Read Loma MAFIYU 10 Bible Online

MAFIYU 10 - Loma bible

MAFIYU 10

¹Ziizɛ é ná kala dopo puugɔ kai felegɔitiɛ lilini é gaa‐ƃaa ʋe te ya ga te gɔʋɛ yowũa ƃɛ numaa wulu tiɛ seeƃɛ valo tiɛ seeƃɛ vea lɔtɔ zu wodo.

²Keelaitiɛ ƃɔɔ ta laa‐zeigitiɛ ɣa: Mamaa wũgi pa ka ga Saimɔ nii daa ga Pite é vɛɛ déɣei Ɛĩdulu va; Zɛbɛdi dui Jĩi é vɛɛ déɣei Jɔ̃ va;

³Fele ƃɔga Bɔtalɛmu; Taamɔ ƃɔga Mafiyu nii é ɣɛ ga gɔmɛti naʋolo‐wulo nui; Afia dui Jĩi vɛɛ Taadia va;

⁴Saimɔ nii é ɣɛ ga Keena nui é vɛɛ Dudia Asikaalia va, na ɣa ga nii é wuloni ga Ziizɛ wɔwɔ wulu wɔɔ.

⁵Ziizɛ é keela puugɔ kai felegɔitiɛ leveni ga tɛnɛ goi niitiɛ. É ɣɛni te ma, “A mɛ lɛ li vɛ nɛpɛ zii ƃalaagitiɛ te na. A mɛ lɛ wɔnɔ lɛ Sameelia lai ta zu.

⁶Kɛ̀ to mu a li niitiɛ wɔ te Yezɔi vɛlɛi wu te maʋaa wuloai ga baalagitiɛ te viligɛi.

⁷Wa ɣɛ na liizu, a wiɛ Gala goi wo wiɛ ɣɛ tea, ‘Gala ta masadai maa ƃua.’

⁸A wiɛ seeƃɛ veaitiɛ valo, wiɛ saa vea wu ziɣi saa ya, wiɛ gee zeeƃɛ kɛɛ vea valo te maa yìɛ ziɣi, wiɛ gɔʋɛ yowũa ƃɛ kɛɛ vea wulu. Nii wo maa zɔlɔ woga wɛ lɛ sɔ̃wɔ ʋeeni. A teve te mɛ lɛ geea wo ma.

⁹A mɛ lɛ li ga zɛni ɔ́ nɔ ɣɛ ga kani ɔɔ kapa wa yiiʋɛgitiɛ zu.

¹⁰A mɛ lɛ li ga bɛbɛ wa ziɛi zu ɔ́ nɔ ɣɛ ga wo li ga seɣe felegɔ ɔɔ savala ɔɔ wo tukpo siɣi. Toku ge zei ga kulovɛ bu tii‐ɣɛɛ nui vɛ ga é wɔ̃nɔgi maa zɔlɔ wo.

¹¹Na ɣa ɣɛɛ na tai nɛpɛgi wa lɛ su, nui kuloai bu bɛ́ na a máʋaa wu ɣaa ziɛ. A yɛ manui va é yɛsu wo ziɣi na.

¹²Wa ɣɛ na lɛɛzu nui na na pɛlɛi wu, a tuuyiɛ loo ga zii‐laa ɣɛ bu.

¹³Ani kulovɛ bu pɛlɛi na vɛ, pagɛ wa yii‐lai yɛ bu. Kɛ̀ ani pɛlɛi ƃɔɔ lɛ kuloni bu, pagɛ wa yii‐lai va wulu wo wɔ.

¹⁴Ani nu nɛpɛ gɛ lɛ ɣɛ yee zeini wo wu ɔɔ é wui to wo woo ma, wa ɣɛ na wulozu pɛlɛi na wu ɔɔ wa ɣɛ na wulozu tai na va, a wɔwaa ƃɛkpɛnɛ ga fifiligi.

