Read Lezgi New Testament – ЦӀийи Икьрар 3-Ягья 1 Bible Online

3-Ягья 1 - Lezgi New Testament – ЦӀийи Икьрар bible

3-Ягья 1

¹Агъсакъалдин патай заз рикӀивай кӀани, играми Гаяз.

²Азизди, ви вири крар хъсан хьун патал, ви руьгь гьикӀ сагълам ятӀа, ви беденни гьакӀ сагълам хьун патал за дуьа ийизва.

³Атай стхайри вуна вафа хуьникай, вун гьакъикъатдин рекье хьуникай шагьидвал авурла, зун гзаф шад хьана.

⁴Зи веледар гьакъикъатдин рекье авайди ван хьунилай чӀехи шадвал захъ авач.

⁵Азизди, стхаяр паталди, гьатта абур ваз чин тийидайбур хьайитӀани, вуч авуртӀани, вуна дуьз ийизва.

⁶Абуру иманийрин кӀватӀалдиз ви кӀанивиликай шагьидвал авуна. Вуна абуруз чпин сиягьат давамарун паталди Аллагьдиз хуш къведай къайдада куьмек ганайтӀа хъсан жедай.

⁷Абур Исадикай муштулухар гун патал рекьиз экъечӀна ва абуру иман гвачирбурувай са затӀни къачунач.

⁸Гьакъикъат сейли авун паталди чун гьахьтин ксариз даях хьун герек я.

⁹За кӀватӀалдиз чар кхьена, амма абуруз чӀехивал ийиз алахъзавай ДатӀрефа чун кьабулзавач.

¹⁰Зун атайтӀа, за ам, чакай чӀуру фитнеяр ийиз, квел машгъул ятӀа винел акъудда. Ада вичи, стхаяр кьабул тавунилай гъейри, масадбурузни абур кьабулун къадагъа ийизва ва абур кьабулиз кӀанзавайбурни кӀватӀалдай чукурзава.

¹¹Азизди, писвилелай ваъ, хъсанвилелай чешне къачу. Ни хъсанвал ийизватӀа — Аллагьдин патай я, ни писвал ийизватӀа — ам Аллагьдин гъавурда авайди туш.

¹²ДимитӀридикай вири хъсандиз рахазва, гьакӀни гьакъикъат адакай хъсандиз рахазва. Чунни и кардин шагьид я ва вазни чизва хьи, чи шагьидвал гьакъикъиди я.

¹³Квез лугьудай гафар захъ мад гзаф ава, амма девитдинни къелемдин куьмекдалди абур заз лугьуз кӀанзавач.

¹⁴Мукьвара вун акуник за умуд кутазва ва гьа чӀавуз чун чин-чинал рахада.

¹⁵Ваз саламатвал хьурай. Дустари ваз саламар ракъурзава. Вири дустариз, гьар садаз кьилди, саламар лагь.