Read Lezgi New Testament – ЦӀийи Икьрар 1-ТӀиматӀеяз 3 Bible Online

1-ТӀиматӀеяз 3 - Lezgi New Testament – ЦӀийи Икьрар bible

1-ТӀиматӀеяз 3

¹Дуьз лугьузва: инсанди иманийрин кьиле акъвазунихъ ялун тарифдай кар я.

²Кьиле акъваздайди са куьнайни тахсир кутаз тежедай кас хьун, герек, са папан гъуьл жен — сабурни акьул авай, дуьзвал гвай, мугьманар кӀандай, хъсан муаллим,

³хъивегьунал рикӀ алачирди, кикӀин тийидайди, амма инсанрихъ галаз рафтарвиле хъуьтуьлди, хкуькь тийидайди ва пул кӀан тийидайди хьун лазим я.

⁴Ада вичин хизан хъсандиз идара авун лазим я, адахъ аялар хьайитӀа, абур адан чӀалаз килигдайбур ва адаз гьуьрметдайбур хьун герек я.

⁵ГьикӀ лагьайтӀа, са нивай ятӀани вичин хизан кьиле тухуз тахьайтӀа, адавай Аллагьдин иманийрин кӀватӀалдин къайгъу чӀугваз гьикӀ хьурай?

⁶ЦӀийиз имандал атанвайдакай кьиле акъваздайди хьун герек туш: ахьтиндан кьама ял гьатун мумкин я, гьа чӀавуз адак иблисдик тахсир кутур саягъда тахсир кутада.

⁷Адаз туьгьметар татун патал ва ам иблисдин желедиз ават тавун патал адакай иман гвачирбурухъни хъсан фикир хьана кӀанда.

⁸Гьа ихьтин крар шемасризни талукь я: абур гьуьрмет авай, кьве мез авачир, хъивегьунал рикӀ алачир, темягькарвал квачир инсанар хьун лазим я.

⁹Абуру чаз гила ачух хьанвай имандин сирерал михьи намусдивди амал авуна кӀанда.

¹⁰Сифтени-сифте а ксарай кьил акъудна кӀанда. Абуруз акси яз рехне кутаз жедай хьтин са затӀни жагъун тавуртӀа, абуру шемасрин везифаяр кьиле тухурай.

¹¹Папарни гьакӀ гьуьрмет хуьдайбур хьун лазим я, абуру фитнеяр авуна кӀандач, сабур гвайбур ва вири крара ихтибар алайбур хьана кӀанда.

¹²Шемасар тир кас са папан гъуьл хьун лазим я, ада вичин аялар ва кӀвалевайбур хъсандиз идара авуна кӀанда.

¹³Чпин везифаяр хъсандиз тамамарзавайбуру чпиз лайих дережа кьада ва абурувай Иса Месигьдихъ чпин имандикай чеб чпихъ кӀевелай агъунваз рахаз жеда.

¹⁴Мукьвара ви патав атуник за умуд кутазватӀани, и чар за ваз кхьизва.

¹⁵Зун эглеш жез хьайитӀани, гила ваз жув Аллагьдин кӀвале гьикӀ тухвана кӀандатӀа чизва; гьанаг — чан алай Аллагьдин кӀватӀал, гьакъикъатдин даях ва тестикьвал я.

¹⁶Чи имандин сир, са шакни алачиз, чӀехиди я: Ам инсан яз атанай, Руьгьди Ам гьахъ-михьивилиз акъуднай, Ам акунай малаикриз, Адакай хабарнай халкьарин арада, Ам дуьньяда кьабулна иман яз, Ам хкаж хъувунай баркалла алаз.