¹⁵Gè bo wiɛ ga gaama, faa‐wo gaa‐leve ʋoloi maʋaa‐yɛ‐mai ɣa va Saadɔ̃ ƃɔga Gɔmɔɔla lai te maʋaa ma é leve tai na va.

¹⁶“A wɛlɛ! Gà wo levesu è ɣɛ nu ɣa ɣɛ baalaga levesu gozo koeiya zaama. Na ma a ɣele‐ɣele è ɣɛ velei kaalia te la, wo maa wuo faa zu è ɣɛ velei ƃiiƃɔkua te la.

¹⁷A ƃɔɔ maazu vɛtɛ ga nu ƃusea. Ƃɔvɛlaale ta wo yee la faa‐wo‐bo kpɔga ya, tiɛ wo ƃooʋe ta Ɣala‐feli wɔtaitiɛ wu.

¹⁸Na ɣa ɣɛɛ na ta wo mai gɔmɛti nu walaa laa wu ta ɣalasoga màzaƃu ma, kɛɛ ʋaa ma wo seele woo ʋe te ɣaazu é vɛɛ zii ƃalaagitiɛ va.

¹⁹Ta wo yee la na numaa ya, a mɛ lɛ zii‐zɛlɛ sei ma ga velei wa ƃɔɛ la ɔɔ zɔi wa bo. Ƃɔvɛlaale zɔi pagɛi wo bo towaa ʋe wo ya ga siɛgi na.

²⁰Ɛ́ lɛ ga wa ɣa wa ɣɛ ƃɔɛzu. Kɛ̀ wo ɣeea Gala baa ŋinɛgi ɣa yá ɣɛ faa wuuzu wo la wiɛ bo.

²¹Keea kaa ɣila ka ɣɛ ɣii yee laazu saa ya, duu keea yìɛ duu yee la saa ya. Na ɣa ɣɛɛ na lopaitiɛ ta wu ziɣi ga te ɣaa veaitiɛ tiɛ kɛ natiɛ tiɛ saa maa zɔlɔ wo.

²²Nu pɛ ka zili ga wiɛ nà daa‐zeigi mazaƃu ma. Kɛ̀ nui yá yii lɔ é yɛsu é ziiti daa‐wulo‐zu, manui ɣa valo.

²³Ani ta wo ƃɔɔla na taa ta zu, a vela wo li na wulu laa zu. Gè bo wiɛ ga gaama, wɛ lɛ woloa ga leve‐teve Yezɔi yui zu lai ƃɔgɔpɛ su nu ƃuse lui yìɛ va.

²⁴“Nui é ga kala dopo lɛ ná kala‐mɔi maazu ɔ́ nɔ ɣɛ ga nui é ga duo é ɣɛ ná nu keea nu maazu.

²⁵Pooligɛ su kala dopoi ʋaa ma ga é ɣɛ ga ná kala‐mɔi ɣavele. Pooligɛi su wɔnɔ duoi ʋaa ma ga é ɣɛ ga ná nu keea nu ɣavele. Pɛlɛ wũda nui mu ka te tiliga ga gɔʋɛ yowũa ta masa, pɔ́ pɛlɛ wu veaitiɛ ɣa tɛ lɛ faa yowũ woga ga te laa máa ɔ́ yiki?

²⁶“Na ma a mɛ lɛ luo numaitiɛ va. Toku ge zei ga faa ta nɛpɛ gɛ lɛ na máazu ɔ́ vɛɛ ɔ́ ƃe wulozu kɛnɛ ma. Ɔɔ faa ta nɛpɛ gɛ lɛ na ɔ́ loowu nu ɔ́ ƃe kwɛ̃ɛsu.

²⁷Nii gè bosu wiɛ kpidi zu, a bo podo ɣala‐kala ga. Na ɣa ɣɛɛ na nii wa mɛni é wo ga doowu‐zu ƃɔɛ, a bo ga woo maa zeezea pɛlɛ wɔma.

