Read Lezgi New Testament – ЦӀийи Икьрар 1-Петру 4 Bible Online

1-Петру 4 - Lezgi New Testament – ЦӀийи Икьрар bible

1-Петру 4

¹Гьа икӀ, Месигьди бедендалди азабар чӀугун себеб яз, куьнни ахьтин кардиз гьазур хьухь, гьикӀ лагьайтӀа бедендалди азаб чӀугвазвайда гунагьдин гьукумдик кваз уьмуьр тухун акъвазарнава.

²Гьа чӀавуз ада чилел уьмуьрдикай амай пай инсандиз хас гьевесрин ваъ, Аллагьдин къастунин идарадик кваз уьмуьр тухуда.

³Куьне бутпересри тухузвай хьтин уьмуьрдин къайда жезмай кьван яргъалди кьиле тухванай, явавилиз, гьевесриз, сархушвилиз, кьенер алачир чиркин крар галай тӀуьн-хъунриз ва такӀан къведайвал бутриз икрам авуниз кьил янай.

⁴Гьавиляй, куьне мад чпихъ галаз явавилера иштирак ийизмач лугьуз, бутпересар мягьтелни жезва, квекай пис гафарни рахазва.

⁵Амма вири крарай абуру чан алайбурунни кьейибурун дуван ийиз Гьазурдан вилик гьахъ-гьисаб ийида.

⁶Гьавиляй Шад Хабар кьейибурувни агакьарнай, и хабар вичив агакь тийир садни авач, абурувай, бедендалди кьенватӀани, руьгьда аваз, Аллагьди лугьузвайвал уьмуьр тухуз жедайвал авуна.

⁷Мукьвара виридан эхир жеда. Гьавиляй, куьн датӀана дуьа ийиз жедай гьалда хьун патал, куьне акьулдин дуьзвал хуьх, уях яз хьухь.

⁸Виридалайни вилик вафа гваз садаз сад кӀан хьухь, вучиз лагьайтӀа «муьгьуьббатди гзаф гунагьар тахьай мисал ийизва».

⁹Шикаят тийиз, сада сад мугьманвилин адетар хвена илифариз хьухь.

¹⁰Аллагьдин гзаф жуьрейрин берекатдиз хъсандиз къуллугъзавайбуру хьиз, сада садаз гьардаз ганвай паюналди къуллугъ ая.

¹¹Лугьузвайда и кар Аллагьдин гафар лугьузвайда хьиз авун лазим я. Къуллугъ ийизвайда къуй Аллагьди гузвай къуватдалди къуллугъ авурай. Къуй и вири крара Иса Месигьдин куьмекдалди Аллагь машгьур хьурай. Баркаллани асиррай асирриз физвай къуват Гьадаз хьурай, амин.

¹²КӀанибур, куьн цӀай квай синагърай финиз мажбур хьунал мягьтел жемир, ина аламат жедай са затӀни авач.

¹³Аксина, Месигьдин азабра куьнени иштирак ийизва лагьана шад хьухь; гьикӀ лагьайтӀа Адан баркалла квез ахъа хьайи чӀавузни куьн шад жеда ва куьне хвешивилер ийида.

¹⁴Месигьдин ТӀвар кьунай куь намусдик хкуьрзаватӀа, квел нуьсрет ала, им акӀ лагьай чӀал я хьи, баркалладин Руьгьди — Аллагьдин Руьгьди — квел бине кьунва. Абуру Аллагьдиз асивалзава, куьне, лагьайтӀа, Ам машгьурзава.

¹⁵Кьилинди квекай садани ивикъич[3] хьана ва я угъри хьана, ва я зулумкар хьана, ва я масадан крара вичин кьил твазвай кас хьана азаб чӀугун тавун я.

¹⁶Амма са ни ятӀани месигьи яз азаб чӀугвазватӀа, къуй адаз регъуь тахьурай, вичел ахьтин ТӀвар ала лугьуз Аллагьдиз шукур авурай.

¹⁷Вучиз лагьайтӀа Дувандин вахт алукьнава, дуван Аллагьдин кӀвалелай гатӀум жеда. Ам чалай гатӀум хьайитӀа, Аллагьдин Шад Хабардиз табий тахьайбурун эхир гьихьтинди жедатӀа фагьум ая.

¹⁸«Гьахъ-михьи касдиз хилас жез регьят туштӀа, чалкечирризни гунагькарриз жедайди вуч хьуй?»

¹⁹Гьавиляй Аллагьдин къастуналди азаб чӀугвазвайбуру къуй чпин уьмуьр чпивай далу акализ жедай Халикьдин гъиле турай ва хъсанвал авун давамаррай.