Read Lezgi New Testament – ЦӀийи Икьрар Керемат 3 Bible Online

Керемат 3 - Lezgi New Testament – ЦӀийи Икьрар bible

Керемат 3

¹Сердер шегьерда авай иманийрин кӀватӀалдин малаикдизни кхьихь: «Аллагьдилай атанвай ирид руьгьни ирид гъед гвайда лугьузва: — Заз куь крар чизва. Вирида квел чан аламайдай кьазва, амма куьн кьенва.

²Ажалдин ахварай ават! Куь хкатзавай чан уьмуьрдив ахцӀура. Заз куь крарни Зи Аллагьдин вилик тамамбур яз аквазвач.

³Куьне гьихьтин весиятарни несигьатар кьабулнайтӀа, рикӀел хкваш, абур кьилиз акъуд, туба ая. Куьн уях тахьайтӀа, Зун чинебан угъри хьиз куь патав къведа. Гьи чӀавуз Зун куь патав къведатӀа, квез гьич чирни жедач.

⁴Авайвал лагьайтӀа, вахъ Сердерда чеб чиркинарнавачир са шумуд кас ава. Абур лацу парталар алукӀна Захъ галаз къекъвез жеда. Абур и кардиз лайих я.

⁵Аллагьдиз акси крарал гъалибвал къачудай гьар сада лацу парталар алукӀда. За гьахьтиндан тӀвар уьмуьрдин ктабдай акъуддач. Зи Бубадин ва Адан малаикрин виликни За ам кьабулда, ам Зи рикӀ алай кас я лугьуда.

⁶Руьгьди иманийрин кӀватӀалриз вуч лугьузватӀа, япар авайбуруз ван атурай».

⁷Филаделфи шегьерда авай иманийрин кӀватӀалдин малаикдизни кхьихь: «Давуд пачагьдин куьлег гвайди атанва, а куьлегдив ахъа авур дапӀарар садавайни агал ийиз хъжедач. Гьа куьлег гвай Халисанда ва Пакда лугьузва квез:

⁸— Заз куь крар чизва. Ингье, За куьн патал ракӀар ахъайнава. Садавайни ам агализ жезвач. Квехъ чӀехи къуват авач, ятӀани куьне Зи Гаф кьуна, куьне Зи ТӀварцӀикай кьил къакъуднач.

⁹Ингье, чпи чпикай „Чун чувудар я“ лугьуз, амма чеб чувудар тушиз тапарзавайбур, иблисдин межлисдиз кӀватӀ хьанвайбур, атана куь кӀвачерив метӀерал акъвазвайвал ийида За. Абуруз Заз куьн кӀан хьанвайди чир жеда.

¹⁰За квез „эха“ лагьана эмир гайила, куьне эхна. Гьавиляй чилин вири инсанар синагъ ийидай вахт атайла, За куьн къада-баладикай хуьда.

¹¹Зун гьа и мукьвара къведа. Садани куь таж чуьнуьх тийидайвал, жувахъ авай иман хуьх.

¹²Аллагьдиз акси крарал гъалибвал къачудай гьар садакай За Зи Бубадин КӀвале даяхдин гул ийида. Ам мад анай маса патахъ ахкъатдач. За адал Зи Аллагьдин ТӀвар, Зи Бубадин патавай цаварилай эвичӀзавай цӀийи Ярусалим шегьердин тӀвар ва зи цӀийи тӀвар кхьида.

¹³Руьгьди иманийрин кӀватӀалриз вуч лугьузватӀа, япар авайбуруз ван атурай».

¹⁴Ладикей шегьерда авай иманийрин кӀватӀалдин малаикдизни кхьихь: «Амин, яни Гьакъикъат тӀвар алайда, вафа гвай ва халисан шагьидди, Аллагьди халкь авунвай кьван затӀарин бине тирда икӀ лугьузва:

¹⁵— Заз куь крар чизва. Куьн я къайи туш, я чими. Куьн къайи тиртӀа, ва я куьн чими тиртӀа, вуч хъсан тир!

¹⁶Амма куьн къуьруьгъуьм я. Куьн я чимини туш, я къайини. Гьавиляй За куь тӀвар Зи сивяй вегьида.

¹⁷Вучиз лагьайтӀа, куьне квекай „чахъ девлет ава, чаз са затӀни кими туш“ лугьузва. Амма квез куьн бахт авачирбур ва язухбур тирди, куьн са затӀни авачирбур, буьркьуьбур ва кьецӀилбур тирди чизвач.

¹⁸За квез, квехъ девлет хьун патал, Завай михьи къизил маса къачу лугьузва. Куь кьецӀилвили квел гъизвай айиб таквадайвал За квез, Завай маса къачуна, лацу парталар алукӀун меслятзава. Куь вилеризни аквадайвал, абуруз, Завай маса къачуна, дарман квай гъуруш ягъ.

¹⁹Заз кӀанибуруз За абурун рехнеяр къалурзава ва абуруз жазани гузва. ГьакӀ хьайила рикӀ хци хьухь ва туба ая.

²⁰Килиг гьа, Зун ракӀарихъ гала, За ракӀар гатазва: Зи ван хьана, ни Заз ракӀар ахъаяйтӀа, Зун гьадан кӀвализ гьахьда, За адахъ галаз санал фу неда, адани Захъ галаз неда.

²¹Зун гьикӀ гъалиб хьанатӀа, гьикӀ Зи Бубадихъ галаз Адан тахтунал ацукьнатӀа, Аллагьдиз акси крарал гъалибвал къачудай гьар садни За гьакӀ Зи патав ацукьарда.

²²Руьгьди иманийрин кӀватӀалриз вуч лугьузватӀа, япар авайбуруз ван атурай».