Read Lezgi New Testament – ЦӀийи Икьрар Якьуб 3 Bible Online

Якьуб 3 - Lezgi New Testament – ЦӀийи Икьрар bible

Якьуб 3

¹Зи стхаяр-вахар, вири муаллимар жез алахъмир! Вучиз лагьайтӀа, чак, муаллимрик, кӀевелай тахсирар кутаз жедайди квез чизва.

²Чна лагьайтӀа, вирида гзаф крара гунагьар ийизва. Ни рахунра гунагьар ийизвачтӀа, ам тамамвилив агакьнавай, вичин бедендални кьенерар вегьиз алакьдай кас я.

³Шив муьтӀуьгъарун патал адан сиве залпанд туналди, чна адан вири беден идара ийизва.

⁴Ва я мисал яз гимияр къачун: гьикьван абур чӀехибур хьайитӀани ва гьихьтин къати гар аваз хьайитӀани, абур гъвечӀи элкъуьрагди гими гьалзавайдаз кӀани патахъ тухузва.

⁵Мезни гьакӀ я: ам гъвечӀи алат я, амма ам дамахар гваз чӀехи гафар рахада. Килиг — тамук акатнавай чӀехи цӀай бицӀи цӀелхемдилай гатӀунзавайди я.

⁶Мезни гьа цӀай хьиз я, чи бедендин алатрин арада ам виче нагьахъвили уьмуьр тухузвай чка я. Ада, вичи жегьеннемдикай цӀай кьунваз, уьмуьрдин вири еришдикни цӀай кутазва ва вири беден чиркинарзава.

⁷Ничхиррин, къушарин, чурчулрин ва гьуьлуьн гьайванрин вири жуьреяр муьтӀуьгъариз жеда, абур инсанди муьтӀуьгъарнава,

⁸амма мез садавайни табий ийиз жедач. Ам залпанд алачир, ажал гъидай агъудив ацӀанвай писвал я.

⁹Мецелди чна Реббидиз, чи Бубадиз, шукурар ийизва ва гьа мецелди чна Аллагьдиз ухшарвал аваз халкьнавай инсанриз лянет ийизва.

¹⁰Гьа са сивяй тарифни къаргъиш акъатзава! Зи стхаяр-вахар, икӀ хьана кӀандач.

¹¹Гьа са чешмедай михьи ва уькӀуь яд авахьун мумкин яни мегер?

¹²Зи стхаяр-вахар, инжилдин тарцел — зейтунар ва я ципицӀ чӀередал инжилар экъечӀдани мегер? Гьа саягъда уькӀуь булахдай шит ядни авахьун мумкин туш.

¹³Куь арада камал ва акьул авайди вуж я? Къуй ада вичихъ камалди гузвай муьтӀуьгъвал авайди лайих уьмуьрдалди къалуррай.

¹⁴Амма куьне рикӀе туькьуьл пехилвални жуван хийир кӀан хьунин эрзиманар хуьзватӀа, жуван тарифариз дамахармир ва гьакъикъатдин аксина таб ийимир.

¹⁵Ихьтин «камал» цаварилай къвезвайди туш, ам чилинди, инсандиз хасди, иблисдилай къвезвайди я.

¹⁶Инсанар пехилвили ва жуван хийир кӀан хьунин эрзиманри идара ийизвай чкада къайда тахьун ва гьар жуьредин чӀуру крар ава.

¹⁷Амма цаварилай къвезвай камал эвелни-эвел михьиди, ахпани ислягьвал кӀаниди, хъуьтуьлди, чӀалал къведайди, регьимдив ва къени майвайрив ацӀанвайди, нагьахъдиз садан падни такьазвайди ва кьве чин алачирди я.

¹⁸Ислягьвал арадал гъизвайбуру ислягьвилелди гьахъ-михьивилин майваяр гузвай тумар цазва.