Read Lezgi New Testament – ЦӀийи Икьрар 1-ТӀиматӀеяз 4 Bible Online

1-ТӀиматӀеяз 4 - Lezgi New Testament – ЦӀийи Икьрар bible

1-ТӀиматӀеяз 4

¹Руьгьди ачухдаказ лугьузва: эхиримжи вахтара бязибуру иман гадарда, тапан руьгьерин ва чӀуру жинеррин тербетрин рехъ кьада.

²Ахьтин тербетар кьве чин алай ва намус квадарнавай тапархъанри гъида.

³Абуру инсанриз некягьдик экечӀун, иманийри ва гьакъикъат чидайбуру шукур ийиз тӀуьн патал Аллагьди арадал гъанвай жуьреба-жуьре тӀуьнар къадагъа ийизва.

⁴Аллагьди халкьнавай вири затӀар хъсанбур я, шукур гваз кьабулзавай затӀар инкар авуна виже къведач,

⁵вучиз лагьайтӀа абур Аллагьдин Гафунивди ва дуьадалди пак ийизва.

⁶Вуна и кар стхайринни вахарин рикӀел гъиз хьайитӀа, Иса Месигь патал вакай имандин гафар кужумзавай ва вуна кьунвай дуьзгуьн тербет гвай хъсан ибадаткар жеда.

⁷Къарийри хьрак ийидай хьтин кьуру ихтилатрик кьил кутамир, жуван муъминвал лигим ая.

⁸Бедендин акъажунрихъни тайин тир хийир ава, муъминвилихъ, лагьайтӀа, вири патарихъай хийир ава, ада и дуьньядани, атӀа дуьньядани уьмуьр хиве кьазва.

⁹И гаф гьакъикъи я ва кьабулуниз лайих я.

¹⁰Гьа и кар паталди чна зегьметни къачузва, женгни чӀугвазва, адахъди гьерекатни ийизва, вучиз лагьайтӀа вири инсанар, иллаки Вичин иманияр Хиласкар тир чан алай Аллагьдик чна умуд кутунва.

¹¹И кардихъ инсанриз эвер це, и кар абуруз чир ая.

¹²Садавни жуваз, вун жегьил я лагьана, кваз такьадай жуьреда килигиз тамир. Амма жуван рахунра, уьмуьрда, муьгьуьббатда, иманда ва михьивиле иманияр патал чешне хьухь.

¹³Зун къведалди кӀелунал, вязинал, муаллимвилел алахъа.

¹⁴Пайгъамбаррин гафарин куьмекдалди ва иманийрин кӀватӀалдин кьилевайбуру гъилер эцигуналди ваз ганвай пай инкар мийир.

¹⁵И ибадатар ийидайла, гьакъисагъ хьухь, виридаз вун вилик финиф аквадайвал, жува жув тамамвилелди ибадатдиз бахш ая.

¹⁶Жувахъ ва вуна гузвай тербетдихъ гелкъуьгъ, гьа рехъ гваз амукь. Вуна акӀ ийиз хьайитӀа, вуна жувни, ваз яб гузвайбурни хиласда.