Read Lezgi New Testament – ЦӀийи Икьрар Чувудриз 12 Bible Online

Чувудриз 12 - Lezgi New Testament – ЦӀийи Икьрар bible

Чувудриз 12

¹Гьа икӀ, чун шагьидрин сагъ са гапӀалди, цифеди хьиз, элкъуьрна кьунва! Гьавиляй ша чна жувалай чав катиз вугузвачир вири, гьакӀни чун регьятдиз вичин чилиниз чӀугвазвай гунагь гадарин, чаз зверун патал ганвай рехъ сабурдалди атӀун.

²Вил галуд тавуна Исадиз килигин. Эвелдилай эхирдал кьван чи иман Гьадалай аслу я. Гележегда жедай шадвилин хатурдай Ада хашунал ажал эхи авуна, беябурвал инкарна, исятда Ам Аллагьдин тахтунин эрчӀи къвалахъай ацукьнава.

³Гунагькаррин патай ихьтин душманвал эхи авур Адакай фикир ая, и карди квез руьгьдалди къуватдай ават тийиз ва бедендик чан хьуниз куьмек гуда.

⁴Куьне иви авахьдалди гунагьдихъ галаз гьеле дяве авунвач.

⁵Квез, рухвайриз хьиз, кӀубан авун патал лагьанвай ихьтин гафар куьне рикӀелай алуднава: «Зи хва, инкар ийимир несигьатар Реббидин, такӀан жемир Адан туьгьметни,

⁶гьикӀ лагьайтӀа Реббиди тербет гузва Вичин рикӀ алайдаз, Вичи хва хьиз кьабулзавай гьар сад гатазва» .

⁷Азабар квез гузвай тербиядин са пай яз эхи ая. Аллагь квев рухвайрив хьиз эгечӀзава. Бубади тербет тагай хьтин хва ава жал?

⁸Квез тербет ганвачтӀа (гьар садаз, лагьайтӀа, тербет гузвайди я), куьн халисан рухваяр ваъ, пажар я.

⁹Чахъ виридахъ, чаз тербет гуз хьайи бубаяр и чилел авай, чна абуруз гьуьрметзавай. Чи руьгьерин Бубадиз чун гьикьван гзаф муьтӀуьгъ хьун лазим я, гьикӀ лагьайтӀа и муьтӀуьгъвили чаз уьмуьр гузва!

¹⁰Чи бубайри чаз са кьадар вахтунда чпиз дуьзди яз аквазвай саягъда тербия гуз хьанай, амма Аллагьди, чакай Вичин паквиле иштиракзавайбур хьун патал, чаз хийир хьунин мураддалди тербия гузва.

¹¹Вичин вахтунда гьар гьихьтин хьайитӀани жазади шадарзавач, пашманарзава. Амма чпиз жазадалди тербия гайибурув гуьгъуьнлай гьахъ-михьивилинни саламатвилин майва агакьзава.

¹²ГьакӀ хьайила, куьрс хьанвай гъилер ва зайифвиляй зурзазвай метӀер мягькем ая.

¹³Дуьм-дуьз рекьяй алад, кьецӀивал ийизвайди авайдалайни гзаф набут[4] жедайвал ваъ, мадни сагълам жедайвал ая.

¹⁴Вири инсанрихъ галаз меслятвиле аваз уьмуьр тухуз ва михьибур жез алахъа: иманивал галачиз садазни Ребби аквадач.

¹⁵Килиг гьа, квекай садни Аллагьдин берекатдикай магьрум жедайвал тахьурай, куь арада экъечӀнавай туькьуьл кьачӀуни хьиз, квез садани зиян гудайвал ва а кьачӀуни гзафбур чиркин ийидайвал тахьурай.

¹⁶Килиг гьа, квекай садни Аллагьдикай къакъатдайвал тахьурай, са бади тӀуьнихъ вичин чӀехи стхавилин ихтиярар маса гайи Эсав хьиз, Аллагьдивай яргъа жедайвал тахьурай.

¹⁷Адаз ахпа нуьсрет къачуз кӀан хьайиди, амма ам инкар авурди квез чизва. Ам кӀевиз шехьиз хьанатӀани, авур крарал пашман хьун патал геж хьанвай.

¹⁸Куьн лагьайтӀа, вичик кягъиз хьун мумкин тир ва цӀай кьуна кузвай Синай дагъдин патав, мичӀивилин патав, чӀулаввилин патав ва тӀурфандин патав атанач кьван.

¹⁹Куьн къаргъудин ванцел ва яб гузвайбуруз ван хьайила мад чпиз а гафар лугьумир лугьуз минетзавайбуруз а гафар лугьузвай ванцел атанач кьван.

²⁰Чпиз ганвай ихьтин эмир эхи ийидай такьат инсанриз авачир: «Гьайвандини вич и дагъдик хкӀуртӀа, адаз къван гун лазим я».

²¹Им акьван кичӀ кутадай кар тир хьи, гьатта Мусадини лагьанай: «Зак кичӀевални зурзун акатнава».

²²Ваъ! Куьн Сигьан дагъдин патав, чан алай Аллагьдин шегьердин патав, цаварин Ярусалимдин патав, куьн шад межлисдиз кӀватӀнавай агъзурралди малаикрин патав атана.

²³Куьн чпин тӀварар цаварал кхьенвай сифтегьан аялрин кӀватӀалдиз, куьн Аллагьдин, вири инсанрин Дуванбегдин патав ва тамамвилив агакьнавай гьахъ-михьибурун руьгьерин патав атана.

²⁴Куьн цӀийи Икьрардин арачи тир Исадин патав, Гьабилан ивидилайни хъсандиз рахазвай, хъичирзавай Ивидин патав атана.

²⁵Килиг гьа, квехъ элкъвена рахазвай Аллагь инкар мийир. Чилел рахай Аллагьдиз яб гуникай кьил къакъудайбур чпин жазадикай хкатначтӀа, чун адакай генани хкатдач, цаварай чахъ элкъвена рахазвай Аллагьдин ванциз чна яб тагуз хьайитӀа.

²⁶А чӀавуз Адан ванци чил зурзурзавай, исятдани Ада гаф гузва: «За мад гъилера чил зурзурда, гьакӀ цаварни».

²⁷«Мад гъилера» гафари лугьузва: ян гудай, халкьнавай кьван вири ва вахтуналди тир затӀар квахьда, тек са ян тагудай затӀар амукьда.

²⁸Гьавиляй, ян гунуг мумкин тушир Пачагьлугъ къачуналди, ша чаз авур хъсанвиляй Аллагьдиз шукур ийин ва Адаз хуш жедайвал, гьуьрметдивди ва кичӀ кваз икрамни ийин,

²⁹вучиз лагьайтӀа чи Аллагь — вири туькьуьндай цӀай я.