Read Lezgi New Testament – ЦӀийи Икьрар 2-Саланиквийриз 2 Bible Online

2-Саланиквийриз 2 - Lezgi New Testament – ЦӀийи Икьрар bible

2-Саланиквийриз 2

¹Чи Ребби Иса Месигь хтуниз ва чун Адан патав кӀватӀуниз талукь крарикай рахайтӀа, чна квевай, стхаяр-вахар, тӀалабзава:

²гьар са куьнин чӀалахъ жез тади къачумир, Реббидин югъ атанва лугьуз пайгъамбарвал ийидай садакайни, хьайи ванцикайни ва я гуя чна кхьенва лугьудай хьтин чарчикайни квек къалабулух акатмир.

³Килиг гьа, куьн садани са жуьредани алцурариз тахьурай: Аллагьдивай къакъат тавунмаз, чалкечир ва терг жедай инсан пайда жедалди а югъ алукьдач.

⁴Ам аллагь тӀвар алай ва пак я лугьузвай гьар са куьниз акси жеда ва вич абурулай вине кьада. Ада гьатта Аллагьдин КӀвале чкани кьада ва вич Аллагь я лугьуда.

⁵За и кардикай, зун куь патав гвайла, квез лагьайди куь рикӀел аламачни мегер?

⁶Гила квез чир хьанва хьи, а касдив адан вахт алукьдалди пайда жез вугун тийиз, куь ам кьуна акъвазарзаватӀа.

⁷Чалкечирвилин чинебан къуват исятда кардик ква, амма сифтени-сифте ам кьуна акъвазарзавайди рекьелай элячӀун лазим я.

⁸Гьа чӀавуз чалкечирди вич къалурда. Амма ам Ребби Исади Вичин нефесдалди, Вич хтуналди терг ийида.

⁹Чалкечир атун иблисдин кар я. Чалкечирди жуьреба-жуьре къуватар, тапан аламатар ва керемат-ишараяр къалурда,

¹⁰инсанар регьятдиз чӀалахъардай гьихьтин хьайитӀани тапарар туькӀуьрда, а инсанар гьакъикъат ва гьадалди хиласвал къачуз кӀан тахьайвиляй телеф жеда.

¹¹Гьавиляй ахьтин инсанриз, абур тапаррихъ агъун патал, гьакъикъатдин чӀалахъ тахьайбур ва таб кьабулайбур айибдайвал Аллагьди абурун кьил акадарда.

¹³Реббидиз кӀани стхаяр-вахар, чна куьн патал датӀана Аллагьдиз шукурна кӀанда, вучиз лагьайтӀа, хиласун патал Ада лап эвелдилай куьн хкянава. Ада куьн Руьгьдалди пак ийизва ва куьне гьакъикъатдихъ иман ийизва.

¹⁴И кардихъ Ада чна Шад Хабардикай гайи муштулухралди квез эвер гана, чи Ребби Иса Месигьдин баркалладик куь пайни акатдайвал авуна.

¹⁵Гьавиляй, стхаяр-вахар, кӀевиз акъваз, чна квез мецелди ва чи чарче аваз гайи адетдиз вафа хьухь.

¹⁶Къуй чи Ребби Иса Месигьди Вичи ва чун кӀан хьайи ва берекатдалди чаз даиман теселлини экуь умуд гайи чи Аллагь Бубади

¹⁷куь рикӀериз сабур гурай, куьн гьар са кардани гафуна мягькем авурай.