Read Lezgi New Testament – ЦӀийи Икьрар Керемат 8 Bible Online

Керемат 8 - Lezgi New Testament – ЦӀийи Икьрар bible

Керемат 8

¹КӀеле ирид лагьай муьгьуьр алудайла, цаварал са зур сятда кьван секинвал акьалтна.

²Заз Аллагьдин вилик акъвазнавай ирид малаик акуна. Абурув гьар садав са къаргъу вугана.

³Ахпа са маса малаик атана, къурбангандин вилик акъвазна. Адан гъиле атирар кудай сукӀра авай. Адав са гзаф атирарни вугана. Ада атирар Аллагьдиз талукьбурун дуьаярни галаз тахтунин вилик квай къизилдин къурбангандал эцигна.

⁴Атирар кана акъатзавай гум Аллагьдиз талукь ксарин дуьайрихъ галаз малаикдин гъиле авай сукӀрадай Аллагьдин вилик хкаж хьана.

⁵Малаикди атирар кузвай сукӀра хкажна, ам къурбангандилай къачунвай кузвай цукӀварив ацӀурна, ахпа абур чилел ичӀирна. Гьа чӀавуз гьарай-эвер акъатна, къукърумарни цӀайлапанар яна. Чилел залзала хьана.

⁶Гьар садав са къаргъу гвай ирид малаик къаргъуяр ягъиз гьазур хьана.

⁷Сад лагьай малаикди къаргъу яна. Иви какахьнавай харни цӀай акъатна чилел авахьна. Чилин пудай са паюнал алай тарарни къацу векь кана.

⁸Кьвед лагьай малаикди къаргъу яна. ЦӀай кьуна кузвай чӀехи дагъ гьуьлуьз аватна. Гьуьлуьн пудай са паюникай иви хьана.

⁹Гьуьле уьмуьр тухузвай чан алай кьван гьайванрин пудай са пай кьена, гимийрин пудай са пайни терг хьана.

¹⁰Пуд лагьай малаикди къаргъу яна. Кузвай чирагъдиз ухшар чӀехи гъед цавай аватна. Ам вацӀарин ва булахрин пудай са паюнал алукьна.

¹¹И гъетрен тӀварни Явшан тир. Пудай са пай вацӀарани булахра авай яд явшан хьиз туькьуьл хьана. Туькьуьл хьайи яд хъвайивиляй гзаф инсанар кьена.

¹²Кьуд лагьай малаикди къаргъу яна. Ракъининни, вацранни, гъетеринни пудай са пай кьуна. Абур мичӀи хьана. Йикъан пудай са пай экуьникай магьрум хьана, йифен пудай са паюна вацрани гъетери экв ганач.

¹³Заз цавун юкьвай тӀуз лув гузвай лекь акуна ва адан ван хьана. — Гуж я, гуж я, гуж я чилел уьмуьр тухузвай квез муькуь пуд малаикдин къаргъуйрин ванери ийидайди! — лагьана ада кӀеви ванцелди.