Read Lezgi New Testament – ЦӀийи Икьрар 1-Саланиквийриз 5 Bible Online

1-Саланиквийриз 5 - Lezgi New Testament – ЦӀийи Икьрар bible

1-Саланиквийриз 5

¹Стхаяр-вахар, чаз йисарикайни йикъарикай рахунин лазимвал авач.

²Квез и кар кьетӀидаказ чизва хьи, Ребби къведай югъ хабарни авачиз, йифиз угъри хьиз, атана алукьда.

³Инсанар «ислягьвал ва хата галачир саламатвал» лугьуз жеда, амма абурув, руфунал залан папаз аял хадайла тӀарвилер жедай саягъда, садлагьана бала агакьда, а чӀавуз садни катдач.

⁴Амма, стхаяр-вахар, а югъ квел, угъри хьиз, садлагьана туьш жедайвал, куьн мичӀи авамвиле авач.

⁵Куьн вири экуьнинни йикъан рухваяр я эхир. Чун йифиз ва я мичӀивилиз талукь туш,

⁶гьавиляй ша, чун, масадбур хьиз, ксун тийин, чун уях жен ва кьил кьилеллаз жен.

⁷Ксузвайбур йифиз ксузва, хъвазвайбуруни йифиз хъивегьзава.

⁸Гьавиляй, чун йикъаз талукьбур тирла, ша чун кьил кьилеллаз, имандинни муьгьуьббатдин кьеркь жувал алукӀнаваз, кьилелни хилас хьунихъ умуддин ракьун бармак алаз амукьин.

⁹ГьикӀ лагьайтӀа Аллагьди чун хъел патал ваъ, чи Ребби Иса Месигьдилай чав агакьзавай хиласвал патал тайинарнавайди я.

¹⁰А юкъуз чун кьейибурун ва я чан алайбурун арада хьайитӀани-тахьайтӀани, чна Вичихъ галаз санал уьмуьр тухун патал, Ада чун патал чан гана.

¹¹Гьавиляй сада сад кӀубан ва мягькем ийиз хьухь.

¹²Чна квевай тӀалабзава, стхаяр-вахар: ни куь арада зегьмет чӀугвазватӀа, ни куь кӀватӀалда Иса Месигьдалди регьбервал ийизватӀа ва квез несигьатар гузватӀа, гьабуруз гьуьрмет ая.

¹³Абуру ийизвай кӀвалахдай абуруз гзаф майил къалура. Сад садахъ галаз тукӀвена хьухь.

¹⁴Чна квез тагькимзава, стхаяр-вахар: кӀвалахиз кӀан тийизвайбур чӀалал гъваш, кичӀебур кӀубан ая; зайифбуруз куьмек це, виридахъ галаз сабур гваз хьухь.

¹⁵Килиг, садани садазни писвиляй писвал тахъвурай, амма сад садахъ галаз ва вирибурухъ галаз датӀана дугъри жез алахъа.

¹⁶ДатӀана шад хьухь,

¹⁷датӀана дуьаяр ая,

¹⁸гьихьтин гьалара хьайитӀани Аллагьдиз шукур ая, вучиз лагьайтӀа Иса Месигьдихъ галай куьн патал Аллагьдин къаст гьахьтинди я.

¹⁹Руьгь туьхуьрмир,

²⁰пайгъамбаррин гафар кьулухъди ийимир,

²¹амма виридай кьил акъуд ва хъсанвилин пад яхъ.

²²Гьар жуьредин писвиликай кьил къакъуд.

²³Гьа икӀ, куь чан, куь руьгь ва беден рехне квачиз чи Ребби Иса Месигь къведалди сагъдиз амукьун патал къуй ислягьвал гузвай Аллагьди Вичи куьн тамамдиз пак авурай.

²⁴Квез Вичин рекьиз эверай Аллагь гафунал кӀеви я, гайи гаф Ада кьилиз акъудда.

²⁵Стхаяр-вахар, чи гьакъиндайни дуьаяр ая.

²⁶Пак темендалди вири стхайриз салам це.

²⁷За Аллагьдин вилик квез тагькимзава, и чар вири стхайриз-вахариз кӀела!

²⁸Къуй чи Ребби Иса Месигьдин берекат квехъ галаз хьурай.