Read Lezgi New Testament – ЦӀийи Икьрар Керемат 11 Bible Online

Керемат 11 - Lezgi New Testament – ЦӀийи Икьрар bible

Керемат 11

¹Зав яргъи лаш хьтин аса вугана ва лагьана: — Къарагъ, фена, Аллагьдин Ибадатханани къурбанган алцум ая. Ибадатханада икрам ийизвайбур гьисаба.

²Ибадатханадин къеце патан гъен тур, ам алцум мийир. Анаг маса халкьарин ихтиярда тунва. Абуру яхцӀурни кьве вацран муьгьлетда Пак Шегьердиз кӀур яда.

³За зи кьве шагьиддиз Зи мецелай рахадай ихтияр гуда. Абуру рекъинай ягъ тавунвай сарикай хранвай парталар алаз агъзурни кьве вишни пудкъад юкъуз пайгъамбарвал ийида.

⁴И кьве шагьид — зейтундин кьве тарни я, кьве чирагъганни я. Абур кьведни вири дуьньядин пачагь тир Аллагьдин вилик акъвазнава.

⁵Садаз абурун хатур хаз кӀан хьайитӀа, абурун сивяй цӀай акъатда, цӀу абурун душманар туькьуьнда. Сада абурун хатур хайитӀа, а кас гьа и За лагьайвал рекьида.

⁶Абуру пайгъамбарвал ийидай йикъара марф къун тавун патал, абуруз цав агалдай ихтияр ава. Вири ятарни абурун ихтиярда ава. Абуруз чпиз кӀан хьайи гьи чӀавуз хьайитӀани ятар ивидиз элкъуьрдай ва чил жуьреба-жуьре завалралди акӀажардай ихтияр ава.

⁷Абуру чпин шагьидвал авуна куьтягьайла, гургусдай[9] ничхир экъечӀда. Ничхирди абурал вегьида ва гъалиб жеда. Ада абур рекьида.

⁸Ада абурун мейитар чӀехи шегьердин куьчедал тада. А шегьерда чи Реббини хашуниз янай. А шегьердиз шартӀуналди Садум ва я Мисри лугьуз жеда.

⁹Гьар жуьре чӀаларал рахазвай халкьарикай, тухумрикай, тайифайрикай тир инсанар пуд югъни зура абурун мейитриз килигиз жеда ва абур кучукиз тадач.

¹⁰Чилел алай инсанар и кардал шад жеда ва абуру хвешивилер ийида, сада садаз савкьватар ракъурда, вучиз лагьайтӀа и кьве пайгъамбарди чилел алайбуруз азабар ганай.

¹¹Амма пуд югъни зуралай кьенвайбурук Аллагьди ракъурнавай чан хкидай руьгь акатна. Абур кьведни кӀвачел къарагъна. Абуруз килигзавайбурук зурба кичӀ акатна.

¹²Кьве шагьиддиз цаварилай ван хьана: — Иниз хкаж хьухь. Абур цифедаллаз цавуз хкаж хьана. Душманар абуруз килигиз амай.

¹³Гьа чӀавуз зурба залзала хьана. Шегьердин цӀудай са пай чкӀана. Залзаладик ирид агъзур кас телеф хьана. Амай инсанрик кичӀ акатна. Абуру Аллагьдиз шукурар авуна.

¹⁴Кьвед лагьай гуж алатна. Ингье фад-фад пуд лагьай гуж къвезва.

¹⁵Ирид лагьай малаикди къаргъу яна. Цавай кӀеви ванери лагьана: — Дуьньядикай Чи Реббидини Адан Месигьди пачагьвалдай вилаят хьанва. Абуру даим яз чил-цав идара ийида.

¹⁶Аллагьдин вилик квай тахтарал алай къанни кьуд агъсакъални метӀерал акъвазна. Абуру чинар агъузна Аллагьдиз икрам ийиз

¹⁷лагьана: — Ребби Аллагь, Агъа вири дуьньядин, шукурзава, икрамзава чна Ваз, Вун датӀана хьанай, къени авазва. Ви гьукумни къе Ви Гъиле гьатнава. На пачагьвал ийидай вахт атана.

¹⁸Халкьар пехъи хьанва, абур дили я. Гила ваз хъел къведай вахтни атанва, кьейибурун дуван Вуна ийида, Ви лукӀарив — пайгъамбаррив, Аллагьдиз талукьбурув, гьардав, Вахъай кичӀе тир, гъвечӀибурув, чӀехибурув, гьар садав чпин гьакъи агакьардай вахт хьанва. Исятда чил терг ийизвай инсанар чеб дуьньядай терг ийир вахт атанва.

¹⁹Аллагьдин цава авай Ибадатхана ахъа хьана. Виридаз Ибадатханада авай Адан весийрин сандух акуна. ЦӀайлапанар яна. Гьарай-эвер акъатна. Цавари къукърумарна. Чилерал залзала хьана. Зурба хар къвана.