Read Lezgi New Testament – ЦӀийи Икьрар 1-Саланиквийриз 4 Bible Online

1-Саланиквийриз 4 - Lezgi New Testament – ЦӀийи Икьрар bible

1-Саланиквийриз 4

¹Эхирни, стхаяр-вахар, куьн Ребби Иса Месигьдиз талукьбур тирвиляй, чна квевай гзаф тӀалабзава: куьне чна квез чирайвал уьмуьр твах. Гьа ихьтинбур яз куьн Аллагьдиз кӀан жеда. Куьне гьакӀ уьмуьр тухузва, амма гьадалайни хъсандиз жедайвал ая.

²Ребби Исадилай чна квез гьихьтин несигьатар ганатӀа, куь рикӀел алама.

³Аллагьдиз куьн пак хьана кӀанзава. И кар патал куьне куьн явавиликай хуьх;

⁴квекай гьар сада паквилелди ва лайих хвена куь бедендал агъавал ая.

⁵Аллагь течидай халкьари ийизвайвал, куьн гьашервилин гьевесдин кьенерда гьатмир.

⁶И карда садани вичин стхадиз писвал тавурай ва ам алцурар тавурай. Ихьтин гунагьрай инсандиз Аллагьди бала гуда, и кардикай чна квез виликамаз лугьунни авунай.

⁷ГьикӀ лагьайтӀа, Аллагьди чаз мурдарвилихъ ваъ, пак уьмуьрдихъ эвер ганва.

⁸Гьавиляй ни и эвер гун кьабулзавачтӀа, ада инсан ваъ, Вичин Пак Руьгь квез гузвай Аллагь кьабулзавач.

⁹Стхавилин кӀанивиликай квез кхьинин лазимвал авач, гьикӀ лагьайтӀа квез Аллагьди садаз сад кӀан жез чирна.

¹⁰Квез МакӀеданда авай вири стхаяр кӀанзавайди чаз чизва. Чаз квевай кӀанзавайди квехъ муьгьуьббатда мадни гзаф агалкьунар хьун я.

¹¹Куь уьмуьрда иман гвачирбурун патай гьуьрмет къачун патал ва квез са куьникайни дарвал тахьун патал, чна квез виликдайни лагьайвал, гьар сада жуван кар ийиз ва жуван гъилералди кӀвалахиз, намус гваз уьмуьр тухуз алахъа.

¹³Стхаяр-вахар! Умуд авачир иман гвачирбуру кьейибурухъ хажалат чӀугвазвайвал, куьнени абурухъ хажалат чӀугун тавун патал, кьейибурукай чаз куьн са хабарни авачиз таз кӀанзавач.

¹⁴Чун чӀалахъ я хьи, Иса кьена ва Адал чан хтана, ва гьавиляй Исадихъ ийизвай иман гваз кьейибурни Аллагьди Исадихъ галаз санал Вичин патав хутахдайдахъ чун чӀалахъ я.

¹⁵Реббиди Вичи чаз лагьана, чнани квез лугьузва: чаз, Ребби къведай чӀавуз чан аламукьдайбуруз, кьенвайбурулай са артуханвални жедач.

¹⁶Вучиз лагьайтӀа къати эверди, кьилин малаикдин ванци ва Аллагьдин къаргъуди ван ийидай чӀавуз цаварилай Ребби Вич эвичӀда, ва Месигьдихъ ийизвай иман гваз кьейибурал сифте чан хкведа.

¹⁷Ахпа чунни, яни чан аламукьайбур, абурухъ галаз санал, гьавада Реббидин къаншардиз фин патал цавун циферал хкажда, гьа чӀавалай чун датӀана Реббидин патав жеда.

¹⁸Гьавиляй и гафаралди сада садак руьгь кутур.