Read Lezgi New Testament – ЦӀийи Икьрар Керемат 10 Bible Online

Керемат 10 - Lezgi New Testament – ЦӀийи Икьрар bible

Керемат 10

¹Заз циф галчукна цавай эвичӀзавай къуват авай са маса малаик акуна. Адан кьилел хважамжам алай. Адан чин рагъ хьиз тир. Адан кӀвачер цӀай кьуна кузвай гулар хьиз аквазвай.

²Адан гъиле гъвечӀи ахъа ктаб авай. Ада вичин эрчӀи кӀвач гьуьлел, чапла кӀвачни чилел эцигна.

³Ада, асланди хьиз, кӀеви ванцелди гьарайна. Адан гьарайдиз цавун ирид къукърумди жаваб хгана.

⁴Ирид къукърум рахайла, зун кхьиз гьазур хьана. Амма цаварилай зав са ван агакьна: — Ирид къукърумди вуч лагьанатӀа жуван къене хуьх, кхьимир.

⁵Заз гьуьлени чилел акъвазнаваз акур малаикди эрчӀи гъил цавуз хкажна,

⁶цаварни ва цавара вуч аватӀа, чилни ва чилел вуч алатӀа, гьуьлни ва гьуьле вуч аватӀа Вири Халкь Авур Даим Уьмуьр Тухузвайдал кьин кьаз лагьана: — Вахт атана алукьнава.

⁷Ирид лагьай малаикди къаргъу ягъайла, Аллагьди Вичиз къуллугъзавай пайгъамбарриз гайи муштулухра лагьанвайвал, Ада сир кутунвай къаст кьилиз акъатда.

⁸Заз цавалай атай ван мад гъилера захъ галаз рахана. — Алад, — лагьана ада, — фена, гьуьлелни чилел акъвазнавай малаикдин гъилевай ахъа ктаб къачу.

⁹Малаикдин патав фена, за лагьана: — Зав ктаб гице. — Къачуна, ам неъ, — лагьана ада. — Ам ви руфуна туькьуьл хьайитӀани, ви мецел ам, вирт хьиз, ширин жеда.

¹⁰За малаикдин гъиляй ктаб къачуна тӀуьна. Ам зи мецел, вирт хьиз, ширин тир. Амма зи руфуна ам туькьуьл хьана.

¹¹И чӀавуз заз лагьана: — Жуьреба-жуьре чӀаларал рахазвай халкьарин, тайифайрин ва пачагьрин кьилел вуч къведатӀа, къедлай кьулухъ вуна мад пайгъамбарди хьиз лугьуда.