Read Lezgi New Testament – ЦӀийи Икьрар 1-ТӀиматӀеяз 1 Bible Online

1-ТӀиматӀеяз 1 - Lezgi New Testament – ЦӀийи Икьрар bible

1-ТӀиматӀеяз 1

¹Чи Хиласкар тир Аллагьдин ва чи умуд тир Иса Месигьдин эмирдалди Месигь Исадин илчи хьанвай Павелан патай

²иманда зи гьакъикъи хва тир ТӀиматӀеяз. Аллагь Бубадин патай ва чи Ребби Иса Месигьдин патай берекатар, регьим, саламатвал хьурай ваз.

³МакӀедандиз фидайла, за вавай кьетӀидаказ Эфесда амукьун ва бязи инсанриз маса са куькай ятӀани чирвилер тагурай,

⁴акатай махаризни тухумрин а кьил авачир сиягьриз чпин вахт харж тавурай лугьун тӀалабнай. И карди анжах гьуьжетар арадал гъизва, имандал бине кьунвай Аллагьдин кар кьилиз акъатуниз куьмекзавач.

⁵И тӀалабунин макьсад михьи рикӀяй, дугъри намусдай ва сидкьи галай имандай къвезвай муьгьуьббат я.

⁶Амма бязи инсанар, и крар вири туна, кьуру рахунар ийиз ава.

⁷Абуруз Къанундин муаллимар жез кӀанзава, амма чпи лугьузвай ва кьетӀидаказ тестикьарзавай гафарай чпин кьил акъатзавач.

⁸Дуьздаказ гъиликиз хьайитӀа, Къанун хъсанди жедайди чаз чида.

⁹Чаз гьакӀни чида хьи, Къанун гьахъ-михьибур патал ваъ, ам чӀурзавайбур патал, табий туширбур патал, асибур патал ва гунагькарар патал, са затӀни пак яз такьазвайбур патал ва чалкечирбур патал, чпин бубадин ва я дидедин уьмуьрдал гъил хкажзавайбур патал, ивикъичар[1] патал,

¹⁰явавилиз кьил янавайбур патал, чпи чпиз гъуьл-пабвалзавай итимарни папар патал, инсанар чуьнуьхна лукӀвилиз маса гузвайбур патал, тапрукьар патал, тапан кьинер кьазвайбур патал ва дуьзгуьн тербетдиз аксивалзавайбур патал,

¹¹зал ихтибарнавай шукур Аллагьдин Шад Хабардихъ галаз кьан тийизвай вирибур патал я.

¹²Заз къуватар гайи чи Ребби Иса Месигьдиз за шукур ийизва. Зун виликдай аси, зулумкар ва ягь авачир кас хьунизни килиг тавуна, Ада зун ихтибардиз лайих авайди яз гьисабна ва зи хиве пак везифа туна. Заз регьим авуна, вучиз лагьайтӀа за авур крар жуваз течиз ва имандал алачиз авунай.

¹⁴Амма имандихъ ва Иса Месигьда авай муьгьуьббатдихъ галаз санал чи Реббидин вири девлет галай берекат зав агакьна.

¹⁵И гаф гьакъикъи я ва кьабулуниз лайих я: Иса Месигь и дуьньядиз гунагькарар хиласун патал атанвайди я, абурукай виридалайни чӀуруди зун я.

¹⁶Амма Реббиди заз регьим авуна. Зун, гунагькаррикай виридалайни чӀуруди яз, Иса Месигьдиз Аллагьдин сабур гьихьтин чӀехиди ятӀа, заз къалуриз кӀан хьана. И кар акуна, масадбурни эбеди уьмуьр къачун патал имандал атурай.

¹⁷ГьакӀ тирвиляй къуй даиман Пачагьдиз, рекьин тийидай, таквадай ва сад Аллагьдиз даим яз аферин ва шукур хьурай! Амин.

¹⁸ТӀиматӀей, чан хва, вакай лагьанвай кьван пайгъамбаррин гафар рикӀел алаз за ваз веси ийизва; заз вуна, абурал амал авуна, лайихдаказ женг чӀугуна, жуван иман ва михьи намус хвена кӀанзава. Садбуру ам гадарнава ва нетижада абурун имандин гими хасаратдик акатнава.

²⁰Абурун арада Гьуьменей ва Искендер ава, за абур асивал тийиз чир хьун патал иблисдин ихтиярда тунва.