Read Lezgi New Testament – ЦӀийи Икьрар Якьуб 5 Bible Online

Якьуб 5 - Lezgi New Testament – ЦӀийи Икьрар bible

Якьуб 5

¹Гила куьне, девлет авайбур, заз яб це. Шелар ая ва къагьарар ая, вучиз лагьайтӀа куь кьилел бедбахтвилер къвезва.

²Куь девлет ктӀанва, куь парталар гъуьчӀре тӀуьнва.

³Куь къизилни гимиш муьрхъуь кьунва, абурун муьрхъуь квез акси яз шагьидвал ийида ва, цӀу хьиз, куьн туькьуьнда. Эхиримжи йикъар алукьзава — куьне, ингье, девлет кӀватӀзава!

⁴Ингье, куьне куь никӀера бегьер кӀватӀай лежберрикай атӀай пулари кӀевидаказ гьарайзава. Гвен гуьзвайбурун сузадин ван Къуватрин Реббидив агакьзава.

⁵Куьне чилел булвиле-гурвиле ва кеф-кефиятда уьмуьр тухвана, амма Кьасабдин югъ[2] алукьнавайлани, куьне са куьн тӀуьн гана куькарна.

⁶Квез аксивал тавур гьахъ-михьидак куьне тахсир кутуна ва ам яна кьена.

⁷Стхаяр-вахар, Ребби къведалди сабур хвена акъваз. Чил гьялзавайдани, зулун ва гатфарин марфар агакьдалди, чилин багьа бегьер сабурдивди вилив хуьзва.

⁸Куьнни сабур гваз хьухь ва жуван рикӀер мягькемара, вучиз лагьайтӀа Ребби къведай чӀав мукьвал ала.

⁹Квек Аллагьди тахсир кутун тийидайвал, стхаяр-вахар, сада садалай шикаятар ийимир. Дуванбег атана ракӀарив акъвазнава.

¹⁰Стхаяр-вахар, Реббидин ТӀварцӀелай рахай пайгъамбарар квез азабра эхиз чирдай чешне хьурай.

¹¹Сабур къалурзавайбур нуьсрет ганвайбур яз гьисабзава чна. Квез Аюбан сабурдикай ван хьана ва эхирдай Реббиди адаз гьикӀ нуьсрет ганатӀа акуна, вучиз лагьайтӀа Реббидихъ регьим хьунин ва рикӀ кунин девлет ава.

¹²Виридалайни вилик, зи стхаяр-вахар, я цавалди, я чилелди, я са гьихьтин ятӀани маса затӀуналди кьин кьамир. Квек Аллагьди тахсир кутун тийидайвал, къуй куь «эхь» — халисан «эхь», куь «ваъ» халисан «ваъ» хьурай.

¹³Квекай са ни ятӀани азаб чӀугвазватӀа, ада дуьа авурай. Са низ ятӀани бахт аватӀа, ада тарифдин манияр лугьурай.

¹⁴Квекай са вуж ятӀани азарди кьунватӀа, ада, вичин гьакъиндай дуьаяр авун патал ва вичивай Реббидин ТӀварцӀелай чӀем гуьцӀун патал, иманийрин кӀватӀалдин кьилевайбуруз эверрай.

¹⁵Иман гваз авур дуьади азарди кьунвайди дири хъийида. Реббиди ам къахрагъарда. Азар квайда гунагь авунватӀа, адалай гъил къахчуда.

¹⁶Сада садан вилик куьне куь гунагьар хиве яхъ ва, куьн дири хъхьун патал, сада садан гьакъиндай дуьаяр ая. Гьахъ-михьи касди кӀевелай ийизвай дуьадилай гзаф крар алакьда.

¹⁷Ильяс гьа и чун хьтин инсан тир. Амма ада марф такъун патал кӀевелай дуьа авуна, ва чилел пуд йисни зура марф къванач.

¹⁸Ада мад дуьа авуна, цаву марф гана, ва чили цӀийи кьилелай бегьер гъиз хьана.

¹⁹Зи стхаяр-вахар, квекай сад гьакъикъатдивай къекъечӀайтӀа, амма масада ам гьакъикъатдал хкайтӀа,

²⁰ам дуьз рекьел хкайдаз чир хьурай хьи, и кардалди ада гунагькардин руьгь кьиникьикай хиласда ва адан гзаф гунагьар тахьайдай ийида.