Read Lezgi New Testament – ЦӀийи Икьрар 2-Саланиквийриз 1 Bible Online

2-Саланиквийриз 1 - Lezgi New Testament – ЦӀийи Икьрар bible

2-Саланиквийриз 1

¹Павелан, Силаван ва ТӀиматӀеян патай — чи Аллагь Бубадиз ва Ребби Иса Месигьдиз талукь яз Саланикда авай иманийрин кӀватӀалдиз.

²Чи Аллагь Бубадин ва Ребби Иса Месигьдин патай берекат ва саламатвал хьурай квез!

³Чна куьн паталди Аллагьдиз датӀана шукур авун лазим я, стхаяр-вахар, икӀ авун дуьзни я, вучиз лагьайтӀа куь иман мад ва мад гзаф жезва, квехъ садан-садахъ авай муьгьуьббат артух жезва.

⁴Гьавиляй куь пайгарвиликай ва имандикай чун Аллагьдихъ иман ийизвайбурун кӀватӀалра дамахдивди рахазва. Куьне куь иман куьн хурук кутурла эхай кьван вири дарвилера ва бедбахтвилера къалурна.

⁵Им Аллагьди гьахъ-михьивал гваз дуван авунин ва Ада ваз Вичин Пачагьлугъда иштиракзавайвиляй вуна азаб чӀугунин шагьадатнама я.

⁶ГьикӀ лагьайтӀа Аллагь гьахъ-михьи я, квез азабар ийизвайбуруз Ада азабралди жаваб гуда,

⁷амма ахьтин азабар эхай квез чахъ галаз санал Ада секинвал гуда. Аллагь кваз такьур ва чи Ребби Иса Месигьдин Шад Хабар яб тагана амукьай вирибуруз бала гун патал цаварилай цӀун юкьва вай къудрат авай малаикар галаз Иса Месигь атай чӀавуз гьа икӀ жеда.

⁹Абуруз даиман жегьеннемдалди жаза гуда: эбеди яз Реббидивай ва Адан сейли къудратдикай яргъаз ийида.

¹⁰И кар, Ам Вичиз талукьбурун арада машгьур хьун патал ва вири иманийрин патай гьейранвал къачун патал, Ам атай юкъуз жеда. А юкъуз Адаз шукурар ийидайбурун арада куьнни жеда, вучиз лагьайтӀа куьн чна авур шагьидвилихъ агъуна.

¹¹Гьавиляй чна датӀана куьн паталди дуьаяр ийизва. Чи Аллагьди куьн куь везифадиз лайих авайбур яз гьисабрай. Квез ийиз кӀанзавай гьар са хъсан кӀвалах ва имандин кар кьилиз акъудиз Аллагьдин къуватди куьмек гурай.

¹²Чи Ребби Исадин ТӀвар куь куьмекдалди машгьур хьун патал ва куьнни Адан куьмекдалди машгьур хьун патал, чна чи Аллагьдин ва Ребби Иса Месигьдин берекатдив кьурвал дуьаяр ийизва.