Read Lezgi New Testament – ЦӀийи Икьрар Керемат 2 Bible Online

Керемат 2 - Lezgi New Testament – ЦӀийи Икьрар bible

Керемат 2

¹Эфес шегьерда авай иманийрин кӀватӀалдин малаикдиз кхьихь: «ЭрчӀи гъиле ирид гъед кьуна ирид чирагъгандин юкьва аваз Къекъвезвайда ваз икӀ лугьузва:

²— Куь крар, куь зегьметар, куь сабур Заз чизва. Квевай чӀуру рекье авайбур эх тежедайдини Заз чида. Куьне „Чун илчияр я“ лугьуз, чеб илчияр туширбур синагъ авурла, абур квез тапархъанар яз жагъанай.

³Куьне гзаф четинвилер эхна, куьне сабур хвена. Заз килигна куьне гзаф азиятар чӀугунатӀани, куьн къуватдай аватнач. Вири и крарни Заз чида.

⁴Амма са карда Зун квелай рази туш: гила квез Зун сифтедай хьиз кӀанзамач.

⁵Куьне куьн чӀуру тахьанмаз гьихьтинбур тиртӀа рикӀел хкваш. Туба ая, куьне эвелдай авур хьтин крар ая. Тийиз хьайитӀа, и Зун куь патав къведа ва куь чирагъган алай чкадилай алудда.

⁶Авайвал лагьайтӀа, куь хъсанвал ам я хьи, Заз такӀандай НикӀалан[2] терефдаррин крар квезни такӀанда.

⁷Руьгьди иманийрин кӀватӀалриз вуч лугьузватӀа, япар авайбуруз ван атурай: Аллагьдин женнетдин юкьвал алай уьмуьрдин тарцин бегьерар За Аллагьдиз акси крарал гъалибвал къачудай гьар садав нез тада!»

⁸Симуьрне шегьерда авай иманийрин кӀватӀалдин малаикдизни кхьихь: «Эвелдай кьена, гила, ингье, чан хтанвай Сифтегьанда ва Эхиримжида икӀ лугьузва:

⁹— Заз квехъ дерт-гъам авайди, куьн кесиб тирди чизва. Авайвал лагьайтӀа, квехъ девлет ава. Чпи чпикай „Чун чувудар я“ лугьудайбуру квекай чӀурукӀа ийизвай ихтилатарни Заз чида. Амма абур халисан чувудар туш, абур иблисдин межлисдиз кӀватӀ хьанвайбур я.

¹⁰Куьне эхна кӀанзавай крарикай квез кичӀе жемир. Чир хьухь, куьн синагъ авун патал иблисди куь арадай са шумуд кас къазаматдиз вегьида. Са цӀуд юкъуз квез гъам-хажалат жеда. Рекьидалди Заз вафа хуьх, За квез эбеди уьмуьрдин таж гуда.

¹¹Руьгьди иманийрин кӀватӀалриз вуч лугьузватӀа, япар авайбуруз ван атурай: кьвед лагьай гъилера кьиникьикай Аллагьдиз акси крарал гъалибвал къачудай са касдизни зиян жедач».

¹²Пергам шегьерда авай иманийрин кӀватӀалдин малаикдизни кхьихь: «Кьве патайни хци тия авай тур гвайда икӀ лугьузва:

¹³— Куьне иблисдин тахт[3] авай чкада уьмуьр тухузвайди Заз чизва. ГьакӀ ятӀани, куьн Заз мукьва яз ама. Иблис авай куь маканда Зи паталай вафа гваз шагьидвал авур АнтипӀ яна кьейи йикъарани куьне Закай кьил къакъуднач. И карни Заз чизва.

¹⁴Амма Зун квелай са бязи крара рази туш — ана квехъ Билъаман несигьатрал амалзавайбур ава: Билъама, лагьайтӀа, къадим вахтара Балакьав Исраилдин халкь рекьяй акъудиз туна. Абуруз бутриз авунвай къурбандар нез ва явавилер ийиз чирна.

¹⁵Квехъни НикӀалан терефдаррин тарсар кьазвайбур ава.

¹⁶Ша, куьне туба ая, гунагькарар жемир, тахьайтӀа, и мукьвара Зун куь патав къведа ва Зи мецин туруналди Зи Гафар чӀурзавайбурухъ галаз дяведиз экъечӀда.

¹⁷Руьгьди иманийрин кӀватӀалриз вуч лугьузватӀа, япар авайбуруз ван атурай: Аллагьдиз акси крарал гъалибвал къачудайдав За сир квай мангьудин дад акваз тада ва адаз За лацу къван багъишда. Къванцел садазни течидай цӀийи тӀвар кхьенваз жеда. Ам нин тӀвар ятӀа, анжах гьа къван гьатайдаз чир жеда».

¹⁸Туьатира шегьерда авай иманийрин кӀватӀалдин малаикдизни кхьихь: «Кузвай цукӀвар хьтин вилер ва цӀарцӀар гузвай лацу буьруьнждиз ухшар кӀвачер авай Аллагьдин Хци икӀ лугьузва:

¹⁹— Куь крар, куьне Заз къалурзавай куь муьгьуьббат, куьне Заз ийизвай къуллугъ, куьне Захъ ийизвай иман ва куь сабур Заз чизва. Куьне эхиримжи вахтара ийизвай крар зурба тирдини Заз чизва. Сифтедай Зи иман кьуна куьне авур крар акьван чӀехибур тушир.

²⁰Амма Зун квелай рази туш: Язебел лугьудай са папа вич Аллагьдин мецелай рахазва лугьузва, Зи лукӀариз тапан несигьатар гузва, абур рекьяй акъудзава, абурув явавилер ийиз ва бутриз авунвай къурбандар нез тазва. Вуна лагьайтӀа, а папаз рехъ гузва.

²¹За а папаз Аллагьдин рекьел атун патал вахт гана, амма адаз вичин рекьелай Аллагьдин рекьел къвез кӀанзавач.

²²Ингье За ам месиз язава. Адахъ галаз зинавал авурбуруни туба тавуртӀа, За гьабурузни чӀехи бедбахтвал ракъурда.

²³За а папан пата авайбурувни ажал агакьарда. Гьа чӀавуз иманийрин вири кӀватӀалар Заз инсанрин рикӀерни абурун фикирар аквазвайди тирдан гъавурда Зун акьада. За гьар садав вичи авур крарин гьахъ агакьарда.

²⁴Куьне, Туьатирада авай муькуьбуру, а папа гузвай несигьатрал амал ийизвач. Иблисдин крарин тапан деринвилерни квез чизвач. Гьавиляй За квез лугьузва: За куьн мад кӀевера твадач.

²⁵Анжах квехъ авай иман Зун къведалди кӀевиз яхъ.

²⁶Эхирдалди Зи къастунал амал авуна, иблисдал гъалибвилер къачудайбурув За халкьарин винел чӀехивал ийиз тада.

²⁷Абуру халкьарал ракьун чумахъ гъиле аваз агъавал ийида. Халкьар хъенчӀин къапар хьиз кӀус-кӀус жеда.

²⁸Зи Бубадин патай гьукум Зи Гъилени гьакӀ гьатайди я. Гъалиб жедайдаз За экуьнин гъедни гуда.

²⁹Руьгьди иманийрин кӀватӀалриз вуч лугьузватӀа, япар авайбуруз ван атурай».