Read Loma MAFIYU 11 Bible Online

MAFIYU 11 - Loma bible

MAFIYU 11

¹Tei Ziizɛ woloni ná kala dopo puugɔ kai felegɔitiɛ ɣala bosu, é ziɣini sa na é li ga yíɛ kala‐bo bo ta laitiɛ zu yíɛ Gala goi wo natiɛ.

²Tei Jɔ̃ ɣɛni kpidi vɛlɛ wu é faa mɛni é vile Kolai ɣɛɛ ʋaitiɛ va, é ná kala dopoitiɛ leveni ga keela ga te ɣɛ má,

³“Yà ɣa è ga nui é vaazu vaazu? Ƃaa gé ɣaazu kɛ nu ƃɔnɔ tuo?”

⁴Ziizɛ te woi ɣaa woteni é ɣe te ma, “Nii wo mɛnisu ta nii wo pɛtɛsu a li wo te wo Jɔ̃ ma.

⁵Gaazu wele vea ɣaazu ɣa ziɣizu ma, mɛlɛ‐ŋɛlɛ bea tiɛ ziɛ, gee yíɛ ƃea gee kɛɛ vea ma te maa yìɛ ziɣi, gui ʋoole vea tiɛ faa mɛni. Na ɣa ɣɛɛ na saa vea wu ziɣivɛ saa ya, woo niinɛ vagɔi yìɛ wo maa‐wõi vea ma.

⁶Tuuyiɛ ɣa nui nii ma màʋai lɛ ɣɛɛ ga wãla‐ma ʋaa.”

⁷Tei sa keelaitiɛ te ɣɛni liizu, Ziizɛ vɛɛni ga ƃɔɛ kpɔgi wɔ é vile Jɔ̃ va yíɛ ɣɛ te ma, “Aƃɛ ɣa wo wuloni wo li kpooʋei zu ga wo wɛlɛ bá? ?Gui fãgai ɣɛni tubusu nà ve?

⁸Zɛƃɛ ɣa mu wo wuloni wo li pɛtɛsu? ?Zunui maa ɣa ɣili ga seɣe muʋɔɔ? A wɛlɛ! Niitiɛ seɣe muʋɔɔ ge te ma ta masa pɛlɛa wu.

⁹Zɛƃɛ mu ka sa wo wuloni wo li pɛtɛsu? Gala daa woo‐wo nu? Ƃɔɔƃɔɔ su nà ɣɛni de. Tévegɛ ʋɔlɔ ƃalaa Gala daa woo‐wo nu va.

¹⁰Nui nii ɣa faa wonɛi Gala kɔlɔi zu é vile bá Gala giɛ ɣɛ tea, ‘Wɛlɛ! Gà nà keela woo‐wo nui levesu è ɣaazu luo, nii yá yà velei ƃɛtɛ è luo.’ ”

¹¹Ziizɛ ɣɛni tea, “Gè bo wiɛ ga gaama, nui nɛpɛ kái ŋaza nu vɛ te zaama nu ta nɛpɛ gɛ dɛ wu ziɣini ɔ́ leve Bataize‐ɣɛɛ Jɔ̃ va. Kɛ̀ na ƃalaa ɣɛɛvɛ nui tóai bu baa pɛ ba Gala ta masadai zu, manui levegɛ Jɔ̃ va.

¹²É ziɣi ƃɔɔ Bataize‐ɣɛɛ Jɔ̃ na yɛmini su ma é loo zai ŋɛ ni ma, Gala ta masadai ɣɛɛvɛ nɔ ƃuulu‐ƃaala zii‐ɣaa‐wãla maa zɔlɔ wosu, ƃuulu‐ƃaala zii‐ɣaa‐ẁãla‐wo bea tiɛ siɣi ga gaa‐ƃaa.

¹³Tɔwɔ Gala daa woo‐wo beaitiɛ vɛɛ tɔ kɔlɔi laa woi ɣaazɔ va te ɣɛɛvɛ Gala ta masadai maʋaa yɛsu na luo tiɛ bo é yɛsu é ziiti Jɔ̃ na yɛmini su ma.

¹⁴Ani tɔwɔ wo yii laavɛ ga wo ʋa nii wu te boga, Jɔ̃ ɣa é ga Yiilaija nii bogɛi ga tɔ vaazu.

¹⁵Nui faa‐mɛni gui wũ ba, pagɛ é nii mɛni.

¹⁶“Kɛ̀ zɛƃɛ ɣa gà zei‐zaa nu ƃusei niitiɛ wo kɔ̃ɔ ma? Te maʋaa wulovɛ è ɣɛ lopaitiɛ ta ɣɛ zeini dɔwɔ ƃalagitiɛ ɣa tiɛ woo vili te ɣaa‐wo yɔ̃wɔitiɛ ma

¹⁷tiɛ ɣɛ te ma, ‘Gé puu ʋɛɛni wo ma, wa wɔ wɛ lɛ ɣaani. Gé wɔlɔ wo ma ga zii‐zuuli, ɛ́ lɛ looni wo ma ga maa‐wõi.’

