Read Lezgi New Testament – ЦӀийи Икьрар 2-Саланиквийриз 3 Bible Online

2-Саланиквийриз 3 - Lezgi New Testament – ЦӀийи Икьрар bible

2-Саланиквийриз 3

¹Эхирдайни, стхаяр-вахар, чна квевай тӀалабзава: Реббидин Гаф фад сейли хьун патал ва квелай алакьдай саягъда виринра гьуьрметдалди кьабулун патал, чун паталди дуьаяр ая.

²Чун алчах ва пис инсанрикай хилас хьурай лугьуз дуьаяр ая: гьикӀ лагьайтӀа виридахъ иман авач.

³Амма Ребби гафунал кӀеви я, Ада чун мягькемарда ва шийирдикай хуьда.

⁴Чун, лагьайтӀа, Реббидалди квехъ агъунва: чна квез вуч лугьузватӀа, гьам куьне кьилиз акъудзава ва мадни акъудда.

⁵Къуй Реббиди куь рикӀер Аллагь кӀан хьунихъ ва Месигь хьиз пайгарди хьунихъ элкъуьррай.

⁶Ребби Иса Месигьдин ТӀварцӀелай чна квевай тӀалабзава, стхаяр-вахар: кар квахьнавай ва куьне чавай кьабулнавай адетдал амал тийиз уьмуьр тухузвай стхайривай-вахайривай яргъаз хьухь,

⁷вучиз лагьайтӀа чна кьунвай рекье хьун гьикьван лазим кар ятӀа, квез чизва. Чна, куь патав гвайла, вахт кар-чӀал авачиз ракъурначир,

⁸я чун чарадан фални хьаначир, аксина, чна, квекай садални пар гьалт тавурай лугьуз, гьалдай фидалди юкъуз-йифиз кӀвалахнай.

⁹Квевай куьмек кӀан жедай тамам ихтияр чаз авайвилизни килиг тавуна, чна гьакӀ авунай, вучиз лагьайтӀа чаз квез чешне къалуриз кӀанзавай.

¹⁰Чун куь патав гвайла, чна квез ихьтин къайда тунай: «Ни кӀвалахдач, гьада недач».

¹¹ЯтӀани квекай бязибуру явакьанвал ийизва, са кӀвалахни ийизвач, амма чарабурун крара кьил твазва лугьуз чаз ванер къвезва.

¹²Иса Месигьдин ТӀварцӀелай чна ахьтинбурувай секиндаказ кӀвалахун ва жуваз недайди гъакъи яз къачун тӀалабзава ва акьул гузва.

¹³Амма, стхаяр-вахар, квез талукь крарикай рахайтӀа, хъсанвилер авунин карда юргъунвал хиве кьамир.

¹⁴Чна квез и чарче къалурнавай крарал са ни ятӀани амал тийиз хьайитӀа, адакай игьтият хьухь. Адаз вичи вич тухузвай тегьердикай регъуь жедайвал, ахьтин касдихъ галаз рафтарвал ийимир.

¹⁵Амма ам душман яз гьисабмир, ам стха хьиз гъавурда тур.

¹⁶Къуй къенивилин чешме тир Реббиди Вичи квез датӀана ва вири крара секинвал гурай. Квехъ виридахъ галаз Ребби хьурай!

¹⁷И салам за, Павела, жуван гъилелди кхьизва, вири чарара за гьа икӀ ийизва, ам а чар за кхьейвилин ишара я.

¹⁸Къуй чи Ребби Иса Месигьдин берекат квехъ виридахъ галаз хьурай!