Read Loma MAFIYU 12 Bible Online

MAFIYU 12 - Loma bible

MAFIYU 12

¹Na maziɛ su Ziizɛ ɣɛni levesu kpalagi zu ga doowo folo. Pulu ɣɛni ná kala dopoitiɛ ma. Na ma te vɛɛni sa ga dɔɔlɔ ƃazii ƃolo‐kpologa gá ga te mi.

²Kɛ̀ tei Favilesiitiɛ te wɛlɛni na va, te ɣɛni Ziizɛ ma, “Wɛlɛ! Yà ɣala dopoitiɛ ta fai nii ɣɛɛzu lɛ tɔ su ga nu kɛ ga doowo folo.”

³É ɣɛni te ma,“? Tei pulu ɣɛni Deeve ma ta numaitiɛ te ɣɛni ba, nii é kɛɛni wɛ lɛ dodoni Gala kɔlɔi zu?

⁴Na ɣa ga velei é lɛɛni la Gala na pɛlɛi wu é kpoolo‐ʋɔi nii mi dái ɣɛ na Gala gaazu, nii lɛ ŋɛni tɔ su ga é mi ɔ́ nɔ ɣɛ ga é ɣɛ tɔ su niitiɛ ʋaa ma te ɣɛni bá ga te mi. Laa‐ʋaalegitiɛ nɔ ɣa é te ʋaa ma ga te mi.

⁵?Ƃaa wɛ lɛ dɛ dodoni Gala na tɔgi zu ga laa‐ʋaalegitiɛ te Gala‐feli wɔta walai wu velei te doowo foloi maa woolasu la, tɔwɔ ɛ́ lɛ vɛɛzu te va ga faa?

⁶Gè bo wiɛ, ŋɛni ta ɣa vɛ tevegɛi Gala‐feli wɔta walai va.

⁷Nii ponɛi Gala kɔlɔi zu mawoi ga, ‘Gaazu‐maa‐wõi‐ɣaa ɣa mawõi wɔɔlɔi mà, ɛ́ lɛ ga zalaɣa,’ è ɣɛ wo woi na zu‐wulo‐zu wɛ̃ni, niitiɛ te ɣɛɛ‐zɔ gɛ lɛ faa zu wɛ lɛ ƃega faa vɛɛ te va.

⁸Toku ge zei ga nu ƃuse lui ɣa é doowo foloi maazu.”

⁹Ziizɛ ziɣini na é li é lɛ ta Ɣala‐feli wɔtai wu.

¹⁰Zunu ta wɔ ge ɣɛni na zée ʋɔi ma. Numaitiɛ te Ziizɛ ɣaa zaɣa kɛɛni sa te ɣɛ ma, “Tɔ tɔ su ga nu é nu valo ga doowo foloi?” Te nii ɣɛɛni ga te faa vɛɛ Ziizɛ va.

¹¹É ɣɛni te ma, “Wo ta zɛƃɛ ɣa baala ka ɣɛ zéea é loo zeɣe zu ga doowo foloi manui ƃe sosu é kulo zeɣei zu?

¹²Tɔwɔ nu ƃuse lɔnɔ wala ƃakpavɛ é leve baala ba! Na ma tɔ tɔ su ga nu faa vagɔ ɣɛ ga doowo foloi.”

¹³É ɣɛ sa zunui ma, “Yee zu zakpa.” Nà zɛba é yee zu zakpa zée ƃɛtɛ sa wulu ga zée zɔi ɣavele.

¹⁴Kɛ̀ Favilesiitiɛ te wuloni te li te fuo loo ga Ziizɛ la ga velei ta sú ƃɔnɔ wo da.

¹⁵Tei tɔwɔ Ziizɛ ɣɛ ga fai nii wɛ̃ɛga, é ziɣini na é li. Nu lamaa vileni púlu é te pɛ te valo.

