Read Lezgi New Testament – ЦӀийи Икьрар 1-Саланиквийриз 3 Bible Online

1-Саланиквийриз 3 - Lezgi New Testament – ЦӀийи Икьрар bible

1-Саланиквийриз 3

¹Чавай квехъ галаз чаравал мад эхиз техъжезмайла, чна Афинайра текдиз амукьун кьетӀна,

²ва чи стха ТӀиматӀей чна куь патав ракъурна. Ада чахъ галаз Месигьдин Шад Хабардикай муштулухар гуз санал кӀвалахзава. Квекай садни и четинвилерин завалда кьве рикӀин тежедайвал авун, иманда куьн мягькем ва кӀубан авун чна адал тапшуругъ авунай. Четинвилер, лагьайтӀа, чи кьадар-кьисмет я, и кар квез чизва.

⁴Квехъ галайла, чун дарвилера туникай чна лагьанай. Квез чизвайвал, гьакӀ хьунни авуна.

⁵Гьа и себебдалди, мад завайни эхиз техъжезмайла, квехъ авай иман чирун патал, иблисди куьн рекьяй акъуднаватӀа ва чи зегьмет гьаваянди хьанватӀа чирун патал за ТӀиматӀей ракъурна.

⁶Амма гила ТӀиматӀея, куь патавай хтайла, куь имандикай ва муьгьуьббатдикай хъсан хабарар гъана. Ада чаз куьне датӀана шадвилелди чун рикӀел хкизвайдакай ва, гьикӀ чаз куьн акваз кӀанзаватӀа, гьакӀ квезни чун акваз кӀанзавайдакай ихтилатна.

⁷Гьавиляй чи вири дарвилера ва четинвилера, стхаяр-вахар, куьн ва куь иман чун патал кӀубанардай чӀехи къуват хьана.

⁸ГьикӀ лагьайтӀа, куьн Реббидихъ ийизвай имандал мягькемдиз акъвазнаватӀа, чални гьавиляй гила чан атанва.

⁹Куьне чаз гайи вири шадвиляй чна чи Аллагьдив разивал гьикӀ агакьар хъийин?

¹⁰Квехъ галаз сад садал гьалтун патахъай ва, куь иманда вуч бес жезвачтӀа, гьам алава хъувун патахъай чка юкъузни йифиз дуьаяр ийизва.

¹¹Къуй Аллагьди, чи Бубади ва чи Ребби Исади Вичи чи рехъ куь патахъди элкъуьррай!

¹²Къуй Реббиди, гьикӀ Ада чун квехъди муьгьуьббатдив ацӀурнатӀа, гьа саягъда куьн сад садахъди ва вири инсанрихъди муьгьуьббатдив артухдаказ ацӀуррай!

¹³Ребби Иса Вичин вири пакбур галаз хкведайла, чи Аллагьдин ва Бубадин вилик куьн рехне квачирбур ва Адан кар давамарзавайбур хьун патал, къуй Ада куь рикӀер мягькем авурай. Амин.