Read Lezgi New Testament – ЦӀийи Икьрар 1-Саланиквийриз 2 Bible Online

1-Саланиквийриз 2 - Lezgi New Testament – ЦӀийи Икьрар bible

1-Саланиквийриз 2

¹Стхаяр-вахар, чун куь патав атун гьаваян кар туширди квез чизва.

²Квез чизвайвал, чал ФилипӀра гзаф азабар ва русвагьвилер акьалтна, амма, къати аксивилеризни килиг тавуна, чаз чи Аллагьди квез Вичин Шад Хабардикай лугьудай викӀегьвал гана.

³Чи эвер гуна я таб, я кьацӀай къастар авач, чун куьн алцурарун патални алахъзавач.

⁴Акси яз, чун Аллагьди синагъ авунвай ва чпел Шад Хабардикай лугьун ихтибарнавай ксар хьиз рахазва. Чна инсанриз ваъ, чи рикӀер синагъзавай Аллагьдиз кӀандайвал авунихъ ялзава.

⁵Квез чизвайвал, чна садрани чинал тариф авурди туш ва темягькарвилин къастаралди амалар авунач, и кардин шагьид Аллагь я;

⁶чаз инсанрин вилик машгьурвал герек туш: я куь вилик, я са нин ятӀани масадан.

⁷Месигьдин илчияр хьуналди, чавай къвез чи гьукум къалуриз жедай, амма, акси яз, чун хур гузвай диде вичин бицӀекрихъ гелкъведай жуьреда квехъ галаз милайим хьана.

⁸Чаз куьн акьван кӀевидаказ кӀан хьана хьи, чун квехъ галаз тек са Шад Хабар ваъ, гьакӀни чи уьмуьр пайиз гьазур тир — гьакьван куьн чаз багьа хьана.

⁹Куь арада Аллагьдилай атанвай Шад Хабар вяз ийидайла, квекай садални гуж акъалт тавун патал чна йифиз-юкъуз гьалдай фидалди гьикӀ зегьмет чӀугунатӀа, куь рикӀел алама, стхаяр-вахар.

¹⁰Квехъ, яни иманийрихъ галаз чна чун михьидаказ, гьахъдаказ ва айиб текъведайвал тухвайвилин шагьидар куьнни Аллагь я.

¹¹Квез чизвайвал, чна квехъ гьар садахъ галаз бубади вичин аялрихъ галаз ийидай хьтин рафтарвал авуна:

¹²квек руьгь кутаз, чӀалал гъиз хьана, Вичин Пачагьлугъдиз ва Вичин баркалладик атуниз эверзавай Аллагьдин вилик куьне лайих тир уьмуьрдалди кьил хуьн патал квез дад-бидадиз хьана.

¹³Чна датӀана Аллагьдиз а кардай шукур ийизва хьи, куьне чавай ван хьайи Аллагьдин Гаф кьабулдайла, ам инсанри туькӀуьрнавай гаф хьиз ваъ, ам гьихьтинди ятӀа, гьахьтинди яз — Аллагьдин Гаф яз, иман авай куь рикӀера зурбадаказ гьерекат твазвай къуват яз кьабулна.

¹⁴Куьне, стхаяр-вахар, Ягьудатда авай ва чеб Иса Месигьдихъ иманийрин кӀватӀалрилай — Аллагьдин кӀватӀалрилай чешне къачуна. А кӀватӀалриз Ребби Исани пайгъамбарар яна кьейи ва чун чукурай чувудрин патай акур хьтин дарвилер куь уьлкведин агьалийрин патай квезни акуна. Абуру Аллагьдиз кӀандайвал ийизвач ва амай вири инсанриз душманвал ийизва.

¹⁶Чаз, халкьар хилас авун патал, абурухъ галаз рахаз вугузвач. Гьа идалди абуру датӀана чпин гунагьрин кьадардал мад гунагьар хкин хъийизва, амма Аллагьдин хъел эхирни абурув агакьна.

¹⁷Стхаяр-вахар, са кьадар вахтунда чун квевай къакъатнавай, бедендалди къакъатнавай, амма рикӀелди ваъ. Чна куьн акун патал вири мумкинвилер кардик кутазвай.

¹⁸Чаз куь патав къвез кӀанзавай, зун, Павел, акӀ ийиз са шумудра алахънай, амма иблисди чаз рехъ ганачир.

¹⁹Чи Ребби Исадин вилик Ам хкведай юкъуз чи умуддин, чи шадвилин, чи тарифрин таж куьнни жедачни кьван?!

²⁰Вучиз лагьайтӀа куьн чи баркалла ва шадвал я!