Read Lezgi New Testament – ЦӀийи Икьрар Каласвийриз 3 Bible Online

Каласвийриз 3 - Lezgi New Testament – ЦӀийи Икьрар bible

Каласвийриз 3

¹Гьа икӀ, квел Месигьдихъ галаз чан хканватӀа, Месигь Аллагьдин эрчӀи гъилихъай ацукьнавай цавариз талукь жез алахъа.

²Куь фикирар чилиз талукьдахъ ваъ, цавуз талукьдахъ элкъуьра.

³Куьн и дуьнья патал кьена, ва куь уьмуьр Месигьдихъ галаз санал Аллагьда чуьнуьх хьанва.

⁴Куь уьмуьр Месигь я, Ам дуьньядиз къалурай чӀавуз куьнни Адахъ галаз санал баркаллада аваз къалурда.

⁵Гьавиляй гунагькар тӀебиатдиз гьеле талукь яз жувак кумай кьван вири йикь: явавал, ахлакь тахьун, кӀеви гьевес хьунухь, абур авачир мурадар ва азгъунвал (ам бутриз икрам авунилай гъейри мад са затӀни туш).

⁶Ибуру вирида Аллагьдин чӀалаз килиг тийизвайбурукай Адаз хъел гъизва.

⁷Са чӀавуз куьнени гьа ибуралди уьмуьр тухузвай,

⁸амма исятда куьн патал и виридакай — хъилекай, гъазабдикай, писвиликай, агъу квай мецикай ва татугай гафар рахуникай — хилас жедай вахт алукьнава.

⁹Сада садаз таб мийир, гьикӀ лагьайтӀа куьне куьгьне инсандин къаматни крар жувалай алуднава.

¹⁰Куьне халисан чирвилив цӀийи хъувунвай ва Халикьдин Вичин къамат язвай цӀийи инсандин тӀебиат либас хьиз алукӀнава.

¹¹Гила мад я юнан, я чувуд, я суьннет авунвайди, я суьннет тавунвайди, я вагьшиди, я скӀуьф, я лукӀ, я азадди амач. Амма вири ва вирида авайди Месигь я.

¹²Гьавиляй, Аллагьди хкянавай Вичиз талукьбур ва кӀанибур яз, куьне жувал чарадан рикӀикай хабар кьун, дугъривал, умунвал, инсанрихъ галаз рахунра хъуьтуьлвал, сабур либас хьиз алукӀа.

¹³Сад садахъ галаз сабур гваз хьухь, куьне садакай садаз хьайи рикӀин тӀарвилерилай гъил къахчу. АкӀ гъил къахчу хьи, Реббиди квелай къахчурвал.

¹⁴Ва и виридал алава яз, тамам садвиле кӀватӀзавай муьгьуьббатни эхциг.

¹⁵Къуй куь рикӀериз регьбервал Месигьдин ислягьвили авурай, вучиз лагьайтӀа куьн са Бедендин паяр я ва квез а ислягьвал тайинарнава. Квехъ шукур авайди къалура.

¹⁶Къуй Месигьдикай тир гаф вичин вири девлетдалди квехъ галаз санал хьурай. Сада садаз гьар жуьредин камалдалди чирвал ва несигьатар це, ва, шукурвал къалуриз, куь рикӀера Аллагьдиз забурар, тарифдин ва руьгьани манияр лагь.

¹⁷Куьне вуч ийиз ва вуч лугьуз хьайитӀани, Ребби Исадин ТӀварцӀин гьуьрметдай ая, Адалди Аллагь Бубадиз шукур гъваш.

¹⁸Папар, Реббидиз кӀани саягъда куь итимриз муьтӀуьгъ хьухь.

¹⁹Гъуьлер, куь папар кӀан хьухь ва абурухъ галаз векъи жемир.

²⁰Аялар, вири крара куь диде-бубадин чӀалаз килиг, вучиз лагьайтӀа Реббидиз и кар хуш я.

²¹Бубаяр, куь аялар ажуз хьана тамукьдайвал, абурук ктадмир.

²²ЛукӀар, вири крара и чилел куь иесийриз табий хьухь. Им инсанар рази авун паталди вилиз хъсан аквадай краралди ваъ, рикӀин къеняй, Аллагьдихъай кичӀе яз гьа икӀ ая.

²³Куьне вуч ийиз хьайитӀани, вири рикӀелди ая, куьне ам инсанар патал ваъ, Ребби патал ийизвай хьиз ая.

²⁴ГьикӀ лагьайтӀа Реббидин патай квез ирс савкьват яз гудай чӀал квез чизва. Куьне Месигьдиз къуллугъзава.

²⁵Масадаз зиян гузвайдаз вичизни зиян гуда. Аллагьдиз сад муькуьдалай вине кьун хас туш.