Read Lezgi New Testament – ЦӀийи Икьрар 2-ТӀиматӀеяз 4 Bible Online

2-ТӀиматӀеяз 4 - Lezgi New Testament – ЦӀийи Икьрар bible

2-ТӀиматӀеяз 4

¹Аллагьдин ва чан алайбурунни кьейибурун гьахъ-дуван ийидай Иса Месигьдин вилик ва Ам Пачагьди хьиз агъавалун патал хкведайвиляй за вавай кьетӀидаказ тӀалабзава:

²Шад Хабардикай муштулух це, къулай чӀавузни, къулай тушир чӀавузни кӀевиз акъваз, туькӀуьр хъия, винел акъуд, кӀубанар ая; гьа и вири крара сабур хуьх ва ибуралди рикӀивай тербет це.

³Вучиз лагьайтӀа инсанри дуьз тербет кьабул тийидай вахт алукьда. Абуру ша лугьуз, чпин япариз хуш жедай гафар лугьудай муаллимриз яб гуда.

⁴Абуру гьакъикъатдиз яб хгудач ва чпи туькӀуьрнавай гафарихъ яб акализ жеда.

⁵Амма вун вири крара кьил кьилеллаз хьухь, четинвилер алуда, жуван кӀвалах ая — Шад Хабардикай муштулух це, жуван ибадат кьилиз акъуд.

⁶Зи уьмуьр, къурбангандал ичӀирзавай затӀ хьиз, алахьна физва, зун атӀа дуьньядиз хъфидай вахт алукьзава.

⁷За хъсандиз женг чӀугунва, жуван рехъ за звериз-звериз атӀанва ва иман хвенва,

⁸исятда зун патал Реббиди, гьахъ-михьи Дуванбегди, Къияматдин юкъуз зав вугудай гьахъ-михьивилин таж гьазурнава, а таж неинки зав, гьакӀни кьарай авачиз Ам атун вилив хуьзвай вирибурув вугуда.

⁹Зи патав фад акъатдайвал ая,

¹⁰вучиз лагьайтӀа Димаса зун гадарнава. Адаз и дуьньядин няметар хъсан яз акуна ва Саланикдиз хъфена; Креск ГалатӀдиз хъфена, ТӀитӀ — Далматдиз.

¹¹Тек са ЛукӀа захъ галаз амукьна. Жувахъ галаз къачуна Маркни гъваш, зи ибадатда ада заз хъсандиз куьмекзава.

¹²Туьхик за Эфесдиз ракъурна.

¹³Зи патав къведайла, тӀалабда, зи абани гъваш, за ам Туругьасда КарпӀав туна, чарчин къаргъуярни яхъ, иллаки кӀелен хамунал кхьенвайбур.

¹⁴Чатухъан Искендера заз гзаф зиян гана. Ада авур крарай Аллагьди Вичи адаз эвез хгуда.

¹⁵Вунни адакай мукъаят хьухь, вучиз лагьайтӀа ам чна лугьузвай гафариз кӀевелай акси жезвай.

¹⁶Сифте яз заз дувандал жува жув хуьдай мумкинвал хьайила, зи пад кьун патал садни атанач, вирида зун гадарна. И кар абурун тахсир яз гьисаб тавурай.

¹⁷Амма Ребби зи патав гвай ва зи куьмекдалди и хабар вири халкьариз ван жедайвал вяз ийиз хьун патал Ада заз къуватар гана. Зун асландин сиве гьатуникай хиласна.

¹⁸Реббиди идалай кьулухъни зун гьар жуьредин шийирдикай хиласда ва Вичин Цаварин Пачагьлугъдиз хутахна хиласда. Адаз эбеди яз шукур хьурай. Амин.

¹⁹ПрискӀадиз ва Акуьлаз, гьакӀни Анисфаран кӀвализ салам лагь.

²⁰ЭрастӀ Каринфда амукьна, азарди кьунвай Тирафим за Милетда туна.

²¹Кьуьд алукьдалди иниз къведайвал ая. Эвбула, ПӀуда, Лина, Клавдади ва вири стхайри ваз саламар лугьузва.

²²Къуй Ребби ви руьгьда аваз хьуй. Къуй Берекат квехъ галаз хьурай.