Read Lezgi New Testament – ЦӀийи Икьрар Якьуб 4 Bible Online

Якьуб 4 - Lezgi New Testament – ЦӀийи Икьрар bible

Якьуб 4

¹Куь арада авай душманвални чуьруькар гьинай атанвайди я? Куь къене акъажунра авай куь къизгъин эрзиманрилай тушни?

²Квез са вуч ятӀани кӀанзава, амма ам квез авач, гьавиляй куьне ягъиз рекьизва. Куьн са квел ятӀани пехил я, амма квевай адав агалкьиз жезвач, гьавиляй куьн акъажунра гьатзава ва куьне душманвилер ийизва. Квез гьатдай затӀ авач, вучиз лагьайтӀа куьне Аллагьдивай тӀалабзавач;

³тӀалабзава, амма гьатдай затӀ авач, вучиз лагьайтӀа куьне, тӀалабзавай затӀарикай лезет хкудун патал серф ийиз кӀанз, михьи тушир делилрал амалзава.

⁴Эй Аллагьдиз вафа техуьзвайбур! Гунагькар дуьньядихъ галаз дуствиле хьун — им Аллагьдихъ галаз душманвал авун тирди квез чизвачни мегер? И дуьньядин дуст жез кӀанзавайдакай Аллагьдин душман жезва.

⁵ТахьайтӀа Аллагьдиз Вичи инсанрик кутазвай Руьгь анжах Вичиз гзаф вафа хвена кӀанзавайдакай Каламда гьавайда кхьенва лагьана фикирзавани куьне?

⁶Амма Ада чаз мадни чӀехи берекат гузва. Гьавиляй Каламди лугьунни ийизва: «Аллагь акси я лавгъабуруз, амма Ада умунбуруз берекат гузва» .

⁷Гьавиляй Аллагьдиз муьтӀуьгъ хьухь, иблисдиз акси яз къарагъ, ва ам квекай катда.

⁸Аллагьдиз мукьва хьухь, Амни квез мукьва жеда. Гунагькарар, куь гъилер чуьхуьх, куьнени, шак гъизвайбур, куь рикӀер михьа.

⁹Пашман хьухь, дерт чӀугу, шелар ая. Хъуьрена кӀандай чкадал шехьа, шад хьана кӀандай чкадал пашманвал ая.

¹⁰Аллагьдин вилик агъуз хьухь, гьа чӀавуз Ада куьн хкажда.

¹¹Стхаяр-вахар, сад садакай пис рахамир. Стхадикай-вахакай пис рахазвайди ва абурук тахсир кутазвайди Къанундикай пис рахазва ва ада и Къанундик тахсир кутазва. Амма вуна Къанундик тахсир кутазвайла, вакай Къанун кьилиз акъудзавайди ваъ, дуванбег жезва.

¹²Амма Къанун Акъуддайди ва Дуванбег анжах Сад — Аллагь я. Анжах са Гьадавай хиласиз ва я пучиз жеда. Жуван мукьув гвайдак тахсир кутун патал вун вуж я кьван?

¹³«Къе-пака чун флан шегьердиз фида, са йисуз ана амукьда, маса гуз-къачунин савда ийида ва хийир къачуда» лугьузвайбуру гила яб це.

¹⁴Квез гьатта пака вуч жедатӀани чизвач. Куь уьмуьр вуч я? Куьн са кьадар вахтунда пайда хьана ахпа квахьдай бугъ хьиз я эхир.

¹⁵Куьне икӀ лагьайтӀа хъсан я: «Аллагьди гайитӀа, чун мад са кьадар вахтунда чан аламаз жеда ва чна и ва я муькуь кар ийида».

¹⁶Куьне лагьайтӀа, жув вине кьуна дамахарзава, амма ахьтин дамахар авун пис кар я.

¹⁷Вичи авуна кӀани хъсанвал чизвай, амма тийизвай гьар сада гунагь ийизва.