¹⁶Tɔwɔ é deʋeni é da te ya ga te mɛ lɛ faa wo numaa ma ɔ́ vile bá natiɛ tɔ kwɛ̃ɛ.

¹⁷Nii ɣɛɛni ga fai Gala daa woo‐wo nui Aizeea boni é leve ma. Na ɣa ga tei é boni ga Gala ge ɣɛni tea,

¹⁸“Wɛlɛ! Nà tii‐ɣɛɛ nui nii ɣa zèe ƃadogɛi bá, é ga ẁõila nui nii zìi wala lai máʋai vɛ. Gà bàa ŋinɛgi yii ma, na ɣa ɣɛɛ na towaa faa‐wo gaa‐leve ʋai wo ga woo maa zeezea zii pɛ ma.

¹⁹Ɛ́ lɛ daaza lɔɔ nu la. Ɛ́ lɛ wɔnɔ ƃɔɛ ga woo wala ɔ́ nɔ ɣɛ ga nu nɛpɛ ge goo mɛni pele‐vɛɛgitiɛ ma.

²⁰Ɛ́ lɛ ziɛ ƃute kɔkɔgi nii ɣalea sú ɣa ƃili ɔ́ nɔ ɣɛ ga é wui nii liʋi yá ɣɛ ɣalazu so faa lɛ ɣɛɛ ba. Towaa yɛ na é yɛsu tele‐bo fai yee wudɛ fai pɛ maazu.

²¹Na ɣa ɣɛɛ na ná daa‐zeigi ɣa yá ɣɛ ga zii pɛ ki‐to‐su.”

²²Te vaani Ziizɛ wɔ ga nu ta gɔʋɛ yowũ púlu. Nà kɛɛni gaazu wu é ɣɛ ga mumu. É manui valoni. Mumugi na yɛpɛni sa é ŋada maa ƃɛɛ.

²³É wuloni ga numaitiɛ ɣaazɔ ga kpakpaa te ɣɛ tea,“? Nii ɣa zoo é ɣɛ ga Deeve duu?”

²⁴Kɛ̀ tei Favilesiitiɛ te mɛnini, te ɣɛni tea, “Biazibɔ nii é ga gɔʋɛ yowũitiɛ ta masagi ná gaa‐ƃai ɣa zunui nii é gɔʋɛa ƃɛɛzu la numaa wulu.”

²⁵Ta ɣi‐gaa‐ziɛi wɛ̃ɛ pele ma Ziizɛ vɛ é ɣɛni te ma, “Masadai nɛpɛ gáa ɣa wɛɛ su tiɛ wɔ ɣii wɔ, mamasadai zu ɣa ŋala‐ŋala. Na ɣa ɣɛɛ na taa nɛpɛ ɔɔ pɛlɛ nɛpɛ gɛ lɛ ɣaa wɛɛ su tɔ ɣɛ wɔɔzu ɣiini pɔ malai ɔɔ mavɛlɛi ɔ́ ɣɛ loni.

²⁶Tɔwɔ ani Seeta ɣa ɣɛ na Seeta ƃɛɛzu numaa wulu, a kɛ tii é ɣaa wɛɛ su yíɛ wɔ ƃɔɔ wɔ. Ná masadai wɔ ka sa a yɛ ma ɣɛ le?

²⁷Ani gà ɣɛ na gɔʋɛ yowũa ƃɛɛzu numaa wulu ga Biazibɔ na gaa‐ƃai, ƃɛ na gaa‐ƃaa ɣa sa wa numaitiɛ ta te ƃɛɛ la numaa wulu? Ta ɣa te ga wa ʋaa ɣaa‐leveai.

²⁸Kɛ̀ tɔwɔ ani Gala baa ŋinɛgi na gaa‐ƃai ve gè kɛɛzu la, a kɛ na mu Gala na masadai ziitia wo ma.

