Read Lezgi New Testament – ЦӀийи Икьрар Керемат 16 Bible Online

Керемат 16 - Lezgi New Testament – ЦӀийи Икьрар bible

Керемат 16

¹Заз Ибадатханадай къвезвай кӀеви ван атана. — Алад, — лагьана ванци ирид малаикдиз, — фена, Аллагьдин хъилев ацӀанвай ирид сукӀра чилел ичӀира.

²Сад лагьай малаикди фена вичин сукӀра чилел ичӀирна. Ничхирдиз ва адан кӀалубриз икрамзавай инсанрал гзаф пис, ирин авай хирер хьана.

³Кьвед лагьай малаикди вичин сукӀра гьуьлуьз ичӀирна. Гьуьлуькай мейитдин ивидиз ухшар иви хьана. Гьуьле авай кьван чан алай затӀар вири кьена.

⁴Пуд лагьай малаикди вичин сукӀра вацӀаризни булахриз ичӀирна. ВацӀарикайни булахрикай иви хьана.

⁵Заз ятар хуьзвай малаикдин ван атана: — ДатӀана авай, хьайи ва пак Ребби, Вун гьахъ-михьи я, вучиз лагьайтӀа Вуна авур дуван адалат галайди я.

⁶Инсанри Аллагьдиз талукьбурунни пайгъамбаррин иви гьикӀ авадарнатӀа, Вуна гьа инсанрив иви хъвазни туна. Абур иви хъваз туниз лайих я.

⁷Ахпа заз къурбангандин патавай къвезвай са ван атана: — Эхь, Ребби Аллагь, вири дуьньядин Агъа, вуна ийизвай дуванар дуьзбур ва гьахъ-михьибур я.

⁸Кьуд лагьай малаикди вичин сукӀра ракъинал ичӀирна. Ракъиниз инсанар кудай ихтияр гана.

⁹Зурба зегьемди инсанар алугарна. Абуру и завалар гъиле авай Аллагьдиз экъуьгъунар авуна. Инсанар Аллагьдин рекьел атанач ва Адаз шукур авунач.

¹⁰Вад лагьай малаикди вичин сукӀра ничхирдин тахтунал ичӀирна. Ничхирдин вилаятда мичӀи хьана. Азабрик акатай инсанри чпин мецер кӀасзавай.

¹¹Абуру чпиз азабарни завалар гана лугьуз цаварин Аллагьдиз экъуьгъунар авуна. Инсанри чпин пис крар акъвазарнач.

¹²Ругуд лагьай малаикди вичин сукӀра чӀехи Эфрат вацӀуз ичӀирна. ВацӀ кьурана. Рагъ экъечӀдай патай къведай пачагьриз рехъ ачух хьана.

¹³Заз аждагьандин, ничхирдин ва тапан пайгъамбардин гьар садан сивяй са чиркин руьгь экъечӀзавайди акуна. Абур пудни хъипериз ухшар тир.

¹⁴Абур чӀуру жинерин руьгьер тир. А руьгьери керемат-ишараяр къалурзавай. Абур алемда авай вири пачагьрин патав, са чӀехи юкъуз а пачагьар вири дуьньядин Агъа тир Аллагьдихъ галаз ийидай дяведиз къарагъарун патал, физвай.

¹⁵Реббиди лугьузва: — Ингье, Зун чинебан угъри хьиз къвезва. ДатӀана уях ва вичин парталар хуьзвай кас бахтавар я. Ам кьецӀилдиз къекъведач. Адан айиб инсанриз аквадач.

¹⁶ЧӀуру жинерин руьгьери пачагьар вичиз чувуд чӀалалди Гьармагеддан лугьудай чкадиз кӀватӀна.

¹⁷Ирид лагьай малаикди вичин сукӀра гьавадиз ичӀирна. Ибадатханада авай тахтунин патавай кӀеви ван атана: — АкьалтӀна!

¹⁸ЦӀайлапанар яна, цавари къукърумарна, гьарай-эвер акъатна. Чилел зурба залзала хьана. Ихьтин залзала чилел инсанар халкь авурдалай инихъ хьайиди тушир. Гьахьтин зурба залзала тир!

¹⁹ЧӀехи шегьер пуд чкадал пай хьана. Халкьарин шегьерар чкӀана. ЧӀехи Бабил шегьерни Аллагьдин рикӀелай алатнач. Гьа шегьердивни Аллагьди хъилин туьнт чехирдив ацӀанвай сукӀра хъваз туна.

²⁰Гьуьлел алай гьар са къурамат квахьна. Чилел дагъларни амукьнач.

²¹Инсанрин кьилел цаварай чӀехи къванерин хар къвана. Завалар хьана лугьуз инсанри Аллагьдиз экъуьгъунар авуна, вучиз лагьайтӀа хару гъайи завалар гзаф заланбур тир.