Read Lezgi New Testament – ЦӀийи Икьрар ТӀитӀаз 2 Bible Online

ТӀитӀаз 2 - Lezgi New Testament – ЦӀийи Икьрар bible

ТӀитӀаз 2

¹Вуна, лагьайтӀа, дуьз тербетдив кьурвал чирвилер гун лазим я.

²Яш хьанвай итимриз чпи чеб дуьз тухуз, гьуьрмет хуьз, акьул артухариз, дуьз иманияр, муьгьуьббат гвайбур ва сабур авайбур жез чир ая.

³Яш хьанвай папаризни чеб имандиз кутугайвал тухун, фитнеяр тавун ва са акьван артух чехир хъун тавун паталай тагьким ая. Абуру жегьил папариз хъсан крар ийиз чирна кӀанда,

⁴Аллагьдин Гафунал леке татун патал, жегьил папариз чпин гъуьлер кӀан хьухь, аялар кӀан хьухь лугьуз, акьул авайбур, ахлакь авайбур, хъсан кайванияр, къени ва чпин гъуьлериз яб гудайбур хьухь лугьуз несигьатар гана кӀанда.

⁶Жегьил итимривай чпивай чеб гъиле кьаз хьун тӀалаба.

⁷Хъсан краралди жува абуруз гьар патахъай чешне къалура. Чакай писдаказ рахадай са багьнани жагъун тавуна, гьар аксина экъечӀдайдаз регъуь жедайвал, ачухдаказ ва дуьздаказ, кутугай ва айиб квачир келимайралди чирвал це.

⁹ЛукӀариз вири крара чпин иесийрин чӀалаз килигиз ва абурун гафунал гаф эциг тийиз чира. Къуй абуру чуьнуьхунар тавурай, чеб далу агалдиз жедай инсанар хьиз тухурай, хийир квайбур хьурай. Идалди виридаз чи Хиласкар тир Аллагьдин тербет иерди тирди аквада.

¹¹ГьикӀ лагьайтӀа вири инсанриз хиласвал гудай Аллагьдин берекат пайда хьанва.

¹²Ада чаз чалкечирвал ва чилин уьмуьрдиз хас гьевесар жував агуд тийиз, и дуьньяда гьахъдаказ ва муъминдаказ, жува жув гъиле кьуналди, бахтавар умуд кьилиз акъатунал — чӀехи Аллагь ва чи Хиласкар Иса Месигь баркалла аваз хтунал вил алаз уьмуьр тухуз чирзава.

¹⁴Чун вири къанунсузвилерикай хиласун патал ва чун михьи авун патал, чун Вичин кьилдинди тир, хъсанвал авунихъ къаних халкь авун патал, Месигьди Вичин чан чун паталди гана.

¹⁵Вуна гьа икӀ масадбуруз чира. Гьукум гъилевай касди хьиз, кӀубанар ая ва чӀурувилер винел акъуд, жуваз садавни гьисаба авачир жуьреда килигиз тамир.