Read Lezgi New Testament – ЦӀийи Икьрар 1-ТӀиматӀеяз 6 Bible Online

1-ТӀиматӀеяз 6 - Lezgi New Testament – ЦӀийи Икьрар bible

1-ТӀиматӀеяз 6

¹Я Аллагьдин ТӀварцӀикай, я чи тербетдакай пис гафар талгьудайвал, лукӀвилин зулумдик квайбур къуй чпин иесийрив гьуьрметдалди эгечӀрай.

²Иесияр имандал алай лукӀарини, абур чпин стхаяр хьунал бине кьаз, абуруз ийизвай лайих гьуьрмет тӀимилди тахьурай. Аксина, абуру виликдай авурдалайни хъсандиз къуллугъун лазим я, вучиз лагьайтӀа абуру низ къуллугъзаватӀа, гьабур вафа тир ва кӀани стхаяр я. И кар вуна инсанриз чирна кӀанда ва идахъ эвер гана кӀанда.

³Са ни ятӀани маса жуьредин чирвал гуз ва ам Иса Месигьдин несигьатрихъ ва муъминбуруз кӀвал-югъ гьикӀ тухвана кӀандатӀа чирзавай тербетдихъ галаз рази туш.

⁴Ахьтиндан кьама ял ава, ам са куьнин гъавурдани авач. Адахъ авайди анжах гьуьжетар ийиз ва кар-чӀал авачиз кьуру рахунар ийиз кӀан хьунин зарар квай ният я, и карди пехилвал, чуьруькар, асивал, чӀуру гиманар

⁵ва гьакъикъатдивай яргъа тир ява акьул авай инсанрин арада датӀана сад садав такьурвал арадал гъида: ахьтинбуру муъминвал анжах регьят къазанжи къачудай рехъ я лугьуз фикирзава.

⁶Амма авайдал рази яз муъмин хьун чӀехи къазанжи я.

⁷ГьикӀ лагьайтӀа и дуьньядиз чна жувахъ галаз са затӀни гъанач ва инай са затӀни жувахъ галаз хутахиз жедач.

⁸Чахъ недайдини партал аватӀа, чун рази хьун лазим я.

⁹Девлет гзаф хьунихъ ялзавайбур темягьда гьатда, абур ахмакь ва хата гвай ниятрин желедиз аватда, а ниятри инсанар бедбахтвилинни кьиникьин деринда твада.

¹⁰Пул кӀан хьун — им вири жуьредин писвилерин дувул я. Пул кӀан хьуни имандивай къакъудай ва чпи чеб азиятра тур инсанарни гзаф ава.

¹¹Вун лагьайтӀа, ТӀиматӀей, Аллагьдин инсан я, ва гьавиляй вуна вири ихьтин крарикай кьил къакъуд. Гьахъ-михьивилихъ, муъминвилихъ, имандихъ, муьгьуьббатдихъ, сабурдихъ, инсанрихъ галаз рафтарвиле хъуьтуьлвилихъ яла.

¹²Вири четинвилерихъ галаз иман хвена женг чӀугу ва ви хиве тунвай эбеди уьмуьрдин пад яхъ, гьикӀ лагьайтӀа гзаф шагьидрин вилик вуна ви имандикай лайихвилелди ва ачухдиз лагьанай.

¹³Виридаз уьмуьр гузвай Аллагьдин ва рикӀе авайди кьетӀидаказ ПунтӀи ПилатӀан вилик лагьай Иса Месигьдин вилик за ваз лугьузва:

¹⁴ваз Аллагьди вуч тагькимзаватӀа, гьам гьакъикъидаказ ва туьгьмет къачун тавуна, та чи Ребби Иса Месигь хкведалди, кьилиз акъуд.

¹⁵Шукур авуниз лайих тир ва сад тир Падишагьди, пачагьрин Пачагьди ва агъавалзавайбурун Агъади, инсанрикай садазни такур ва таквадай, агакь тийир экуьна уьмуьр тухузвай авай-авачир Рекьин тийирда вичин вахтунда а пайда хьунухь къалурда. Гьуьрметни къудратвал даим яз талукь хьуй Гьадаз! Амин.

¹⁷И чилел алай уьмуьрда девлет авайбуруз дамах акат тавун патал ва чпин девлетдик умуд кутун тавун патал тагьким ая: девлет умуд кутаз жери затӀ туш. Абуру Аллагьдик умуд кутурай. Ада чна уьмуьрдикай лезет хкудун патал чаз лазим тирдалайни гзаф гузва.

¹⁸Абурувай хъсанвал авун, дугъри краралди девлет кӀватӀун, гъилин ахъавал авун ва жуван девлетдикай амайбурузни пай гун кӀан хьухь.

¹⁹Гьа икӀ абуру чпин гележегдин бине жедай хазинаяр кӀватӀда ва гьакъикъи уьмуьр къачузва.

²⁰ТӀиматӀей, вал ихтибарнавайди хуьх. Аллагьдикай яргъа, кьел квачир, гафарал ва чпиз чирвилер я лугьузвай тапаррикай ийизвай гьуьжетрал алахъмир.

²¹Гьа ихьтин тапан чирвилер кьабулна масабурузни гуз хьайи са бязибур имандикай къерех хьана. Къуй берекат квехъ галаз хьурай.