Read Lezgi New Testament – ЦӀийи Икьрар Керемат 19 Bible Online

Керемат 19 - Lezgi New Testament – ЦӀийи Икьрар bible

Керемат 19

¹Ахпа заз са гзаф инсанар рахазвай хьтин кӀеви ван атана: — Гьалелуя [15] ! Тариф ая Реббидин! Баркалла алай ва къудрат авай чи Реббиди хиласна чун.

²ГьакӀни адан дуванар гьахъ-михьибур я, дуьзбур я. Ада чӀехи ченгидизни кар кьунай — а ченгиди вичин явавилелди чӀуру рекье турвиляй чил ва ада гьакӀ Реббидин лукӀаринни ивияр авурвиляй экъич. Гьахьняй Реббиди ченгидилай михьиз кьисас къахчуна.

³Ванци кьвед лагьай гъилера «Гьалелуя» лагьана. Ченги кузвай цӀун гум даим яз цавуз хкаж хьана.

⁴Гьа чӀавуз къанникьуд агъсакъалдини чан алай кьуд затӀуни, метӀерал акъвазна, тахтунал ацукьнавай Аллагьдиз икрамна ва лагьана: — Амин! Гьалелуя!

⁵Тахтунин патавай ван акъатна: — Аллагьдихъай кичӀе лукӀари, гъвечӀибуруни, чӀехибуруни вирида чи Аллагьдин тарифар ая!

⁶Ахпа заз са гзаф инсанар рахазвай хьтин, чӀехи селдин хьтин, къуват авай къукърумрин хьтин ван атана: — Гьалелуя! Тариф ая Реббидин! Чи Ребби Аллагьди вири дуьньядин Агъади, пачагьвал ийир вахт алукьнава.

⁷Ша чна шадвал, хвешивал ийин! Ребби Аллагьдин тарифар ийин! КӀелен мехъерни жезва мукьвара, Адан сусани [16] вич гьазурнава.

⁸Ингье сусахъни галчук авунва михьи ва экуь назнази дуьгуьр. Назнази, лагьайтӀа, Месигьдиз талукьбурун гьахъ-михьивилин лишан я.

⁹Заз малаикди лагьана: — Кхьихь: КӀелен мехъерик эвернавайбур бахтавар я. Ахпа малаикди заз хълагьна: — Ибур Аллагьдин халисан гафар я.

¹⁰Зун адаз икрам авун патал адан кӀвачерив ярх хьана. Амма ада лагьана: — Килиг гьа, заз икрам ийимир. Зани, гьа вуна хьиз ва Исади гайи Шад Хабардикай шагьидвал авур ви стхайри-вахари хьиз, Аллагьдиз къуллугъзава. Аллагьдиз икрам ая. Исади ачухай гьакъикъатди пайгъамбаррик руьгь кутазва.

¹¹Ингье, заз ахъа хьанвай цавай лацу шив акуна. Мияхдин тӀвар Вафа гвайди ва Халисанди тир. Ада тухузвай дяведа адалат хуьзва. Ада ийизвай дуванни гьахъ-михьиди я.

¹²Адан вилер куькӀвена кузвай цӀай хьиз тир. Адан кьилел гзаф тажар алай. Адал тӀвар кхьенвай. А тӀвар са Гьадалай Вичелай гъейри садазни чизвачир.

¹³Адан парталар михьиз ивидай хьанвай. Адан тӀвар «Аллагьдин Гаф» тир.

¹⁴Адан гуьгъуьна лацу шивераллай малаикрин кьушун къвезвай. Малаикрал лацу ва михьи назназияр алай.

¹⁵Мияхдин сивяй халкьар терг авун патал хци тур акъатзавай. Ада халкьар ракьун чумахъдалди хуьда. Ада вири дуьньядин Агъа тир Аллагьдин хъиленни гъазабдин чехир хкудзавай къванцик акатай инсанрал кӀвач илисзавай.

¹⁶Адан ятур кӀевзавай парталдин ценцел тӀвар кхьенвай: пачагьрин Пачагь, агъайрин Агъа.

¹⁷Заз ракъинал акъвазнавай са малаик акуна. Ада кӀеви ванцелди цавун кьакьанра лув гузвай къушариз лагьана: — Ша, Аллагьдин чӀехи межлисдиз кӀватӀ хьухь.

¹⁸Ана пачагьрин мейитар, къуват авайбурун мейитар, кьушунрин кьилевайбурун мейитар, шиверинни абурал ацукьнавайбурун мейитар, вири уьзденрин ва лукӀарин мейитар, гъвечӀибурун ва чӀехибурун мейитар неъ.

¹⁹Заз ничхирни чилин пачагьар ва абурун кьушунар акуна. Абур Мияхдихъ галаз ва адан кьушундихъ галаз дяве авун патал гьазур хьанвай.

²⁰Ничхирни тапан пайгъамбар кьведни санал кьуна. И тапан пайгъамбарди ничхирдин вилик керемат-ишараяр къалурзавай. Ада и аламатралди чпел ничхирдин тагъма алаз адан кӀалубдиз икрамзавай инсанар алцурнай. Ничхирни тапан пайгъамбар кьведни чан аламаз цӀай кьуна кузвай гугурт авай вириз гадарна.

²¹Амайбур Мияхдин сивяй акъатзавай турунив яна кьена. Кьейибурун мейитар тӀуьна вири къушар тух хьана.