²⁸A mɛ lɛ luo numai niitiɛ va ta wo malɔtɔi vaa nɔ, tɔwɔ tɛ lɛ zooga tɔ wo yɛʋui wulo wo ya. Nui mugi wa luo bá tɔ ga nui yá zoo é nu yɛʋui vɛɛ málɔtɔi va é te zu ŋala‐ŋala daa‐nɔwɔ‐wo ŋada laavɛ.

²⁹Kɛ̀bɛ ta zɛƃɛ‐zɛƃɛwu felegɔ zɔ̃wɔ wulo kapa gila ma, kɛlɛi? Tɔwɔ te ɣila kpalaa lɛ loa zui ma, ani wo ɣeea Gala gɛ lɛ ʋaani bu.

³⁰Wũ deɣai ƃalaa é wo wũmɔ dodogɛ.

³¹Na ma a mɛ lɛ luo. Wo maʋaa wala levegɛ zɛƃɛ‐zɛƃɛwua va.

³²“Nii mavele ma nui nɛpɛ yá laa wu ziɣi màʋai ma é bo numaa ɣaazu, nà ƃalaa gà laa wu ziɣi manui maʋaa ma gè bo kèea Gala gaazu é gee‐zuvɛ.

³³Kɛ̀ nui nɛpɛ yá màʋaa zakpe nu ƃusea ɣaazu, nà ƃalaa gà manui maʋaa zakpe kèea Gala gaazu é gee‐zuvɛ.”

³⁴Ziizɛ ɣɛni tea, “A mɛ lɛ ɣi gaa ziɛ ga pàavɛ ga gè zii‐laa ɣɛ zui ɣa. Gè lɛ vaani ga gè zii‐laa ɣɛ zui ɣa, kɛ̀ boa zɔkpɔ ɣa gè vaa la na.

³⁵Ƃɔvɛlaale pàavɛ ga gè zunu luu vɛɛ kéea va ga kpɔɛi, gè ŋaza nu luu vɛɛ dée va ga kpɔɛi, gè duu ŋaza vɛɛ dee mɔɔ va ga kpɔɛi.

³⁶Na ɣa ɣɛɛ na nu wɔɔ yɔ̃wɔ ɣa ɣɛ ga kpɔɔ wɔ pɛlɛ wu veaitiɛ.

³⁷Nui wõiyai ga kéea ɔɔ dée é leve bà, manui lɛ kuloni bu màʋaa ma. Nui wɔnɔ é wõini ga duu zunu ɔɔ duu ŋaza nu é leve bà, manui lɛ kuloni bu màʋaa ma.

³⁸Na ɣa ɣɛɛ na nui lɛ ná pɛɛ‐pulu wulu likpii ziɣia ɔ́ vile pùlu, manui lɛ kuloni bu màʋaa ma.

³⁹Nui yá ɣɛ yɛʋui ɣaa ziɛzu towaa pili. Nui yá yɛʋui vili màzaƃu ma towaa pɛtɛ.

⁴⁰“Nui nɛpɛ yá yee zei wo wu, manui yee zeiya bù. Nui wɔgi yá yee zei bù, manui yee zeiya nui nii wu é tèvega.

⁴¹Nui yá yee zei Gala daa woo‐wo nu nà ɣɛɛ ʋai ma ga Gala daa woo‐wo nu, manui ɣa Gala daa woo‐wo nu ná kulo‐nu‐mai maa zɔlɔ wo. Nui kɔnɔ yá yee zei tele‐bo tuo‐wo nu wu nà ɣɛɛ ʋai ma ga tele‐bo tuo‐wo nu, manui ɣa tele‐bo tuo‐wo nu ná kulo‐nu‐mai maa zɔlɔ wo.

⁴²Nui nɛpɛgi yá faa‐nɛɛ ɣɛ lopaa woloi niitiɛ te ɣila bɛ kɔpu ɣila kpalaa zu ziɛ lei zu nà ɣɛɛ ʋai ma ga kala dopo, gè bo wiɛ ƃɔɔƃɔɔ su manui lɛ valaga mawulo‐nu‐mai ma.”