Read Lezgi New Testament – ЦӀийи Икьрар 1-Ягья 4 Bible Online

1-Ягья 4 - Lezgi New Testament – ЦӀийи Икьрар bible

1-Ягья 4

¹КӀанибур, гьар са руьгьдин чӀалахъ жемир, руьгьер Аллагьдин патай ятӀа-туштӀа чир хьун патал, абур синагъдай акъуда, вучиз лагьайтӀа дуьньядал гзаф тапан пайгъамбарар арадал атанва.

²Аллагьдин Руьгь квевай икӀ чириз жеда: Иса Месигь инсандин беденда аваз атанвайди тестикьарзавай Руьгь Аллагьдин патай я.

³Амма Иса кьабул тийизвай руьгь Аллагьдин патай туш. Ам Месигьдиз акси касдин руьгь я. Ам къведайди квез ван хьанвай, гила ам атана, дуьньяда ава.

⁴Чан балаяр, куьн Аллагьдин патай я, ва куьн тапан пайгъамбаррал гъалиб хьанва. Вучиз лагьайтӀа, квехъ Авайди дуьньяда авайдалай артух я.

⁵Абур и дуьньядай я ва гьавиляй дуьньяда рахазвай хьиз рахазва ва дуьньяди абуруз яб гузва.

⁶Чун Аллагьдин патай я. Аллагь чизвайда чаз яб гузва, Аллагьдин патай туширда чаз яб гузвач. Гьакъикъатдин Руьгь ва тапан руьгь чаз гьа и жуьре чир жезва.

⁷Эй кӀанибур, ша чаз садаз-сад кӀан жен, вучиз лагьайтӀа, муьгьуьббат Аллагьдин патай я. Нин рикӀе ашкъи аватӀа, Аллагь ам паталди Буба я ва адаз Аллагь чизва.

⁸РикӀе ашкъи авачир касдиз Аллагь чизвач, вучиз лагьайтӀа, Аллагь муьгьуьббат я!

⁹Аллагьди вичин рикӀе чаз авай кӀанивал икӀ малумарна: чна Вичихъ авай тек са Хцин куьмекдалди цӀийи уьмуьр къачун патал, Аллагьди Ам дуьньядиз ракъурна.

¹⁰Муьгьуьббат чаз Аллагь кӀан хьуникай ваъ, Адаз чун кӀан хьуникай ва Ада Вичин Хва чи гунагьар михьун паталди къурбанд авуникай ибарат я.

¹¹Эй кӀанибур, Аллагьдиз чун гьикӀ кӀанзаватӀа, чазни садаз-сад гьакӀ кӀан хьун герек я.

¹²Аллагь гьич садазни са чӀавузни акунвач. Чаз садаз-сад кӀан хьайитӀа, Аллагь ча амукьда ва Адан муьгьуьббат ча камил жеда.

¹³Чун Ада, Амни ча амукьзавайди Ада чаз Вичин Руьгьдикай гуналди чаз чида.

¹⁴Чаз жуваз акуна, чна шагьидвал ийизва хьи, Бубади Хва дуьньядин Хиласкар яз ракъурна.

¹⁵Ни Иса Аллагьдин Хва яз кьабулзаватӀа, Аллагь гьада жеда, амни — Аллагьда.

¹⁶Чаз Аллагьдиз чун кӀанзавайди чир хьанва ва чун и кардин чӀалахъ хьанва. Аллагь муьгьуьббат я. Вуж муьгьуьббатда амукьайтӀа, гьам Аллагьда амукьзава, Аллагьни — гьада.

¹⁷Къияматдин юкъуз чахъ жуьрэт хьун патал чи муьгьуьббат камил хьана. Вучиз лагьайтӀа, Месигь гьикӀ ятӀа, чунни и дуьньяда гьакӀ я.

¹⁸Муьгьуьббатда кичӀевал авайди туш, аксина, камил муьгьуьббатди кичӀевал чукурда. Куьз лагьайтӀа, кичӀевал жазадиз талукь я, кичӀедай инсан вичин муьгьуьббатда камил туш.

¹⁹Чаз кӀанзава, вучиз лагьайтӀа сифте Адаз чун кӀан хьана.

²⁰Ни «заз Аллагь кӀанзава» лугьуз, амма вичин стхадиз нифретзаватӀа, гьам тапрукь я. Вучиз лагьайтӀа, вилиз аквазвай стха кӀан тийизвайдаз, вилиз таквазвай Аллагьни кӀан жедач.

²¹Чна адавай къачур тагьким ихьтинди я: «Аллагь кӀанзавайдаз вичин стхани кӀан хьурай».