Read Lezgi New Testament – ЦӀийи Икьрар Керемат 22 Bible Online

Керемат 22 - Lezgi New Testament – ЦӀийи Икьрар bible

Керемат 22

¹Ахпа заз малаикди Аллагьдин ва КӀелен тахтунин патавай къвезвай михьи вацӀ къалурна. ВацӀа уьмуьр гудай яд авай. Ам алцифна ваз, экв алаз, буьлуьл[23] хьиз, аквазвай.

²И вацӀ шегьердин кьилин куьчедин юкьвай авахьзавай. ВацӀун кьве патани уьмуьр гудай майваяр гъизвай тарар экъечӀнавай. А тарар цӀикьведра майваяр гъидайбур тир. Абуру гьар вацра бегьерар гъизвай. Тарарин пешер вири халкьар дири хъувун патал тир.

³Шегьерда мад Аллагьдин лянет алай са затӀни хъжедач. Ана Аллагьдинни КӀелен тахт жеда. Аллагьдин лукӀари Адаз ибадат ийида.

⁴Абуруз Аллагьдин чин аквада. Абурун пелерал Аллагьдин ТӀвар кхьенвай.

⁵Ана мад йиф хъжедач. Абуруз мад я чирагъ, я ракъинин экв герек жедач. Абуруз экв Ребби Аллагьди гуда, абуру даим яз пачагьвал ийида.

⁶Малаикди заз лагьана: — И гафар гьахъбур ва дуьзбур я. Пайгъамбаррин руьгь идара ийизвай Аллагьди Вичин лукӀариз и мукьвал вахтара вуч жедатӀа къалурун патал малаик ракъурна.

⁷Исади лагьана: — Килиг гьа, Зун гьа и мукьвара хкведа. И ктабда лагьанвай пайгъамбарвилин гафарал амал ийидайбур бахтавар я.

⁸Зун, Ягья, и кар акурди ва ван хьайиди я. И кар акурла ва ван хьайила, заз и крар къалурай малаикдин вилик зун адаз икрам авун патал адан кӀвачерив ярх хьана.

⁹Амма ада лагьана: — Килиг гьа, заз икрам ийимир. Зани, гьа вуна хьиз, ви стхаяр тир пайгъамбарри хьиз, и ктабда лагьанвай гафарал амал ийизвай ксари хьиз, Аллагьдиз къуллугъзава. Аллагьдиз икрам ая.

¹⁰Ахпа ада заз лагьана: — И ктабда лагьанвай пайгъамбарвилин гафар инсанрикай чуьнуьхмир. Вахт мукьвал хьанва.

¹¹Пис крар ийизвай ксари къуй чпин крар давамаррай. Мердимазарри къуй чиркинвилер авурай. Гьахъ-михьи ксари мадни гьахъ-михьивилер авурай. Аллагьдиз талукьбур мадни Адаз талукь яз амукьрай.

¹²Реббиди лагьана: — Ингье, гьа и мукьвара Зун хкведа. За гьар са касдив вичи авур крарин гьакъи ахгакьарда.

¹³Зун Алфани Омега я. Зун Эвелни Эхир я.

¹⁴Аллагьдин тагькимрал амал ийиз чпин михьивилер ийизвай ксар бахтавар я. Абуруз шегьердин варарай аниз гьахьна уьмуьр гудай тарцелай бегьерар недай ихтияр жеда.

¹⁵Мердимазарарни суьгьуьрчияр, явабурни ивикъичар, бутпересарни нагьахъ крарал рикӀ алай ва тапархъан тир гьар са кас шегьердилай къеце амукьда.

¹⁶— За, Исади, Зи малаик ракъурнава. Ада иманийрин кӀватӀалар патал и ктабда кхьенвай крарикай шагьидвал ийида. Зун Давудан Хва я. Зун нур гузвай экуьнин гъед я.

¹⁷Руьгьдини суса санал лугьузва: — Хъша иниз! И ван хьайи гьар касдини Исадиз «Хъша!» лугьурай. Къуй къанихди атурай, кӀандайда уьмуьрдин яд гьавая къачурай.

¹⁸И ктабда авай пайгъамбарвилин гафар ван хьайи гьар садаз за тагькимзава: ина кхьенвай гафарал са вуч ятӀани алава хъийидай касдиз Аллагьди гьа и ктабда кхьенвай хьтин завалрални завалар алава хъийида.

¹⁹Сада и ктабда авай пайгъамбарвилин гафарикай са вуч ятӀани гадарайтӀа, Аллагьди а касдин пай атӀуда. А кас и ктабда кхьенвай пак шегьердиз гьахьдач ва ада ана авай уьмуьр гудай тарарин бегьерар недач.

²⁰И вири крарикай шагьидвал ийизвай Исади квез лугьузва: — Эхь, зун гьа и мукьвара хкведа. Амин. Хъша, Ребби Иса!

²¹Къуй даим яз Ребби Исадин берекат квехъ виридахъ галаз хьурай. Амин.