Read Lezgi New Testament – ЦӀийи Икьрар Чувудриз 13 Bible Online

Чувудриз 13 - Lezgi New Testament – ЦӀийи Икьрар bible

Чувудриз 13

¹ДатӀана садаз сад стхаяр-вахар хьиз кӀан хьухь.

²Мугьманар кӀан хьунухь рикӀелай алудмир: икӀ авуналди, бязибуру, чпизни хабар авачиз, малаикар мугьманвиле кьабулна.

³Зинданра авайбур, гуя куьнни абурухъ галаз къазаматда авай хьиз, рикӀел хуьх ва кьиле твах. Азаб чӀугвазвайбур, гуя куьнени абурухъ галаз азаб чӀугвазвай хьиз, рикӀел хуьх.

⁴Къуй вирида некягьда сад хьунухьиз гьуьрмет авурай ва чпин некягьдик квайбуруз вафа хуьрай. Аллагьди гъуьлуьз ва я папаз вафа хуьзвачир вирибурун ва явавилин тахсир квайбурун дуван аквада.

⁵Пул кӀан хьуникай азад хьухь, квехъ авайдал рази хьухь, вучиз лагьайтӀа Аллагьди лагьана: «За садрани гадардач вун, ви патавай хъфидач» .

⁶Гьавиляй чавай агъунваз лугьуз жеда: «Ребби заз куьмек гузвайди я, са куьникайни кичӀе туш заз. Инсандивай заз вуч ийиз жеда кьван?»

⁷Квез Аллагьдин Гаф чирай куь несигьатдарар рикӀел хуьх, ва, абурун уьмуьрдин къени нетижайриз килигиз, абурун имандилай чешне къачу.

⁸Иса Месигь накьни, къени, гьамишандани гьа Гьам я.

⁹Къуй куьн акатай гьихьтин хьайитӀани патан чирвилери гьакъикъатдивай къакъуд тавурай. РикӀер чеб тӀуьниз талукь яз кхьенвай серенжемралди ваъ (абуру чпел амал авурбуруз хийир гъанач), Аллагьдин берекатдалди мягькем хьайитӀа, хъсан я.

¹⁰Чахъ Гьалтунин Алачухда къуллугъ ийизвайдавай вичелай затӀ недай ихтияр авачир къурбанган ава.

¹¹Кьилин хахамди гьайванрин иви Паквилерин Пак чкадиз тухузва — им гунагьдай къурбанд я, гьайванрин жендекар, лагьайтӀа, кундин сергьятрилай къеце кузва.

¹²Гьавиляй Исадини, Ада Вичин Ивидалди халкь пак авун патал, шегьердин варарилай къеце азабар чӀугунай.

¹³Гьа икӀ ша чунни, Ам акатай русвагьдик чунни акатдайвал, кундилай къецез Адан патав фин.

¹⁴Вучиз лагьайтӀа ина, чилел, чаз шегьер авач, чна гележегдин шегьер вилив хуьзва.

¹⁵Ша Исадин куьмекдалди чна Аллагьдиз Адан ТӀварцӀин тарифзавай пӀузаррай акъатзавай тарифдин къурбанд датӀана гун.

¹⁶Хъсанвал авун ва квехъ авайди муьгьтежвиле авайбурухъ галаз паюн рикӀелай алудмир, — ихьтин къурбандар Аллагьдиз хуш я.

¹⁷Куь несигьатдаррин чӀалаз килиг ва абуруз табий хьухь. Вучиз лагьайтӀа абуру вил алуд тийиз куь къайгъу чӀугвазва, абуру чпин зегьметдин гьакъиндай Аллагьдиз гьахъ-гьисаб авуна кӀанда. Абурувай чпин къуллугъ шаддаказ кьиле тухуз хьун патал суза тийиз алахъа, вучиз лагьайтӀа идакай квез хийир авач.

¹⁸Чи гьакъиндай дуьа ая. Чи виждан михьи тирдахъ чун агъунва ва вири крар дуьздаказ ийиз алахъзава.

¹⁹Завай куь патав фад хквез хьунин гьакъиндай дуьа авун за квевай лапни кьетӀендиз тӀалабзава.

²⁰Къуй Аллагьди, саламатвилин Чешмеди, эбеди Икьрар мягькемарзавай иви себеб яз чи Ребби Исадал — Вичин хиперин чӀехи Чубандал кьейидалай кьулухъ чан Хкайда,

²¹куьн Адан къаст кьилиз акъудун патал къенивиле мягькем авурай. Ада Вичиз кӀани крар ча кьилиз акъудун патал къуй Иса Месигьди куьмек гурай. Асиррилай асирралди Адаз шукур хьурай. Амин.

²²Стхаяр-вахар, за квевай и несигьатдин гафарив сабурдивди эгечӀун кӀевелай тӀалабзава, гьикӀ лагьайтӀа зи чар куьруьди я.

²³Чи стха ТӀиматӀей азад хъувунвайди чир хьухь. Мукьвара ам иниз атайтӀа, за адахъ галаз санал квел кьил чӀугвада.

²⁴Куь вири несигьатдарриз ва Аллагьдиз талукьбуруз саламар. Италдай тир иманийрини квез саламар лугьузва.

²⁵Къуй берекат квехъ виридахъ галаз хьурай.