Read Lezgi New Testament – ЦӀийи Икьрар 2-ТӀиматӀеяз 3 Bible Online

2-ТӀиматӀеяз 3 - Lezgi New Testament – ЦӀийи Икьрар bible

2-ТӀиматӀеяз 3

¹Чир хьухь, эхиримжи йикъара мишекъат вахт жеда.

²Инсанар гьар сад са вичин менфятдихъ гелкъведа, пулунал рикӀ алайбур, яцӀу гафар гвайбур, дамах гвайбур, асибур, диде-бубайриз яб тагудайбур, чпиз авур хъсанвал чир тежедайбур, са затӀни пак яз такьазвайбур, рикӀ авачирбур, туькӀуьн тийидайбур, буьгьтенар вегьидайбур, чпивай чеб кьаз тежедайбур, инсаф авачирбур жеда, абуруз хъсанвал такӀан жеда,

⁴абур хаинвал ийиз жеда, туьнт жеда, дамах гваз жеда, абуруз Аллагьдивай гзаф лезетар кӀан жеда.

⁵Муъминвал абур патал анжах винел патан къабух жеда, амма абуру муъминвилин гьакъикъи къуват инкар ийида. Ахьтинбурувай кьил къакъуд.

⁶Абурун арада, кӀвалериз физ, гунагьдин пар алай ва акатай гьихьтин хьайитӀани ниятрин-гьевесрин чӀалал фидай, кьиле гар авай папар рекьелай алуддайбурни ава.

⁷А папари датӀана чирвал къачузва ва сакӀани гьакъикъатдин гъавурда акьаз алакьзавач.

⁸ГьикӀ Янисани Ямпереса Мусади лагьай гафариз аксивал авунатӀа, и ксарини гьакӀ гьакъикъатдиз аксивал ийизва. Ибур ява хьанвай, акьулни иман патал виже текъведай инсанар я.

⁹Амма абурун алакьунар яргъал фидач, абурун ахмакьвал, Мусадин мидяйриз хьайивал, винел акъатда.

¹⁰Тербетда, уьмуьр тухунин къайдада, макьсадра, иманда, сабурда, муьгьуьббатда, мягькемвиле, АнтӀиахда, Канида, ЛуьстӀрада зи кьилел атай хурук кутунра ва азабра вуна зи рехъ кьуна. Гьихьтин акьалтӀай пис жуьреда зун хурук кутунар за эхна, амма вирибурукай зун Реббиди хилас авуна.

¹²РикӀивайни Иса Месигьдихъ ийизвай имандихъ галаз туькӀвена уьмуьр тухуз кӀанзавай вири хурук кутада.

¹³Пис ксар ва гьарамзадаяр чпин тапаррин юкьва мад ва мад дериндаказ акӀида ва абуру масадбурни алцурариз жеда.

¹⁴Амма вуна ваз вуч чирнаватӀа, квелди вун алакьарнатӀа, Гьадахъ иман авун давамара, гьикӀ лагьайтӀа ваз ни чирвал ганатӀа, ваз чизва.

¹⁵Ваз лап гъвечӀи чӀавалай Пак Калам чизва, Иса Месигьдихъ ийизвай имандин куьмекдалди ваз хиласвилихъ тухудай акьул гуз абурулай алакьда.

¹⁶Вири Калам Аллагьди нефес гана илгьамда тунва, адакай чирвал гунин-къачунин, чӀуру крар винел акъудунин, дуьз хъувунин, гьахъ-михьивилин несигьат гунин жигьетдай хийир ава.

¹⁷Ада Аллагьдин инсан гьихьтин хьайитӀани хъсан кар кьиле тухуз тамамдиз гьазур жедайвал ийизва.