Read Lezgi New Testament – ЦӀийи Икьрар 1-ТӀиматӀеяз 5 Bible Online

1-ТӀиматӀеяз 5 - Lezgi New Testament – ЦӀийи Икьрар bible

1-ТӀиматӀеяз 5

¹Кьуьзуь итимдиз векъи туьгьметар ийимир, жуван буба вуна гьикӀ чӀалал гъидатӀа, ам гьа саягъда чӀалал гъваш. Жегьил гадайрихъ галаз стха хьиз хьухь.

²Яш хьанвай папарив дидейрив хьиз, жегьил папаривни михьивилелди, вахарив хьиз эгечӀ.

³Гьакъикъатда чпиз куьмекдай са касни авачир хендедайрин къайгъу чӀугу.

⁴Хендедадихъ аялар ва я хтулар аватӀа, къуй абуру сифте нубатда чпин хизандиз талукь къайгъуяр ийиз ва чпин дидейринни бадейрин бурж вахгуз чир авурай. И кар Аллагьдиз хуш я.

⁵Ялгъуздаказ амукьнавай халисан хендедади Аллагьдик умуд кутада ва Адаз юкъуз-йифиз тӀалабунар ва дуьаяр ийида.

⁶Амма хендеда яз амукьай папа вичин кеф патал уьмуьр тухузватӀа, ам чан аламаз кьенвайдай кьуртӀа жеда.

⁷Са жуьрединни туьгьметар тахьун патал, винидихъ лагьанвай кьван вири крар инсанривай тӀалаб ая.

⁸Ни вичин мукьва-кьилийрин, сифтени-сифте вичин хизандин къайгъу чӀугвазвачтӀа, ам имандикай къерех хьанва ва ам иман гвачирдалайни пис я.

⁹Хендедадин пудкъад йис хьанвачтӀа ва я ада гъуьлуьз ийизвай вафа чӀурнатӀа, ам иманийрин кӀватӀалдин къаюмдик кутуна кӀандач.

¹⁰Ам хъсан крар авурди: аялриз тербия гайиди, мугьманар хуш хьайиди, Аллагьдиз талукьбурун кӀвачер чуьхвейди, четинвиле авайбуруз куьмекайди, вич гьар жуьре хъсан крариз бахш авурди яз малум хьана кӀанда.

¹¹Жегьил хендедаяр ахьтин сиягьда твамир, вучиз лагьайтӀа абурун чандин гьевес квай мурадар Месигьдиз вафа хуьнилай гзаф гуж авайбур хьайи чӀавуз абуруз мад гъуьлуьз хъфиз кӀан жеда

¹²ва чпи эвелдай гайи вяд чӀур авуналди абуру чпел айиб гъида.

¹³Идалайни гъейри, абур кӀвалах тийиз вердиш жезва ва абурук вахт файда авачиз акъудунин, кӀваляй кӀвализ финин, фитнеяр авунин, чарадан крара кьил тунин ва герек авачир гафар лугьунин хесет акатзава.

¹⁴Гьавиляй заз жегьил хендедаяр гъуьлуьз хъфена, абуру аялар хана, кӀвалин-йикъан къайгъуйрал алахъна ва душманриз кьулухъай чӀурукӀа рахадай багьна тагана кӀанзава,

¹⁵вучиз лагьайтӀа абур себеб яз бязи хендедайри чпин иман гадарнава ва иблисдин рехъ кьунва.

¹⁶Иманийрин кӀватӀалди чпиз гьакъикъатда куьмек кӀанзавай хендедайрин къайгъу чӀугун патал, иман гвай папари чпин мукьва-кьили хендедайриз куьмекар гун лазим я. Къуй а хендедайрикай кӀватӀалдиз артухан пар тахьурай.

¹⁷Чпин кӀвалах хъсандиз ийизватӀа, иманийрин кӀватӀалдин кьилевайбур, иллаки вязер ийизвайбур ва чирвилер гузвайбур, кьве къат артухан гьуьрметдиз лайих я.

¹⁸Вучиз лагьайтӀа Каламда лугьузва: «Юг гатазвай яцран сив агалмир» ва: «КӀвалахзавайдаз гьакъи гана кӀанда».

¹⁹Иманийрин кьилевайдак кутазвай тахсир, кьвед ва я пуд шагьид авачиз хьайитӀа, кьабулмир.

²⁰Масадбурузни кичӀе хьун патал, гунагьар ийизвайбурун крар виридан вилик ачухдаказ винел акъуд.

²¹За Аллагьдин вилик, Иса Месигьдин вилик ва хкянавай малаикрин вилик вавай кьетӀидаказ тӀалабзава: и тагькимар кьиле твах ва абурал, гьакъикъат течиз ийизвай фикир къерех авуна ва садни муькуьбурулай артухди яз такьуна, амал ая.

²²Кьилел кьве кап эцигна садни тадидаказ кӀватӀалдин чӀехиди яз тайинармир. Адан гунагьрин жаваб ви хиве гьат тавурай. Жув михьидаказ хуьх.

²³За ваз неинки са яд хъун, гьакӀни, ви хуьрекдин кӀвал ва мукьвал-мукьвал жезвай ви кефияр тахьун себеб яз, са тӀимил чехирни хъухъ лугьузва.

²⁴Бязи инсанрин гунагьар гьеле дуван тавунмаз виле акьада, амма масабурун гунагьар са кьадар геж чир жеда.

²⁵И къайда хъсан краризни хас я: са бязи хъсан крар гьасятда аквада, муькуьбур геж ашкара жеда.