Read Lezgi New Testament – ЦӀийи Икьрар Керемат 9 Bible Online

Керемат 9 - Lezgi New Testament – ЦӀийи Икьрар bible

Керемат 9

¹Вад лагьай малаикди къаргъу яна. Заз цавай чилел аватай гъед акуна. Малаикдив гургусдин[8] куьлег вуганвай.

²Ада гургусдин къуй ахъайна. Анай чӀехи пичинай хьиз гум акъатна. Гургусдай акъатай гумадик рагъ ва гьава чӀулав хьана.

³Гумадай гзаф цицӀерин лужар акъатна чилел фена. Абуруз акьрабриз авай хьтин къуват гана.

⁴ЦицӀериз я чилин векьериз, я маса къацу векьиз-кьалаз, я са тарциз зиян гумир лагьана, зиянар гуз хьайитӀа, анжах пелерал Аллагьдин тагъма алачир инсанриз це лагьана.

⁵ЦицӀериз ахьтин инсанар рекьидай ваъ, анжах вад вацран къене абуруз азаб-азият ийидай ихтияр гана. ЦицӀери гудай азабар акьрабди хуз гайидай я.

⁶А йикъара инсанар чпин ажалдихъ къекъвез жеда, амма абуруз жагъидач. Абуруз чеб кьена кӀан жеда, амма ажал абурукай катда.

⁷Чпин акунралди цицӀерин луж дяведиз гьазурнавай шиверин рамагдиз ухшар тир; цицӀерин кьилерал къизилдин тажар хьтинбур алай, абурун чинар, лагьайтӀа, инсанрин чинриз ухшар тир.

⁸Абурун чӀарар папан чӀарар хьиз тир, сарар асландин кӀирериз ухшар тир.

⁹Абурал ракьукай авунвай хьтин кьеркьер алай. Абурун луварин ван дяведиз физвай шиверихъ галай дапурагрин чархарин ван хьиз тир.

¹⁰ЦицӀерин тумарихъ, акьрабрин тумарихъ хьиз, хузар авай. ЦицӀериз вад вацран къене инсанриз зиянар гунин ихтияр ганвай.

¹¹ЦицӀерин кьиле гургусдин пачагьвалзавай малаик авай. Адан тӀвар чувуд чӀалалди Абадан, юнан чӀалалдини Апалуьн тир. Яни Тергдайди.

¹²Сад лагьай гуж алатна. Ингье гила адан гуьгъуьналлаз мад кьве гуж къведа.

¹³Ругуд лагьай малаикди къаргъу яна. Заз Аллагьдин вилик квай къурбангандин кьуд крчунилай къвезвай са ван атана.

¹⁴А ванци къаргъу гвай ругуд лагьай малаикдиз лагьана: — ЧӀехи Эфрат вацӀун патав кутӀуннавай кьуд малаик ахъая.

¹⁵Инсанрин пудай са пай терг ийиз эгечӀдай сят ва югъ, варз ва йис патал гьазурнавай кьуд малаикни ахъайна.

¹⁶Эфратдин патавай шиверал алайбурун кьушун экъечӀна. Заз аскеррин кьадар гьикьван ятӀа ван хьана. Абуруз кьадар авачир.

¹⁷Заз шиверни мияхар ихьтинбур яз акуна: мияхрал цӀай хьтин яру, мичӀи-вили ва гугурт хьиз хъипи кьеркьер алай. Шиверин кьилер асланрин кьилер хьиз тир. Абурун сиверай цӀайни, гугуртни гум акъатзавай.

¹⁸И пуд завалдик, шиверин сиверай акъатзавай цӀукни, гумадикни гугуртдик инсанрин пудай са пай телеф хьана.

¹⁹Шиверин къуват, лагьайтӀа, абурун сиверани тумара авай. Абурун тумарин чкадал гъуьлягъар алай. Шивери гъуьлягърин кьилералди зиянар гузвай.

²⁰И завалрик кьин тавур инсанри чпи туькӀуьрай бутриз икрам ийизмай. Абуру са затӀни таквадай, са куьнинни ван текъведай, я къекъвезни тежедай бутриз, къизилдикай, гимишдикай, буьруьнждикай, къванцикай ва кӀарасдикай авунвай бутриз ва чӀуру жинерриз къуллугъзамай.

²¹А инсанри маса ксар ягъиз рекьин, суьгьуьрчивилер, явавилер, угъривилер авун акъвазарнавачир.