Read Lezgi New Testament – ЦӀийи Икьрар 2-ТӀиматӀеяз 2 Bible Online

2-ТӀиматӀеяз 2 - Lezgi New Testament – ЦӀийи Икьрар bible

2-ТӀиматӀеяз 2

¹Гьа икӀ, зи хва, Иса Месигьдилай къвезвай берекатда къуват аваз хьухь.

²Завай ваз мукьвал-мукьвал жуьреба-жуьре гьалара чир хьайи шагьидвилер вафа тир ва алакьунар авай ксарал ихтибар ая. Абуру чпин нубатда масабуруз чиррай.

³Иса Месигьдин дугъри аскерди хьиз азабрикай жуван пай къачу.

⁴Са аскердини вич кӀвалин-йикъан крарихъ галаз алакъада твадач, ам патал кьилинди вичин чӀехидаз кӀандайвал авун я;

⁵я са пагьливандивайни, ада акъажунрин къайдаяр чӀуриз хьайитӀа, савкьват къачуз жедач.

⁶Майвайрин пай сифте нубатда чуьлда зегьмет чӀугвазвай лежберди къачун лазим я.

⁷За вуч лугьузватӀа, фагьум ая, адан гъавурда акьаз ваз Реббиди вири крара куьмек гуда.

⁸За гъайи Шад Хабарда лугьузвайвал, Давудан тухумдикай тир ва кьена чан хтай Иса Месигь рикӀел хуьх.

⁹Гьа Шад Хабардин паталай за азабар чӀугвазва, гьадаз килигна зун гьатта, тахсиркар хьиз, зунжурра тунва. Амма Аллагьдин Гаф зунжуррани тваз хьун мумкин туш!

¹⁰Гьавиляй хкягъайбурун хатурдай за вири эхзава. Абуру лагьайтӀа, Иса Месигьдалди жедай хиласвал даиман баркалладихъ галаз къачудайвал ийизва.

¹¹И гафар гьакъикъибур я: Чун Адахъ галаз кьенатӀа, Адахъ галаз уьмуьрни тухуда чна.

¹²Чна эхзаватӀа, Адахъ галаз пачагьвални ийида. Чна Ам жувакай атӀайтӀа, Адани чун атӀуда.

¹³Чун Адаз вафа ятӀа, гьикӀ хьайитӀани Ам вафа гваз амукьда, куьз лагьайтӀа Адавай Вичикай Вич атӀуз жедач.

¹⁴Им вафа хуьзвай гьа ксарин рикӀел хкиз хьухь. Абуруз Аллагьдин вилик кӀевелай лагь хьи, гафара тӀуб экъуьрунал[1] алахъ тавурай. И кар хийир гъидайди туш, ада яб гузвайбуруз анжах зиян гуда.

¹⁵Жув гьакъикъатдин гаф дуьздаказ агакьарзавай, регъуь жедай хьтин крар тавунвай синагърай акъатнавай инсан яз, кӀвалахдай кас яз Аллагьдиз къалуриз алахъа.

¹⁶Аси ва кьуру рахунрикай кьил къакъуда, вучиз лагьайтӀа ахьтин крар ийизвайбур Аллагьдивай мад ва мад яргъаз къакъатзава.

¹⁷Ахьтин ксари гузвай тербет ирин хьиз чкӀида. Абурун арадиз Гьуьменейни ФилитӀ аватнава.

¹⁸Абур, кьейибурал чан хтана алатнавайди я лугьуз ва идалди бязи инсанрин иман чӀуриз, гьакъикъатдивай яргъаз къакъатнава.

¹⁹Амма Аллагьди эцигнавай мягькем бине чукӀуриз жериди туш. Адал ихьтин кхьинар алай муьгьуьр ала: «Реббидиз Вичинбур чизва» ва: «Реббидин ТӀвар кьазвай гьар сад писвиликай къерех хьун лазим я».

²⁰Гьар са чӀехи кӀвале тек са къизилдинни гимишдин къапар ваъ, гьакӀни кӀарасдинни хъенчӀинбур ава. Са къапунихъ гьуьрмет галай везифа ава, муькуьдахъ — агъуз дережадин.

²¹Инсанди вич вири и писвилерикай михьи авуртӀа, ам гьуьрмет галай везифа авай къаб хьиз, пакдаказ, Иесиди Вичи менфят къачуниз лайих яз гъиликда. Гьа икӀ ада гьар са жуьре хъсан крар ийизва.

²²Жегьилвилиз хас тир акатай айиб ниятрикай кьил къакъуда. Гьахъ-михьивилихъ, имандихъ, муьгьуьббатдихъ ва ислягьвилихъ яла ва и кар Аллагьдихъ рикӀин сидкьидалди элкъвезвайбурухъ галаз санал ая.

²³Ахмакь ва авам гьуьжетрик экечӀмир, абуру чуьруькрал гъидайди ваз чизва.

²⁴Реббидин лукӀра къал-къил авуна кӀандач. Аксина, ам вири ксарив дугъривилелди эгечӀна кӀанда, адалай тербет гуз ва писвал алудиз алакьна кӀанда.

²⁵Ада мидяйриз хъуьтуьлдаказ, Аллагьди абур Вичин рекьел гъунин ва абуру гьакъикъат кьатӀунин умуд аваз, несигьатар гун лазим я.

²⁶Гьа чӀавуз абурун кьилиз акьул хкведа, ва абур чеб есирда кьазвай ва чпив вичин къаст кьилиз акъудиз тазвай иблисдин желедай азад жеда.