¹⁸Ƃɔvɛlaale Jɔ̃ vaani ɛ́ lɛ ŋɛni daa‐mii maa nɛɛ wosu ɔ́ nɔ ɣɛ ga é dɔɔ ƃoale. Tɔwɔ te ɣɛni tea, ‘Gɔʋɛ yowũ ɣa púlu.’

¹⁹Nài wɔgi gè ga nu ƃuse lui gè vaa gìɛ laa mi gìɛ dɔɔ ta ƃoale, te ɣɛ tea, ‘A wɛlɛ! Mii‐ŋɛni‐wõi nu ƃakpa ɣa é ga dɔɔ‐ƃoale nu ƃakpa. Ta gɔmɛti naʋolo‐wulo vea ta wulu é vɛɛ niitiɛ va te luo velei lɛ vani.’ Na pɛ ge ɣɛɛvɛ nii é ga kele‐ɣelegi kɛ́ɛ ʋai nɔ ɣa é ga mázeelei.”

²⁰Ziizɛ vɛɛni sa ga yii ɣaa wãlaa numaitiɛ ma te ɣɛni tai niitiɛ zu. Na ɣa ga vɛtiɛ é tii maa‐wɔlɔ‐wɔlɔgi bɔɔlɔ kele kɛɛni natiɛ. Toku ge zei ga ná veaitiɛ tɛ lɛ ŋɛni wulu ɣaa ʋeni ta ʋaa yowũitiɛ va.

²¹É ɣɛni ɣɛɛzu te ma, “Kpalo velivɛ yìɛ, yài è ga Koloazĩ lai! Kpalo velivɛ yìɛ, yài è ga Bɛseeda lai! Toku ge zei ga è ɣɛ tii maa‐wɔlɔ‐wɔlɔ kpaazagitiɛ te ɣɛɛ wo zu natiɛ te ɣɛɛni Taalɔ lai zu ta Saidɔ̃ lai, è ɣɛ ná veaitiɛ te wulu ʋaa ʋega wɔlɔ faa yowũ va ná zu wooza. Seɣe yaŋala gɔ ƃalaa ɣɛ te ma zuwu wuai te ma nà yìɛ dɛ ga te maa wõivɛ.

²²Kɛ̀ gè bo wiɛ, faa‐wo gaa‐leve ʋoloi maʋaa‐yɛ‐mai wala ɣa va Taalɔ lai ʋaa ma ta Saidɔ̃ é leve wo va.

²³?Yài wɔgi è ga Kapɔɔnia lai, è laavɛ la ga è lamata ɣa lɛ Gala ta? Ƃa! Yà yii saa vea ɣɛɛ‐zuvɛ. Ƃɔvɛlaale tii maa‐wɔlɔ‐wɔlɔ kpaazagitiɛ te ɣɛɛ è zu, è ɣɛ natiɛ te ɣɛɛni Saadɔ̃ lai zu, tai na ɔ́ yɛ na é yɛsu zai ŋɛ ni ziiti.

²⁴Kɛ̀ gè bo wiɛ, faa‐wo gaa‐leve ʋoloi maʋaa‐yɛ‐mai wala ɣa va Saadɔ̃ lai ʋaa ma é leve è va.”

²⁵Na maziɛ su Ziizɛ ɣɛni tea, “È mama, kèea, yài è ga zuu pɛ gee pɛ te maliɣii, ga velei è fai niitiɛ loowuga la kele‐ɣele beaitiɛ va ta niitiɛ ta faa ɣaa ɣa è te wulo kɛnɛ ma niitiɛ ɣaazu ta ɣi‐gaa‐ziɛi ʋaa wuloai ga lopaa.

²⁶Tɔ na, kèea! Na ɣa é ɣɛni ga è yii‐ma velei.

²⁷Ŋɛni ɣaazɔ yee laavɛ sa zèea kèea vɛ. Tɔwɔ nu ta nɛpɛ gɛ lɛ kẁɛ̃ni, nài gè ga dúi, é wulo púlu. Na ɣa ɣɛɛ na nu ta nɛpɛ gɛ lɛ kèea wɛ̃ni é wulo pùlu, nài gè ga dúi, é vɛɛ sa nui nɛpɛ ba nài gè ga dúi gà wõi ɣɛ gè máʋaa wulo kɛnɛ ma gáazu.

²⁸A va pɔ̀, waitiɛ wo mɔɔlɛzu wa ɣasɔi viiyai wo ma. Gà kɛ wo loowo.

²⁹A ẁũmɔ ɣasɔi ziɣi wo dá ẃũmɔ, na ɣa ɣɛɛ na wo faa maa woli zèea. Ƃɔvɛlaale gà ga nu‐zɛ‐sɛ‐bo nu kòloai ga yii zu vele. Wa doowo maa zɔlɔ wo wo yɛʋui ʋaa ma.

³⁰Toku ge zei ga nà kpalai maʋaa ʋii ƃɛɛvɛ, nà kasɔi peea.”