²⁹Ɔɔ nu ɣa zoo ɣɛ le é lɛ gaa‐ƃaa nu na pɛlɛ wu é kweligitiɛ ziɣi ga gaa‐ƃaa, kɛni kilaa manui ɣa gaa‐ƃaa nui ɣili ɣaʋu pa, kɛlɛɛ? Na ɣa ɣɛɛ na tɔ sa yá nà ná pɛlɛi wu ʋowo ga ƃɔɔƃɔɔ su.

³⁰Nui nɛpɛ ɛ́ lɛ bà tɔ ga kɔ̀ɔ yɔ̃wɔ. Nui nɛpɛ gá tɔ gɛ́ lɛ ŋɛnii ɣaa lɛɛzu ba tɔ su ʋazasu.

³¹Na ma gè bo wiɛ, faa yowũ nɛpɛ é vɛɛ Gala daa ŋala‐ŋala faa nɛpɛ ba te zu ʋaa ɣa yɛ nu ƃuse vɛ. Kɛ̀ daa‐ŋala‐ŋalagi nɛpɛgi yá wo ga Gala baa ŋinɛgi sú ʋaa le yɛga.

³²Nu nɛpɛ ka ɣɛ faa yowũ wosu ga nu ƃuse lui la manui zu ʋaa yɛ. Kɛ̀ nui nɛpɛ é faa yowũ wosu ga Gala baa ŋinɛgi la, sú ʋaa lɛ yɛga ŋeteai nii ƃalaa zu ɔ́ nɔ ɣɛ ga sú ʋaa yɛ ŋeteai zɔi zu é vaazu vaazu.”

³³Ziizɛ ɣɛni tea, “Pagɛ nɔ nu gului ziɣi ga gulu vagɔ, na ɣa ɣɛɛ na é gaa vai ziɣi ga gulu vaa vagɔ. Ɔɔ é siɣi ga gulu yowũ é mavai ziɣi ga gulu vaa yowũ. Toku ge zei ga nu ɣa gului wɛ̃ɛ nɔ ga gaa vai.

³⁴Wai ŋɛ ni wo ʋaa wuloai ga kaalia, wa leve ɣɛ le wo faa vagɔ wo, wa wɔ wo ga tuo‐vele‐yowũ vea? Toku ge zei ga faa lama‐lamagi yá ɣɛ nu yii zu ta nɔ ɣa yá wulo manui la yíɛ bo.

³⁵Nui nii é ga nu vagɔi, faa vagɔi gáa lɛi ba zíi zu nà mavelei ɣa yá wulo la ga faa vagɔ. Nii wɔgi é ga tuo‐vele‐yowũ nui, ná tuo vele yowũi gáa lɛi ba zíi zu mavelei nɔ ɣa yá wulo la ga tuo vele yowũ.

³⁶Gè bo wiɛ, gaa‐vala‐ba ƃɔɛ nɛpɛ nu ƃuse ɣa bo, ta mawoo‐zu‐wulo‐kɛɛ wo ga faa‐wo gaa‐leve ʋoloi.

³⁷Ƃɔvɛlaale è woi nɔ ɣa faa ɣa ziɣi la è va, è woi wɔ nɔ ɣa wɔnɔ faa ɣa yɛ da è ma.”

³⁸Tei sa nà ɣɛɛni, tɔ‐dɛɛ ɣala‐mɔitiɛ te taniga vɛɛ Favilesiitiɛ te taniga va te ɣɛni Ziizɛ ma, “Kala‐mɔi, gé wõini è faa maa‐wɔlɔ‐wɔlɔ ta ɣɛ yíɛ dɛ ga seele.”

³⁹Kɛ̀ é te woi ɣaa woteni é ɣɛ te ma, “Ʋala‐wonɛɛgi nii é ga tuƃo‐vele‐yowũ nu é ga nui nu lɛ laa la towaa yá ɣɛ faa maa‐wɔlɔ‐wɔlɔ gaa ziɛzu ga seele. Tɔwɔ tɛ lɛ faa maa‐wɔlɔ‐wɔlɔ nɛpɛ maa zɔlɔ woga é wulo Gala daa woo‐wo nu Joona maʋaa maa‐wɔlɔ‐wɔlɔgi wulu.

