Read Lezgi New Testament – ЦӀийи Икьрар Керемат 21 Bible Online

Керемат 21 - Lezgi New Testament – ЦӀийи Икьрар bible

Керемат 21

¹Заз цӀийи цавни цӀийи чил акуна. Сад лагьай цавни сад лагьай чил квахьнавай, я гьуьлни амачир.

²Заз пак шегьер Ярусалим акуна, Аллагьдин патавай цаварай эвичӀзавай цӀийи Ярусалим. Ам чам патал чӀагурна[19] гьазурнавай свас хьиз авай.

³Заз тахтунихъай къвезвай кӀеви ван атана: — Ингье Аллагьдин чардах, гила ам инсанрив гва. Аллагьди инсанрихъ галаз уьмуьр тухуда. Абурукай — Аллагьдин халкь, Аллагьдикайни абурун Аллагь жеда. Аллагь Вични инсанрихъ галаз жеда.

⁴Аллагьди инсанрин вилерай атай гьар са нагъв михьда. Мад я ажал, я шел, я цӀугъ, я азар хъжедач, вучиз лагьайтӀа виликдай хьайи кьван крар алатна фенва.

⁵Тахтунал Ацукьнавайда лагьана: — Ингье За вири цӀийиз халкьзава. Ахпа Ада заз лагьана: — И гафар кхьихь. Абур гьахъбур ва дуьзбур я.

⁶— АкьалтӀна! — давамарна Ада. — Зун Алфани Омега я, Зун Эвелни Эхир я. Цихъ къанихдаз За уьмуьр гудай булахдай яд гьавая гуда.

⁷Закай Аллагьдиз акси крарал гъалибвал къачудай гьар касдин Аллагь жеда, а касдикайни Зи хва жеда.

⁸КичӀерхъанарни хаинар, мурдарбурни ивикъичар[20], явабурни суьгьуьрчияр, бутпересарни вири тапархъанар цӀайни гугурт авай вириз аватда. И вир кьвед лагьай ажал я.

⁹Ирид завалдив ацӀанвай ирид сукӀра гвай ирид малаикдикай сад зи патав атана. — Ша, за ваз КӀелен свас къалурда, — лагьана ада.

¹⁰Зак Пак Руьгь акатна. Малаикди зун чӀехи ва кьакьан дагъдиз хкажна. Заз цаварай Аллагьдин патавай чилел эвичӀзавай пак Ярусалим шегьер къалурна.

¹¹Шегьердал алай Аллагьдин баркаллади нур гузвай. Адан нур буьлуьлди[21] хьиз цӀарцӀар гузвай яспис лугьудай багьа къаш хьиз аквазвай.

¹²Адахъ чӀехи ва кьакьан пару галай, паруда цӀикьвед вар авай, гьар са варцел са малаик акъвазнавай. Варарал Исраилдин рухвайрин цӀикьвед тайифадин тӀварар кхьенвай.

¹³РагъэкъечӀдай патахъай пуд вар, кефер патахъай пуд вар, кьибле патахъай пуд вар, рагъакӀидай патахъай пуд вар авай.

¹⁴Шегьердин пару цӀикьвед дибдал акъвазнавай, абурал КӀелен цӀикьвед илчидин тӀварар кхьенвай.

¹⁵Захъ галаз рахай малаикдив шегьер, варар ва пару алцумун патал къизилдин лаш гвай.

¹⁶Шегьердихъ кьуд пӀипӀ авай. Адан кьуд цлан яргъивални сад тир. Малаикди лашуналди шегьер алцумайла, цӀикьвед агъзур истад хьана. Шегьердин яргъивал, гьяркьуьвал ва кьакьанвал сад тир.

¹⁷Шегьердин парудин кьакьанвал алцумайла, вишни яхцӀурни кьуд кьуьнт акъатна. Кьуьнт инсандин уьлчме тир. Малаикди инсанрин уьлчмейрал алцумзавай.

¹⁸Шегьердин пару ясписдикай эцигнавай. Шегьер михьи къизилдикай тир, ада буьлуьлди хьиз нур гузвай.

¹⁹Шегьердин цлан дибар багьа къашаралди чӀагурнавай[22]. Сад лагьай диб — къацу ясписдикай, кьвед лагьайди вили сафирдикай, пуд лагьайди — яру гьакьекьдикай, кьуд лагьайди экуь-къацу зумруддикай,

²⁰вад лагьайди яру-махъу униксдикай, ругуд лагьайди — туракь сердаликдикай, ирид лагьайди яру хирзалитдикай, муьжуьд лагьайди къацу-вили бериллдикай, кӀуьд лагьайди рекӀвеба-хъипи тапаздикай, цӀуд лагьайди къацу-къизилверекь хризапраздикай, цӀусад лагьайди икьи-яру лалдикай, цӀикьвед лагьайди фичӀи-яру аметистдикай тир.

²¹Гьар са вар чӀехи сагъ мержандикай авунвай. Шегьердин куьчеяр михьи къизилдикай тир, абуру, буьлуьлди хьиз, нур гузвай.

²²Заз шегьерда Аллагьдин КӀвал акунач. Адан КӀвал вири дуьньядин Агъа тир Ребби Аллагь ва КӀел я.

²³Шегьер экуь авун патал я рагъ, я варз герек туш. Ам Аллагьдин баркаллади экуь ийизва. КӀел шегьердиз экв гузвай чирагъ я.

²⁴Вири халкьари шегьердай къвезвай экуьник уьмуьр тухуда. Чилин пачагьри шегьердиз чпин хазинаяр гъида.

²⁵Югъди адан варар ахъаз амукьда ва агалдач, вучиз лагьайтӀа ана йиф стӀунни жедач.

²⁶Халкьари шегьердиз рекӀв ва девлетар гъида.

²⁷Шегьердиз чиркинвал квай са затӀни гьахьдач, я аниз табвал квай ва чиркин са касни гьахьдач. Аниз анжах КӀелев гвай уьмуьрдин ктабда тӀварар кхьенвайбур гьахьда.