Read Lezgi New Testament – ЦӀийи Икьрар Керемат 6 Bible Online

Керемат 6 - Lezgi New Testament – ЦӀийи Икьрар bible

Керемат 6

¹Заз КӀеле къаргъудал алай ирид муьгьуьрдикай сад лагьайди алудайди акуна. Заз чан алай кьуд затӀуникай сада цавун къукърумрин ванцелди икӀ лугьузвай ван атана: — Инал ша!

²Ингье, заз лацу шив акуна, адал гъиле чемерукӀ авай сад ацукьнавай. Мияхдиз[5] пачагьдин тажни гана. Ам гъалиб хьанвайди хьиз атанай. Ам гъалибвал къачуз атанвай.

³КӀеле кьвед лагьай муьгьуьр алудайла, заз чан алай кьвед лагьай затӀунин ван атана. — Инал ша!

⁴Гила цӀай хьтин куьрен шив атана. Адал ацукьнавайдаз чилел инсанри сада сад рекьиз дявеяр ийидай ихтияр гана. Адан гъиле чӀехи турни туна.

⁵КӀеле пуд лагьай муьгьуьр алудайла, заз чан алай пуд лагьай затӀунин ван атана: — Инал ша! Ингье, заз чӀулав шив акуна. Адал миях алай. Адан гъиле терезар авай.

⁶Заз чан алай кьуд затӀунин арадай ихьтин ван атана: — Са йикъан гьакъидин къимет — са киле къуьл хьурай; са йикъан гьакъидин къимет — тек пуд киле мух хьурай! Зейтун тарар[6] авай чкаярни ципицӀбагълар барбатӀ мийир!

⁷КӀеле кьуд лагьай муьгьуьр алудайла, заз чан алай кьуд лагьай затӀунин ван атана: — Инал ша!

⁸Ингье, заз мейитдин ранг алай шив акуна, адал Ажал тӀвар алай сад ацукьнавай. Адан гуьгъуьналлаз агъа дуьнья къвезвай. Абуруз кьведаз чилин инсанрин кьудай са пай туруналди ва кашалди, азарралди ва ничхиррин къармахралди тергдай ихтиярар гана.

⁹КӀеле вад лагьай муьгьуьр алудайла, заз къурбангандин[7] кӀаник квай руьгьер акуна. Абур Аллагьдин Гафуникай шагьидвал авурвиляй яна кьейибурун руьгьер тир.

¹⁰Руьгьери кӀеви ванцелди цӀугъ авуна: — Я Вири Ихтияррин Иеси! Я Пакди ва Халисанди. Чилел чи иви авадарай инсанрин дуван тавуна ва абурулай кьисас къахчун тавуна Вун гьикьван чӀавалди акъвазда?

¹¹Ягъна кьейибурув гьар садав лацу парталар вугана. Абуруз чилел аламай чпин юлдашрикай, стхайрикай ва вахарикай, са кьадарбур яна рекьидалди са тӀимил вахтунда секин хьана акъваз лагьана.

¹²Заз КӀеле ругуд лагьай муьгьуьр алудайди акуна. ЧӀехи залзала хьана, рагъ, ших хьиз, чӀулав хьана, ацӀай варзни, иви хьиз, — яру.

¹³Гъетер цавай чилел аватна, налугьуди гару юзурзавай инжилдин тарци вичин чранвачир инжилар гадарзава.

¹⁴Цав къаргъу хьтиндаз элкъвена. Дагъларни гьуьлерал алай къураматар алай чкадилай юзана.

¹⁵Чилин пачагьар, везир-векилар, девлет авайбур, кьушунрин кьилевайбур, къуват авайбур, гьар са лукӀ ва азад инсан магъарайрани дагъларин хъиткьерра чуьнуьх хьана.

¹⁶Абуру дагъларизни къванериз лугьузвай: — Чи винел ават. Чун тахтуна Ацукьнавайдан вилерикай ва КӀелез атанвай хъилекай кӀев ая.

¹⁷Тахтунал Ацукьнавайдаз ва КӀелез хъел къведай чӀехи югъ алукьнава. Нивай а хъилен вилик акъвазиз жеда кьван?