Read Lezgi New Testament – ЦӀийи Икьрар Чувудриз 4 Bible Online

Чувудриз 4 - Lezgi New Testament – ЦӀийи Икьрар bible

Чувудриз 4

¹Амма гьеле геж туш, Аллагьди Вичин секинвилиз гьахьуникай ганвай гаф къуватда ама. Гьавиляй, ша чна дикъет хуьн, квекай садни и секинвилив агакь тавуна амукь тийидайвал.

²ГьикӀ лагьайтӀа, и гъулгъула гваз къарагъайбуруз хьиз, чазни Шад Хабардикай муштулух ганай, амма и хабарди абуруз са хийирни гъаначир, вучиз лагьайтӀа абуру а хабар иман яз кьабулначир.

³Амма чун, имандал атанвайбур Адан секинвилиз, Аллагьди лагьанвайвал, гьахьда: «Гьавиляй За кьин кьуна, Зун Зи хъиле авайла: Зи секинвилиз гьахьдач абур!» И секинвал дуьнья халкь авур лап эвелдилай авазва,

⁴вучиз лагьайтӀа Ада ирид лагьай йикъакай икӀ лагьанва: «Ирид лагьай юкъуз Аллагьди Вичин вири крарикай секинвиле ял яна».

⁵Амма винидихъ лагьанвай: «Зи секинвилиз гьахьдач абур!»

⁶Гьа икӀ аниз гьахьун бязибурун вилик гьеле кумазма ва виликдай чпиз секинвилиз гьахьуникай муштулух гайибурни аниз, абуру чӀалаз килиг тавун себеб яз, гьахьначир.

⁷Гьавиляй Аллагьди мад гъилера тайин югъ тестикьарна, — «къе». Гзаф вахтар алатайдалай гуьгъуьниз и кардикай, винидихъ гъанвай гафара авайвал, Давудан куьмекдалди хабар ганай: «Къе Адан ван хьайитӀа, терс ийимир рикӀер куь».

⁸Ихтилат абуруз Нунан хва Шуая гайи секинвиликай физвайтӀа, Аллагь и йикъалай гуьгъуьниз къвезвай са гьи ятӀани маса йикъакай мад рахадачир.

⁹Гьавиляй Кишдин секинвал Аллагьдин халкь паталди яз амукьзава.

¹⁰ГьикӀ лагьайтӀа, вуж Аллагьдин секинвилиз гьахьайтӀа, адани вичин зегьметрикай, Аллагьди Вичин зегьметрикай ял ягъайвал, секинвиле ял яда.

¹¹Гьавиляй, а секинвилиз гьахьун патал, чӀалал татунин атӀа чешнедин рехъ кьуна садни пуч тахьун патал, ша чна алакьдай кьван вири ийин.

¹²Аллагьдин Гафунал чан ала ва ам кардик ква, ам кьве мурзни хци гьар са турунилайни хци я ва ам чи асулдин лап деринриз сух жезва, ам руьгьдивни рикӀив, жалгъайрив ва кӀарабдин мефтӀедив агакьзава. Ада рикӀин фикирризни къастариз къимет гузва.

¹³Халкьнавай кьван виридакай са затӀни Адакай чуьнуьх хьанвач. Адан вилик вири чуплах я, Адан вилериз вири аквазва. Чна Адаз чи гьахъ-гьисаб авун лазим я.

¹⁴Чахъ цавар кӀвачелай авунвай кьилинбурукай лап чӀехи хахам ава — Аллагьдин Хва Иса. Гьавиляй ша чна вичелай шагьидвал ийизвай гьакъикъат кӀевиз кьан.

¹⁵Чи Кьилин хахам чи зайифвилера чи рикӀикай хабар такьадайбурукай туш. Чун хьиз, Гьамни, вири краралди синагъ авуна рекьяй акъудиз алахънай, амма Ада гунагь авуначир.

¹⁶Гьавиляй, чав регьим агакьдайвал ва чавай вахтунда къведай куьмекдин берекат къачуз жедайвал, ша чун викӀегьдиз берекатдин тахтуниз мукьва жен.