй чи Аллагьдиз ва Бубадиз асирдай асирдиз шукур хьурай. Амин.

²¹Иса Месигьдиз талукь вирибуруз саламар лагь. Захъ галай стхайри-вахарини квез саламар лугьузва.

²²Аллагьдиз талукь тир инавай вирибуру квез саламар лугьузва, иллаки Римдин пачагьдин кьилел-кӀвачел элкъвезвайбурукай тирбуру.

²³Къуй Ребби Иса Месигьдин берекат квехъ галаз хьурай. Амин.