Read Lezgi New Testament – ЦӀийи Икьрар 2-Петру 1 Bible Online

2-Петру 1 - Lezgi New Testament – ЦӀийи Икьрар bible

2-Петру 1

¹Иса Месигьдин лукӀ ва илчи Симун-Петрудин патай. Чи Аллагь ва Хиласкар Иса Месигьдин гьахъ-михьивал себеб яз чавни гвай гьа багьа иман кьабулнавайбуруз.

²Къуй берекатни саламатвал, Аллагь ва чи Ребби Иса кьатӀуналди, артух хьурай квез.

³Илагьи къуватди чаз уьмуьр ва муъминвал патал лазим тир вири гана, Вичин хсуси баркалладалди ва чаз хъсанвилелди эверай Аллагьдин кьатӀуналди гана.

⁴Гьа икӀ Ада чаз чӀехи ва къимет авай хиве кьунар авуна, абурун куьмекдалди куьн дуьньядин члаф жедай гьевесрикай катдайвал ва иллагьи тӀулдиз талукьбур жедайвал авуна.

⁵Гьавиляй куьне жедай кьван вири ая, куь имандал эдеб алава жедайвал ая, эдебдал — чирвал,

⁶чирвилел — жувавай жув кьаз хьунухь, жува жув кьаз хьунал — сабур, сабурдал — муъминвал,

⁷муъминвилел — садаз сад кӀан хьун, садаз сад кӀан хьунал муьгьуьббат алава жедайвал ая.

⁸Квек ихьтин къилихар кватӀа ва абур артух жезватӀа, куьне чи Ребби Иса Месигь кьатӀун хийир авачирди ва бегьер тагудайди яз амукьдач.

⁹Ник и къилихар квачтӀа, ам буьркьуь я ва адаз яргъавайди хъсан аквазвач, вичин алатай гунагьрикай михьи хьун адан рикӀелай фенва.

¹⁰Гьавиляй, стхаяр-вахар, эвернавайбур ва хкянавайбур тирди тестикьарун патал мадни гзаф алахъа. ИкӀ куь кӀвач садрани галкӀидач,

¹¹чи Ребби ва Хиласкар Иса Месигьдин эбеди Пачагьлугъдиз гьахьдай рак квез гегьеншдиз ахъа жеда.

¹²Квез и кар хъсандиз чизватӀани ва куьне кьабулнавай гьакъикъатда куьн мягькем хьанватӀани, и кар куь рикӀел хкун за садрани акъвазардач.

¹³Амма зун гьеле и алачухда, яни зи беденда, амай кьван гагьда куь рикӀел хкун за дуьз кар яз гьисабзава.

¹⁴И мукьвара зун, заз чи Ребби Иса Месигьди ахъаяйвал, и алачухдай хъфидайди заз чизва.

¹⁵Гьавиляй, зун куь арада тамукьдай чӀав атайлани, зун и гьакъикъатар гьи вахтунда хьайитӀани квевай рикӀел хкиз хьунал алахъда.

¹⁶Чи Ребби Иса Месигьдин къуватдикай ва хтуникай лугьудайла, чна кьил акадардай махар ахъайзавачир. Чунни лагьайтӀа, Адан зурбавилин шагьидар хьанай.

¹⁷Адаз гьуьрметни баркалла Аллагь Бубади ганай, Аллагьдин ван Ам паталди чӀехи баркалла галаз акъатнай: «Им Зи рикӀ алай Хва я, Им Зи шадвал я».

¹⁸Чун Адахъ галаз санал пак дагъда авайла, цаварилай къвезвай и ван чаз хьанай.

¹⁹Гила чун пайгъамбарвилелди лагьай гафунихъ генани кӀевелай агъунва. Адаз, югъ алукьдалди ва куь рикӀера экуьнин гъед экъечӀдалди мичӀивиле нур гузвай чирагъдиз хьиз, дикъет гуналди куьне хъсан кар ийизва.

²⁰Виридалайни вилик рикӀел хуьх: Каламда авай пайгъамбарвилин са гафни пайгъамбардин вичин туькӀуьрунрикай хкатзавайди туш,

²¹вучиз лагьайтӀа пайгъамбарвилин гафар са чӀавузни инсандин къастуналди лагьанвайбур туш, абур Пак Руьгьди юзун кутунвай инсанри Аллагьдин мецелай лугьузвай.