Read Lezgi New Testament – ЦӀийи Икьрар Чувудриз 10 Bible Online

Чувудриз 10 - Lezgi New Testament – ЦӀийи Икьрар bible

Чувудриз 10

¹Мусадин Къанун гележегда инсанриз хьана кӀани берекатар чеб ваъ, анжах абурун хъен я. Гьавиляй Къанундивай датӀана, йисалай йисуз, гьа са къурбандар гун патал къвезвайбур тамамвилиз акъудиз жедач.

²ИкӀ тиртӀа, къурбандар авун акъвазардачирни мегер? Икрам ийизвайбур садра ва эбеди яз михьи жедай, абуру чпин гунагьрай чпик тахсир квайди мад гьисс хъийидачир.

³Амма и къурбандар йисалай-йисуз авуни гунагь рикӀел хкизва,

⁴вучиз лагьайтӀа яцаринни кьунарин ивидивай гунагьар арадай акъудиз жедач.

⁵Гьавиляй, и дуьньядиз гьахьдайла, Месигьди лагьана: «КӀан хьанач Ваз я къурбандар, я савкьватар, амма Вуна Зун паталди гьазурна беден.

⁶Шад ийизвач Вун я кунугрини, я гунагьдай ийизвай къурбандрини.

⁷Гьа чӀавуз За лагьана: „Ингье, Зун къвезва, къаргъуда Закай кхьенвайвал, Ви къаст кьилиз акъудун патал, я Аллагь!“»

⁸Гьа икӀ, Ада винидихъ лагьана: «КӀан хьанач Ваз я къурбандар, я савкьватар, я кунугар, я гунагьдай къурбандарни, абуру вун шад ийизвач». Вири ибур Къанунди кӀевелай тӀалабзавайвилизни килиг тавуна Ада икӀ лагьана.

⁹Ахпа Ада алава хъувуна: «Ингье, Зун къвезва, Ви къаст кьилиз акъудун патал». Ада сад лагьайди къуватдай вегьизва ва кьвед лагьайди къуватда твазва.

¹⁰Иса Месигьди Аллагьдин къаст кьилиз акъудайвиляй чун Адан Беден къурбанд авуналди садра ва эбеди яз пак авунва.

¹¹Гьар са хахамди, гунагьар арадай акъудиз тежедай гьа сад хьтин къурбандар мад ва мад ийиз, йикъай юкъуз вичин везифаяр кьилиз акъудзава.

¹²И Кьилин хахамди, лагьайтӀа, гунагьрай тек са къурбанд авуна ва Ам эбеди яз Аллагьдин эрчӀи гъилихъай ацукьна.

¹³Гьа чӀавалай инихъди Ада Вичин душманар Вичин кӀвачерик вегьидай сят вилив хуьзва.

¹⁴Пак ийизвайбур Ада са къурбанддалди даим яз тамамвилив агакьарна.

¹⁵Идан гьакъиндай чаз Пак Руьгьдини шагьидвалзава. Эвелдай Ада лугьузва:

¹⁶«За гележегда абурухъ галаз ахьтин Икьрар кутӀунда хьи, — лугьузва Реббиди, — Зи Къанунар За абурун рикӀера твада ва абурун бейнида кхьида» .

¹⁷Ахпа Ада алава хъийизва: «Абурун гунагьар ва абурун Къанун чӀурунар За мад рикӀел хкидач» .

¹⁸Гунагьдилай гъил къахчур чӀавуз гунагьдай къурбанд гунин лазимвал мад амукьзавач.

¹⁹Стхаяр-вахар, Исадин Иви себеб яз чавай гила Паквилерин Пак чкадиз викӀегьдиз гьахьиз жеда.

²⁰Ада чаз пердедай[3] фидай цӀийи ва уьмуьр гудай рехъ ахъайна. И кар Ада Вичин Беден къурбанд гуналди авуна.

²¹Ва чаз Аллагьдин кӀвалин кьиле акъвазнавай Кьилин хахам ава.

²²ГьакӀ хьайила, ша чун халисан рикӀер гваз, имандив ацӀанваз, иви хъичир авуналди рикӀер рехне квай виждандикай михьи авуна ва беденар михьи цяй чуьхвена, Аллагьдиз мукьва жен.

²³Ша чна умуд гузвай имандикай шагьидвал авун ян тагана кьан, вучиз лагьайтӀа чаз гаф Гайиди гьакъикъи я.

²⁴Ша чун сад садав дикъетдивди эгечӀин, сада садаз муьгьуьббатдив ацӀуз ва дугъри крар ийиз кӀан жедайвал ийин.

²⁵Са бязибуруз хесет хьанвайвал, чна чи кӀватӀ хьунухьар гадар тийин. Аллагьдин югъ мукьва жезвайди аквазвай чӀавуз сада сад мад ва мад кӀубанар ийин.

²⁶Вучиз лагьайтӀа, чна, гьакъикъат кьатӀана, чиз-чиз гунагьар авун давамарайтӀа, мад са къурбанддивайни и гунагьрилай гъил къахчудайвал ийиз жедач.

²⁷Ихьтин дуьшуьшда чаз амукьзавайди дувандал ва Аллагьдин душманар недай пехъи цӀал кичӀела вил алаз акъвазун я.

²⁸Мусадин Къанундилай кам вегьейди кьве ва я пуд шагьиддин гафарикай даях кьуналди са инсафни тавуна кьиникьиз акъуддай.

²⁹АкӀ хьайила, куь фикирдалди, Аллагьдин Хциз кӀур гузвайди, вич Икьрардин Ивиди пак авунатӀани, а иви са квяйни такьазвайди ва берекатдин Руьгь русвагьзавайди гьикьван кӀеви жазадиз лайих я?

³⁰Чаз Ам чизва, Ни икӀ лагьанатӀа: «Кьисас Зи Гъиле ава, За эвез хгуда» ва мадни: «Реббиди Вичин халкьдин дуван ийида».

³¹Чан алай Аллагьдин Гъиле гьатун кичӀе жедай кар я!

³²Куьн имандал атайдалай гуьгъуьниз куьне залан азабриз дурум гайи виликан йикъар рикӀел хкваш.

³³Квекай садбур хъуьруьнриз вегьидай ва куь геле къекъведай, амма квекай муькуьбур гьахьтин азабар эхзавайбурухъ галаз къуьн-къуьневаз акъваздай.

³⁴Куьне зинданра авайбурун язух чӀугвадай; куь эменни къахчур чӀавара куьн гьатта шадни жедай, вучиз лагьайтӀа квез квехъ лап хъсан, эбеди эменни авай чӀал чизвай.

³⁵ВикӀегьвал квадармир, и кардай квез жумарт савкьват гуда.

³⁶Аллагьдин къаст кьилиз акъудайла, Ада квез хиве кьурди къачун патал, куьн кӀевиз акъвазун герек жеда,

³⁷Каламди кхьенвайвал: «Са кӀусни яргъал алач, гьич яргъал алач, Вич атана лазим Тирди геж тавуна акъатда.

³⁸Зи Гьахъ-михьиди имандалди чан алаз жеда, амма Ам Захъ иман авуникай кьулухъ хьайитӀа, жеда Зун Адалай нарази» .

³⁹Амма чун кьулухъ чӀугуна рекьидайбурукай ваъ, имандал атана хиласвал къачузвайбурукай я.