Read Lezgi New Testament – ЦӀийи Икьрар 1-Петру 1 Bible Online

1-Петру 1 - Lezgi New Testament – ЦӀийи Икьрар bible

1-Петру 1

¹Иса Месигьдин илчи Петрудин патай ПӀунтӀасда, ГалатӀда, Кападукда, Асия вилаятда ва Битинда чкӀанвай къурабайриз,

²Аллагь Бубадин къастуналди, Руьгьдалди пак авуналди, Иса Месигьдиз табий хьун патал ва Адан Ивидалди михьи хьун патал хкянавайбуруз. Берекатни саламатвал артух хьурай квез.

³Аллагьдиз, Чи Ребби Иса Месигьдин Бубадиз, шукур хьурай. Ада Вичин чӀехи регьимдалди, Иса Месигьдал кьейидалай кьулухъ чан хкуналди, чаз чан алай умуд гана ва чун цӀийи кьилелай дуьньядиз хкана.

⁴Ада чаз терг тежедай, чиркин тавунвай ва шуьткьуьн тийидай ирс гана. Ам куьн паталди цаварал хуьзва.

⁵Аллагьдин къуватди куь имандин куьмекдалди вахтарин эхирда атана акъатиз гьазур тир хиласвал патал куьнни хуьзва.

⁶Гьавиляй, исятда са кьадар вахтунда чи имандин гьакъикъивал къалурун патал квел жуьреба-жуьре синагъра азабар ацалтзаватӀани, гьа хиласвал гъидай йикъал шад хьухь, — иман къизилдилайни багьа я; къизил, цӀалди синагъ ийизватӀани, эбеди туш, — гьа икӀ иманди Иса Месигь пайда хьайи чӀавуз квез аферин, баркалла, гьуьрмет гъида.

⁸Квез Ам акунвач, амма квез Ам кӀанзава, ва гилани, ам акун тавуртӀани, куьне Адахъ иман ийизва. Адахъ иман авуна, гафаралди лугьуз тежедай баркалла галай шадвилелди хвешивалзава.

⁹Вучиз лагьайтӀа, куь мурад тир жуван чанарин хиласвилив куьн имандалди агакьзава.

¹⁰Квев агакьиз гьазур берекатдикай лагьай пайгъамбаррин къекъуьнар ва алахъунар и хиласвилиз бахшнай.

¹¹Абур, чпик квай Месигьдин Руьгьди гьи вахтуникай ва гьи гьаларикай лугьузватӀа, гьадан гъавурда акьаз алахъзавай. Руьгьди, лагьайтӀа, Месигьдиз виликамаз азабар кхьенвайвиликай ва абур алатайдалай гуьгъуьниз къведай баркалладикай виликамаз шагьидвал ийизвай.

¹²Пайгъамбарвилер ийизвайла, абуру чпи чпиз ваъ, квез къуллугъ ийизвайди абуруз Аллагьди малумарна. Цаварилай ракъурнавай Пак Руьгьдин къуватдалди Шад Хабар гайибурун мецеривди гила квез хабар ганва. Малаикарни и сирдин суракьда гьатнава.

¹³Гьавиляй куьне куь акьул кардик экечӀдайвал ая ва жув-жувал алаз хьухь. Иса Месигь атай чӀавуз квез гудай берекатдик тамамдиз умуд кваз хьухь.

¹⁴ЧӀалаз килигдай аялри хьиз, Шад Хабардикай квез са ванни тахьанвай чӀавуз авур чӀуру крар ийиз кӀан хьуникай яргъаз хьухь.

¹⁵Куьне вуч ийиз хьайитӀани, вири крара, квез Эверайди хьиз, пак хьухь,

¹⁶гьикӀ лагьайтӀа кхьенва: «Пак хьухь, вучиз лагьайтӀа Зун пак я».

¹⁷Куьне садан падни хуьн тавуна гьар са касдин дуван ийизвай Аллагьдиз Буба лугьуз эверзаватӀа, куьне квез чилел ганвай уьмуьр Аллагьдихъай кичӀе яз кьилиз акъуда.

¹⁸Куьне, куь бан-бубайри хьиз, са манани авачиз, тухузвай уьмуьрдивай куьн къахчунай. Куьн гимиш ва я къизил хьтин терг жедай затӀар гана ваъ, михьи ва рехне квачир кӀел хьтин Месигьдин Иви гана ахьтин уьмуьрдивай къахчурди квез чизва эхир!

²⁰Ам гьеле дуьнья халкь ийидалди вилик тайин авунай, амма куь хатурдай Ам вахтарин эхирдай атана.

²¹Месигьдин куьмекдалди Вичел кьейидалай кьулухъ чан хкай ва, куьне Аллагьдихъ иман авун патал ва куьне Адак умуд кутун патал, Месигь машгьур авур Аллагьдихъ куьне иман ийизва.

²²Жуван стхаяр-вахар рикӀин сидкьидай кӀан хьун патал, куьне куь руьгьер гьакъикъатдин чӀалаз килигуналди михьи авуна. Гьа саягъда садаз сад вири рикӀелди кӀан хьухь!

²³КтӀидай тумуникай ваъ, ктӀин тийидай, чан алай ва датӀана авай Аллагьдин Гафуникай куьн цӀийи кьилелай ханва,

²⁴вучиз лагьайтӀа кхьенва: «вири инсанар векьер хьиз я, абурун вири баркалла чуьлдин цуьквер хьиз я. Векьер кьурада, цуьквер авахьда,

²⁵амма гафар Реббидин эбеди яз амукьда» . Ибур квез муштулух яз гузвай Шад Хабарда авай гафар я.