Read Lezgi New Testament – ЦӀийи Икьрар Якьуб 1 Bible Online

Якьуб 1 - Lezgi New Testament – ЦӀийи Икьрар bible

Якьуб 1

¹Аллагьдин ва Ребби Иса Месигьдин лукӀ Якьубан патай дуьнья тирвал чкӀанвай цӀикьвед тайифадиз хийирар хьурай.

²Стхаяр-вахар, куьн жуьреба-жуьре синагърал ацалтайла, гзаф шад хьухь.

³Квез чизва, куь иман синагъ авуни дурум хьунухь арадал гъизва,

⁴дурум хьунухь лагьайтӀа, квехъ акьван гзаф хьурай хьи, куьн акьулбалугъбур, битавбур ва са жуьрединни нукьсанар квачирбур жедайвал.

⁵Квекай са низ ятӀани камал бес жезвачтӀа, къуй ада ам виридаз, са туьгьметни тийиз, гъил ахъадаказ гузвай Аллагьдивай тӀалабрай — адаз гунни ийида.

⁶Амма тӀалабзавайди, са шакни тавуна, агъурай, вучиз лагьайтӀа шак ийизвайди гару гваз фена чукӀурзавай гьуьлуьн лепедиз ухшар я.

⁷Къуй ахьтин касди Реббидивай са вуч ятӀани къачуда лагьана фикир тавурай.

⁸Ам, вуч ийиз хьайитӀани, вири крара кьве пад язавай, кьве руьгь авай инсан я.

⁹Кесибрин агъуз жергедай тир стхади вичин виниз дережадал дамахрай.

¹⁰Амма девлет авайда вичин агъуз дережадал дамахрай, вучиз лагьайтӀа ам, чуьлдин цуьк хьиз, квахьда.

¹¹Рагъ экъечӀзава ва ада вичин ифиндив набатат кьурурзава, адан цуьк авахьзава, ва вири иервал квахьзава. Девлет авай касни вичин крарин челек-фелекда гьакӀ шуьткьведа.

¹²Синагъдик квайди бахтавар я. Синагъдиз дурум гайила, ада Аллагьди Вич кӀанзавай виридаз гуда лагьана хиве кьур уьмуьрдин таж къачуда.

¹³Темягь тухвана рекьяй акъуддай кардал ацалтайла, лугьуз тахьуй: «Им Аллагьди зи темягь тухуз тазвайди я». Писвиливай Аллагьдин темягь тухуз жедач ва Ада садни темягь тухвана рекьяй акъатдайвал ийизвач.

¹⁴Гьар са кас темягь тухвана рекьяй акъудзавайди адан вичин хсуси эрзиманар я, абуру ам гваз физва ва адан темягь тухузва.

¹⁵Ахпа гьевес бугъаз жезва ва адалай гунагь жезва, хьайи гунагьди, лагьайтӀа, ажал гъизва.

¹⁶Играми зи стхаяр-вахар, куьне куьн алцурармир.

¹⁷Вири дугъри ва тамам савкьватар виняй, дегиш тежедай ва дегишвилин гьич хъенни авачир Бубадилай, цавун чирагърин Халикьдилай, къвезвайди я.

¹⁸Вичи халкьай затӀарин арада чакай сифтегьан бегьер хьун патал, Ада Вичи Вичин къаст тирвал чун гьакъикъатдин гафуналди аладна.

¹⁹Играми зи стхаяр-вахар, гъавурда акьукь: къуй гьар сад, рахунрихъ ва я хъел къалурунихъ алгъидалди[1], яб акалунихъ гелкъуьрай.

²⁰Хъел квайла инсанди Аллагьдиз гьахъ-михьи яз аквазвай кар ийидач.

²¹Гьавиляй гьар жуьредин чиркинвал ва писвилерин гзафвал гадара ва квек кутазвай, куьн хиласдай къуват авай гаф муьтӀуьгъвилелди кьабула.

²²И жигьетдай квекай тек са гафуниз яб гузвайбур ваъ, гьакӀни ам кьилиз акъудзавайбур хьухь, тахьайтӀа куьне куьн алцурарзава.

²³Гафуниз яб гуз, ам кьилиз акъуд тийизвайди гуьзгуьдиз килигзавай инсандиз ухшар я:

²⁴ам вичиз килигна ва къекъечӀна, вич гьихьтинди ятӀа гьасятда адан рикӀелай алатна.

²⁵Амма азадвал гузвай тамам Къанун кьатӀузвайда, Къанундилай алат тавуна, ван хьайи гафар рикӀелай алуд тавуна, адав кьадай крар ийизва, адаз вичин крара нуьсрет гуда.

²⁶Вич муъмин яз гьисабиз, амма вичин мез идара ийиз тежезвайда вичи вич алцурарзава, ахьтин касдин муъминвал хийир авачирди я.

²⁷Аллагьдин, чи Бубадин, вилик михьи ва рехне квачир муъминвал етимриз ва хендедайриз абурун муьгьтежвилера куьмек гуникай ва жув и дуьньядикай михьи яз хуьникай ибарат я.