Read Lezgi New Testament – ЦӀийи Икьрар ТӀитӀаз 1 Bible Online

ТӀитӀаз 1 - Lezgi New Testament – ЦӀийи Икьрар bible

ТӀитӀаз 1

¹Аллагьдин лукӀ, гьакӀни Иса Месигьдин илчи тир, хкягъайбур имандихъ, муъминвилихъ тухузвай ва эбеди уьмуьр хьунин умуд гузвай гьакъикъат кьатӀунал гъун патал ракъурнавай Павелан патай.

²И эбеди уьмуьр садрани таб тийидай Аллагьди гьеле дуьнья халкь ийидалди гуда лагьана хиве кьунай.

³Тайинарнавай вахт алукьайла, Ада Аллагьдин — чи Хиласкардин, — эмирдалди зал ихтибарнавай вязинин куьмекдалди Вичин къастарикай лагьана.

⁴Уртах имандин рекьяй зи халисан хва ТӀитӀаз: Аллагь Бубадин ва чи Хиласкар тир Иса Месигьдин патай берекат ва саламатвал хьурай ваз.

⁵За вун КиритӀдал авиляй тунай хьи, кьил кутунвай кар вуна эхирдал кьван тухун патал ва, за ваз эмир авурвал, гьар шегьерда иманийрин кӀватӀалдин кьиле акъваздайбур тайинарун патал.

⁶Кьиле акъваздай кас айиб квачирди, са папан гъуьл хьунухь лазим я; адан аяларни иманияр хьун, явабур ва яб тагудайбур я лагьай чӀуру тӀвар алачирбур хьун лазим я.

⁷Ам айиб квачирди хьун лазим я, гьикӀ лагьайтӀа ада Аллагьдиз талукь кӀватӀал идара ийизва. Ам кьама ял авайди, хъел акатдайди, хъивегьунихъ ялдайди, кикӀидайди, вил ичӀиди тахьун герек я.

⁸Аксина, ам мугьманрал рикӀ алай, дугъривал кӀандай, акьул авай, гьахъ-михьи, муъмин, вич вичел алай кас хьана кӀанда.

⁹Адавай масадбурузни дуьз тербет тирвал несигьат гуз хьун патал ва адаз аксивалзавайбур инкариз хьун патал вичиз чирнавай гьакъикъи гафуниз ам вафа хьана кӀанда.

¹⁰Иллаки Месигьдин имандал атай чувудрин арада чпел са гьукумни кваз такьадай, кьуру рахунрал алахъдай ва масадбур алцурардай ксар гзаф ава.

¹¹Абур кис хьуниз мажбурна кӀанда, вучиз лагьайтӀа абуру чпин нефсинин темягьриз килигна сагъ хизанар рекьяй акъудзава, абуруз чирна виже текъведай крар чирзава.

¹²Гьатта абурукай сада, абурун хсуси пайгъамбарди лагьанай: «КиритӀвияр датӀана тапархъанар, вагьши гьайванар, темпел руфунбазар я».

¹³Им дуьз шагьидвал я. Гьавиляй абурун иман дуьзди хьун патал абуруз кӀевелай лагь. Къуй абуру чувудри туькӀуьрнавай тапарриз ва гьакъикъатдихъ далу элкъуьрнавай ксарин тагькимриз яб тагурай.

¹⁵Михьибур патал вири михьи жеда, амма чиркин ва иман гвачир инсанар патал михьи са затӀни авач, вучиз лагьайтӀа абурун акьул ва виждан чиркин я.

¹⁶Абуру чпиз Аллагь чида лугьуз малумарзава, амма абуру чпин краралди Адакай кьил къакъудзава. Абур рикӀиз такӀан, чӀалаз килиг тийидайбур ва чпикай хъсан са кар патални хийир авачирбур я.