Read Lezgi New Testament – ЦӀийи Икьрар Керемат 15 Bible Online

Керемат 15 - Lezgi New Testament – ЦӀийи Икьрар bible

Керемат 15

¹Заз цавай са чӀехи кардикай хабар гудай аламатдин маса ишара акуна. Заз гьар садав са завал гвай ирид малаик акуна. А эхиримжи завалар Аллагьдин чӀехи хъел куьтягь жезва лагьай чӀал тир.

²Заз шуьшедин гьуьл хьтинди акуна. Адак цӀайни какахьнавай. Ничхирдални адан кӀалубдал гъалиб хьайи ва адан тагъмадал алай тӀварцӀин рекъем кьабул тавур инсанар, Аллагьди чпиз гайи арфаяр гъиле кьуна, и шуьшедин гьуьлел акъвазнавай.

³Абуру Аллагьдин лукӀ Мусади ва КӀеле туькӀуьрай мани лугьузвай: Зурбани я, ажайибни крар Ви, Ребби Аллагь, Агъа вири дуьньядин! Гьахъ-михьибур, дуьзбурни я рекьер Ви, чилел алай кьван халкьарин Пачагь чи!

⁴Вакай, Ребби, кичӀе тежер вуж ава, вуж ава Ви ТӀварцӀиз шукур тийидай? Пакди анжах са Вун я. Вири халкьар къведа икрам ийиз Ваз, куьз лагьайтӀа виридаз чир хьанва къе На ийидай дуван тирди гьахъ-михьи.

⁵Ахпа заз цавай акуна хьи, Ибадатхана яз кардик квай Шагьидвилин Алачух ахъа хьана.

⁶Ибадатханадай ирид малаик экъечӀна. Абурув гьардав са завал гвай. Малаикрал кушдин гъаларикай хранвай михьи экуь парталар алай. Абурун хурарал къизилдин чӀулар алай.

⁷Чан алай кьуд затӀуникай сада ирид малаикдиз — гьар садаз са къизилдин сукӀра гана. СукӀраяр даим чан алай Аллагьдин хъилев ацӀанвай.

⁸Аллагьдин баркаллади ва Адан къудратди Ибадатхана гумадив хьиз ацӀурна. Ирид малаикдив гвай ирид завал алатна куьтягь жедалди садавайни Ибадатханадиз физ жезвачир.