Read Lezgi New Testament – ЦӀийи Икьрар Чувудриз 9 Bible Online

Чувудриз 9 - Lezgi New Testament – ЦӀийи Икьрар bible

Чувудриз 9

¹Сифтегьан Икьрарда Аллагьдиз икрам авунихъ галаз алакъада авай серенжемар ва чилел пакхана алай.

²Алачух эцигнай, ва адан сад лагьай паюна чирагъган ва Реббидин вилик жедай фар алай экӀягъан авай, и паюниз «Пакди» лугьузвай.

³Кьвед лагьай паюниз «Паквилерин Пакди» лугьузвай ва ам сад лагьай паюнивай пердедалди чара авунвай.

⁴Иер ни галай затӀар кудай, къизил чӀугунвай къурбанган ва вири патарихъай къизилдалди кӀевнавай Икьрардин сандух аниз талукь тир. Сандухда мангьудив ацӀай къизилдин къаб, Гьарунав хьайи цуьк авур лаш ва Икьрардин къванцин къаябар авай.

⁵Сандухдин винелай чӀехи малаикрин кӀалубар — баркалладин яржар алай, абуру вичиз «Гунагьар алудзавай чка» лугьузвай сандухдин къапсахдал лувар экӀянавай. Амма исятда идакай чун галай-галайвал рахадач.

⁶Вири гьа и саягъда туькӀуьр хьайидалай гуьгъуьниз хахамар чпин ибадат авун патал вахт-вахтунда Алачухдин сад лагьай паюниз гьахьзава.

⁷Амма кьвед лагьай паюниз гьахьдай ихтияр йиса са гъилера анжах кьилин хахамдиз ава. Аниз гьахьайла, адав вичин паталай ва халкьди хабар авачиз ахъайнавай гунагьрай гъизвай ивини жедай.

⁸Гьадалди Пак Руьгьди виликан Алачух гьеле кардик кумай кьван гагьда цавараллай Паквилерин Пак чкадиз фидай рехъ гьеле ахъа хьанвачирди къалурзава.

⁹Гьа ина алай вахт паталдини чешне ава: садакьайривайни къурбандривай Аллагьдиз икрам ийизвайдан виждан михьи ийиз ва ам тамамвилихъ гъиз жедач.

¹⁰И серенжемар анжах тӀуьнихъ ва хъунихъ ва чуьхуьн къачунин жуьреба-жуьре адетрихъ галаз алакъада ава. Вири ибур анжах винел патан акунар авай серенжемар я ва абур анжах цӀийи къайда эцигдай вахтуналди къуватда жеда.

¹¹Амма пайда хьайи хъсанвилерин кьилин хахам яз атай Месигь авайдалайни чӀехи ва тамам алачухдиз, инсанрин гъилералди эциг тавунвай, яни и дуьньядиз талукь тушир алачухдиз, гьахьна.

¹²Ам аниз кьунаринни данайрин иви гваз ваъ, Ам Паквилерин Пак чкадиз Вичин Иви гваз, инсанар патал эбеди яз эвезар хгунин мумкинвал къачуз садра ва эбеди яз гьахьна.

¹³Кьунаринни яцарин иви ва гьакӀни канвай дуьгведин руьхъ квай яд хъичир авуни чиркинбур пак, адет паталди михьи хъийизватӀа,

¹⁴Вичи Вич эбеди Руьгьдин къуватда аваз Аллагьдиз са рехнени квачир къурбанд авур Месигьдин Ивиди кьиникьихъ тухузвай крари леке гъанвай чи виждан генани гзаф михьи ийида! Адан Ивиди чаз чан алай Аллагьдиз къуллугъ ийидай мумкинвал гуда!

¹⁵Гьавиляй Месигь, эвернавайбурув чпиз хиве кьунвай эбеди ирс агакьун патал, цӀийи Икьрардин арачи язва. И кар Адан кьиникьи абуру гьеле сифтегьан Икьрардин шартӀара ахъаяй гунагьрилай гъил къахчудайвал авун себеб яз хьана.

¹⁶Веси анжах веси ийизвайдан кьиникь тестикь хьайидалай гуьгъуьниз къуватда гьатзава.

¹⁷Амма веси ийизвайдал гьеле чан аламатӀа, весидихъ са къуватни авач. Веси ийизвайди кьейидалай кьулухъ веси къуватда гьатзава.

¹⁸Гьавиляй сифтегьан Икьрарни иви галачиз тестикь хьанач.

¹⁹ГьикӀ лагьайтӀа Мусади вири халкьдиз Къанундин вири тагькимар лагьайдалай гуьгъуьниз ада, данайринни кьунарин иви къачуна, цик акадарна, аник экуь яру сар ва иссуп набататдин хел кяна, иви ктабдал вичел ва вири халкьдал хъичирна.

²⁰Ада лагьана: «Им Икьрардин иви я, адан шартӀар кьилиз акъудун Аллагьди квевай кӀевелай тӀалабзава».

²¹Ада гьакӀ Алачухдални, Аллагьдиз ибадат авунин карда гъилик жезвай вири затӀарални иви хъичирна.

²²Къанунди саки вирибур ивидалди михьи хьун кӀевелай тӀалабзава, иви авадар тавунмаз гунагьрилай гъил къахчудач.

²³Цавара авайдалай чешне къачуна чилел авунвай кьван вири крар гьа и саягъда михьи хьун лазим я, амма цаваринди ибурулай хъсан къурбандралди михьи хьана кӀанда.

²⁴Месигь инсандин гъилералди авунвай ва вич халисдан анжах хъен-шикил тир чилин пакханадиз ваъ, Ам чи паталай Аллагьдин вилик пайда хьун патал цавариз гьахьна.

²⁵Кьилин хахам гьар йисуз чарадан иви гваз Паквилерин Пак чкадиз гьахьдайвал, Месигь цавариз Вич мад ва мад къурбанд авун патал гьахьнач.

²⁶ИкӀ туширтӀа, Ада дуьнья халкь хьайидалай инихъ эгечӀна гзаф гъилера азабар чӀугун лазим жедай. Амма Ам исятда, эхиримжи вахтара, са гъилера пайда хьана, садра ва эбеди яз гунагь терг авун патал, Ада Вичи Вич къурбанд авуна.

²⁷Гьар са инсандиз садра кьиникь ва ахпа дуван ганвайвал,

²⁸Месигьни, гзаф инсанрин гунагьрилай гъил къахчун патал, садра къурбанд авунай, ва Ам кьвед лагьай гъилера Вичел гунагь къачун патал ваъ, Вич атунал вил алаз акъвазнавайбур хиласун патал къведа.