⁴⁰Toku ge zei ga velei nɔ Joona kɛɛni la feza gwala wuu zu ga folo saagɔ kpidi saagɔ, vele nɔ na nu ƃuse lui ɣa kɛɛ la zui wu ga folo saagɔ kpidi saagɔ.

⁴¹Niniva lai zu veaitiɛ ta wu ziɣi ga ʋala‐wonɛɛgi nii ga faa‐wo gaa‐leve ʋoloi te faa vɛɛ te va. Ƃɔvɛlaale ta dɛi te wulu ɣaa ʋeni ta ʋaa yowũi va Joona na Gala goo‐wogai ma. Tɔwɔ a wɛlɛ, ŋɛni ta ɣa vɛ gwala levegɛi Joona va.

⁴²Ŋaza nu ɣalasogi nii é ziɣini ga nu wɔwɔ yee‐su vele foloi ʋaa va towaa wu ziɣi ga ʋala‐wonɛɛgi nii ga faa‐wo gaa‐leve ʋoloi é faa vɛɛ ba. Ƃɔvɛlaale é wuloni zui mawɛ̃ɛ pele ma é va ga é Salamɔ na kele‐ɣele goi mɛni. Kɛ̀ tɔwɔ ŋɛni ta ɣa vɛ gwala levegɛi Salamɔ va.

⁴³“Gɔʋɛ yowũ ɣa ziɣi na nu wulu, towaa li yíɛ leve‐teve vɛtiɛ ziɛ lɛ natiɛ yíɛ doowo‐bo‐su maa vele ɣaa ziɛ, tɔwɔ lɛ ná ta maa zɔlɔ woga.

⁴⁴Tɔ sa a ɣɛ tea, ‘Pɛlɛi nii gè wuloa bu gà wotesu gè li wulu na.’ Tɔwɔ yá vaa na, towaa wɛlɛ ná va ná yãkai, ná ƃalegɛi, ná maʋaa zeiyai ga sei vele.

⁴⁵Tɔ sa a li na zu é gɔʋɛ yowũ lɔfela ta ƃɔnɔga vɛɛ va te luo velei yowũai é leve tɔ ɣagi va. Te lɛ sa ná te yɛ ná. Nà wɔ ka ɣɛɛ na, nui nii ta vile púlu ná ŋetea ɣaa‐ƃelagi zu ɣa yowũ é leve mamaa wũgi va. Vele nɔ na ƃalaa yá ɣɛɛ la ga tuo‐vele‐yowũ ʋala‐wonɛɛgi niitiɛ.”

⁴⁶Tei dɛ nɔ Ziizɛ ɣɛni ƃɔɛzu numaitiɛ wɔ, dée ƃɔga déɣe zinaitiɛ te ɣɛni loni ŋeteavɛ tiɛ bo ga te wõini te yɛpɛ pɔ́.

⁴⁷Nui ta ɣɛni Ziizɛ ma, “È lee ƃɔga è leɣeitiɛ ta loni ŋeteavɛ tiɛ bo ga te wõini te ƃɔɛ è wɔ.”

⁴⁸Kɛ̀ nui é boni má é gói ɣaa woteni é ɣɛ má, “Ƃɛ ɣa é ga dèe? Ƃɛni ka kɔnɔ te ga dèɣeitiɛ?”

⁴⁹É yee zakpani sa ná kala dopoitiɛ ma é ɣɛ tea, “Dèeni ka ta dèɣeitiɛ!

⁵⁰Ƃɔvɛlaale nui nɛpɛ yá kèeai nii yii‐mai ɣɛ é gee‐zuvɛ, manui ɣa é ga dèɣe é ga nà seela é ga dèe.”